ສຶກສາຄວາມເປັນໄປໄດ້ ໃນການອອກບັດອະນຸຍາດໃຫ້ແຮງງານຕ່າງປະເທດ

ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ (MOU) ວ່າ​ດ້ວຍ​ການ​ສຶກ​ສາ​ຄວາມ​ເປັນ​ໄປ​ໄດ້ ໃນ​ການ​ພັດ­ທະ­ນາ​ລະ­ບົບ​ໂປຣ​ແກຣມ​ຖານ​ຂໍ້​ມູນ​ອອກ​ບັດ​ອະ­ນຸ­ຍາດ​ເຮັດ​ວຽກ ໃຫ້​ແຮງ​ງານ​ຕ່າງ­ປະ­ເທດ​ທີ່​ເຂົ້າ​ມາ​ເຮັດ​ວຽກ​ຢູ່ ສປປ ລາວ (Smart Card) ຈັດ​ຂຶ້ນ​ວັນ​ທີ 15 ຕຸ­ລາ 2020 ທີ່​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ລະ­ຫວ່າງ​ທ່ານ​ນາງ ອາ​ນຸ​ສອນ ຄຳ​ສິງ​ສະ​ຫວັດ ຫົວ­ໜ້າ​ກົມ​ພັດ­ທະ­ນາ​ສີ­ມື​ແຮງ​ງານ ແລະ ຈັດ​ຫາ​ງານ (ພຈງ) ກະ­ຊວງ ຮສສ ແລະ ທ່ານ ສຸກ​ສາ­ຄອນ ໃສ​ທິ​ລາດ ປະ­ທານ​ບໍ­ລິ­ສັດ ອີ​ປາ​ປາ ການ​ລົງ­ທຶນ ຈຳ­ກັດ​ຜູ້​ດຽວ ມີ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ ຮສສ ພ້ອມ​ດ້ວຍ​ທ່ານ​ຮອງ​ລັດ­ຖະ­ມົນ­ຕີ ຫົວ­ໜ້າ​ກົມ ຮອງ​ກົມ ແລະ ພາກ­ສ່ວນ​ກ່ຽວ­ຂ້ອງ​ທັງ​ສອງ​ຝ່າຍ ເຂົ້າ​ຮ່ວມ​ເປັນ​ສັກ­ຂີ​ພິ­ຍານ.

ທ່ານ​ນາງ ອາ​ນຸ​ສອນ ຄຳ​ສິງ​ສະ​ຫວັດ ໄດ້​ແຈ້ງ​ໃຫ້​ຊາບ​ວ່າ: ສປປ ລາວ ນອກ­ຈາກ​ເປັນ​ປະ­ເທດ​ສົ່ງ ກໍ​ຍັງ​ເປັນ​ປະ­ເທດ​ຮັບ ເຊິ່ງ​ໃນ​ແຕ່​ລະ​ປີ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ໄດ້​ພິ­ຈາ­ລະ­ນາ​ອະ­ນຸ­ຍາດ​ໃຫ້​ແຮງ​ງານ​ຕ່າງ­ປະ­ເທດ​ເຂົ້າ​ມາ​ເຮັດ​ວຽກ​ຢູ່ ສປປ ລາວ ຈຳ­ນວນ​ຫຼາຍ​ສົມ­ຄວນ ເພື່ອ​ສະ­ໜອງ​ໃຫ້​ບັນ­ດາ​ຫົວ­ໜ່ວຍ​ແຮງ​ງານ​ຢູ່​ໃນ​ຂົງ­ເຂດ​ການ​ຜະ­ລິດ ທຸ­ລະ​ກິດ ແລະ ບໍ­ລິ­ການ ຕາມ​ຄວາມ​ຕ້ອງ­ການ​ຂອງ​ຕຳ­ແໜ່ງ​ງານ ແນ­ໃສ່​ເຮັດ​ໃຫ້​ສາ­ມາດ​ຂັບ​ເຄື່ອນ​ການ​ຜະ­ລິດ​ທຸ­ລະ​ກິດ ແລະ ບໍ­ລິ­ການ​ຈະ­ເລີນ​ເຕີບ​ໂຕ​ໃນ​ແຕ່​ລະ​ໄລ­ຍະ ໃນ​ປີ 2019 ໄດ້​ອະ­ນຸ­ມັດ​ໂກ​ຕາ​ນຳ​ໃຊ້​ແຮງ​ງານ​ຕ່າງ­ປະ­ເທດ​ຈຳ­ນວນ 65.000 ຄົນ ແລະ ປີ 2020 ຈຳ­ນວນ 60.000 ຄົນ.

ທ່ານ ສຸກ​ສາ­ຄອນ ໃສ​ທິ​ລາດ ກ່າວ​ວ່າ: ການ​ພັດ­ທະ­ນາ​ລະ­ບົບ​ໂປຣ​ແກຣມ​ຖານ​ຂໍ້​ມູນ ເພື່ອ​ອະ­ນຸ­ມັດ​ໂກ​ຕາ​ນຳ​ໃຊ້ ແລະ ອອກ​ບັດ​ອະ­ນຸ­ຍາດ​ເຮັດ​ວຽກ​ໃຫ້​ແຮງ​ງານ​ຕ່າງ­ປະ­ເທດ​ທີ່​ເຂົ້າ​ມາ​ເຮັດ​ວຽກ​ຢູ່ ສປປ ລາວ ໃນ​ຮູບ​ແບບ​ທີ່​ທັນ​ສະ­ໄໝ (Smart Card) ໂດຍ​ໃຫ້​ສາ­ມາດ​ເຊື່ອມ​ໂຍງ​ກັບ​ພາກ­ສ່ວນ​ຕ່າງໆ​ທີ່​ກ່ຽວ­ຂ້ອງ ພ້ອມ​ທັງ​ຕິດ­ຕາມ ແລະ ກວດ­ກາ​ໄດ້ ເຫັນ​ວ່າ​ເປັນ​ທິດ​ທາງ​ທີ່​ເໝາະ​ສົມ ເພື່ອ​ເຮັດ​ໃຫ້​ວຽກ​ງານ​ການ​ອະ­ນຸ­ຍາດ​ໃຫ້​ແຮງ​ງານ​ຕ່າງ­ປະ­ເທດ​ເຂົ້າ​ມາ​ເຮັດ​ວຽກ​ຢູ່ ສປປ ລາວ ມີ​ຄວາມ​ສະ­ດວກ ວ່ອງ­ໄວ ໂປ່ງ​ໃສ ແລະ ສາ­ມາດ​ຕອບ​ສະ­ໜອງ​ກັບ​ຄວາມ​ຮຽກ­ຮ້ອງ​ຕ້ອງ­ການ​ຂອງ​ບັນ­ດາ​ຫົວ­ໜ່ວຍ​ແຮງ​ງານ​ທີ່​ມີ​ຄວາມ​ຕ້ອງ­ການ​ນຳ​ໃຊ້​ແຮງ​ງານ​ຕ່າງ­ປະ­ເທດ ເພື່ອ​ເປັນ​ຂໍ້​ມູນ​ໃນ​ການ​ວິ­ເຄາະ ວິ­ໄຈ ຈຶ່ງ​ໄດ້​ຮ່ວມ​ກັນ​ເພື່ອ​ສຶກ​ສາ​ຄວາມ​ເປັນ​ໄປ​ໄດ້​ໃນ​ການ​ພັດ­ທະ­ນາ​ລະ­ບົບ​ໂປຣ​ແກຣມ​ຖານ​ຂໍ້​ມູນ ອອກ​ບັດ​ອະ­ນຸ­ຍາດ​ເຮັດ​ວຽກ​ໃຫ້​ແຮງ​ງານ​ຕ່າງ­ປະ­ເທດ​ທີ່​ເຂົ້າ​ມາ​ເຮັດ​ວຽກ​ຢູ່ ສປປ ລາວ (Smart Card).

ບົດ​ບັນ­ທຶກ​ຄວາມ​ເຂົ້າ­ໃຈ​ສະ­ບັບ​ນີ້ ມີ​ຜົນ​ສັກ­ສິດ​ເລີ່ມ​ແຕ່​ວັນ​ທີ 15 ຕຸ­ລາ 2020 ທີ່​ທັງ​ສອງ​ຝ່າຍ​ໄດ້​ຮ່ວມ​ກັນ​ລົງ​ນາມ​ກັນ ຖ້າ​ຫາ​ກວ່າ​ພາຍ​ໃນ​ກຳ­ນົດ​ເວ­ລາ 1 ປີ ການ​ສຶກ​ສາ​ຄວາມ​ເປັນ​ໄປ​ໄດ້​ຍັງ​ບໍ່​ສຳ­ເລັດ ແມ່ນ​ສາ­ມາດ​ຕໍ່​ອາ­ຍຸ​ການ​ຮ່ວມ​ມື​ໄປ​ໄດ້​ຕື່ມ​ອີກ​ບໍ່​ເກີນ 1 ປີ ບົນ​ພື້ນ­ຖານ​ການ​ເຫັນ​ດີ​ເປັນ​ເອ­ກະ​ພາບ​ຂອງ​ສອງ​ຝ່າຍ ຫຼື​ໃນ​ກໍ­ລະ­ນີ​ທີ່​ເຫັນ​ວ່າ­ການ​ສຳ​ຫຼວດ​ການ​ອອກ​ບັດ​ອະ­ນຸ­ຍາດ​ເຮັດ​ວຽກ​ໃຫ້​ແຮງ​ງານ​ຕ່າງ­ປະ­ເທດ​ທີ່​ເຂົ້າ​ມາ​ເຮັດ​ວຽກ​ຢູ່ ສປປ ລາວ ມີ​ຄວາມ​ຄືບ​ໜ້າ­ທີ່​ໄວ​ກວ່າ​ກຳ­ນົດ ເວ­ລາ​ໃນ​ບົດ​ບັນ­ທຶກ​ສະ­ບັບ​ນີ້ ຈະ​ພິ­ຈາ­ລະ­ນາ​ສືບ­ຕໍ່​ຈັດ​ຕັ້ງ​ປະ­ຕິ­ບັດ​ໂຄງ­ການ​ດັ່ງ­ກ່າວ​ຢ່າງ​ເປັນ​ທາງ​ການ.

# ຂ່າວ & ພາບ: ບຸນ​ມີ ສີ­ວິ­ໄລ

ຕິດຕໍ່ພວກເຮົາ
error: Content is protected !!