ບໍ່ຢາກປວດຫົວ ຕ້ອງໄປລົງທະບຽນ

ໃນ​ຍຸກ​ນີ້​ສື່​ອອນ​ລາຍ​ມາ​ແຮງ​ທົ່ວ​ໂລກ ເຊິ່ງ​ກໍ​ຕ້ອງ​ຍອມ­ຮັບ​ວ່າ​ມັນ​ມີ​ດ້ານ​ດີ ແລະ ດ້ານ​ອ່ອນ ສະ­ນັ້ນ ຫຼາຍ​ປະ­ເທດ​ໃນ​ໂລກ​ເພິ່ນ​ຈຶ່ງ​ມີ​ກົດ­ໝາຍ ແລະ ລະ­ບຽບ​ການ​ອອກ​ມາ​ເພື່ອ​ຄຸ້ມ​ຄອງ​ສື່​ນີ້ ເຊັ່ນ​ວ່າ: ຢູ່​ປະ­ເທດ​ເຢຍ​ລະ​ມັນ ຣັດ​ເຊຍ ຫຼື ປະ­ເທດ​ໃກ້​ຄຽງ​ເຮົາ ຄື: ປະ­ເທດ​ໄທ.

ສຳ­ລັບ​ປະ­ເທດ​ເຮົາ​ກໍ​ມີ​ກົດ­ໝາຍ​ເຊັ່ນ​ກັນ ໂດຍ​ສະ­ເພາະ ແມ່ນ​ກົດ­ໝາຍ​ວ່າ​ດ້ວຍ​ສື່​ມວນ​ຊົນ (ສະ­ບັບ​ປັບ­ປຸງ) ເລກ​ທີ 019/ສພຊ ລົງ​ວັນ​ທີ 04 ພະ­ຈິກ 2016 ໂດຍ​ໃນ​ມາດ­ຕາ 60: ການ​ນຳ​ໃຊ້​ສື່​ສັງ­ຄົມ​ອອນ​ລາຍ​ຂອງ​ອົງ­ການ​ສື່​ມວນ​ຊົນ.

ແລະ ໃນ​ມໍ່ໆມານີ້​ກໍ​ມີ​ແຈ້ງ​ການ ເລກ​ທີ 252/ຖວ​ທ ລົງ​ວັນ​ທີ 17/09/2020 ຈາກ​ຫ້ອງ­ການ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ເລື່ອງ: ການ​ສ້າງ­ຕັ້ງ​ໜ້າ​ຂ່າວ​ອອນ​ລາຍ (Social Media) ເພື່ອ​ບໍ­ລິ­ການ​ຂ່າວ ແລະ ສະ­ໜອງ​ຂໍ້​ມູນ​ໃຫ້​ແກ່​ສັງ­ຄົມ​ໃນ ສປປ ລາວ ເຊິ່ງ​ແຈ້ງ​ການ​ນີ້​ປ່ຽນ​ແທນ​ແຈ້ງ​ການ ເລກ​ທີ 256/ຖວ​ທ ລົງ​ວັນ​ທີ 12 ກໍ­ລະ­ກົດ 2019.

ເນື້ອ​ໃນ​ສຳ­ຄັນ​ຂອງ​ແຈ້ງ​ການ​ມີ​ດັ່ງ­ນີ້:

ຫ້ອງ­ການ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ຂໍ​ຖື​ເປັນ​ກຽດ​ແຈ້ງ​ມາ​ຍັງ​ບັນ­ດາ​ທ່ານ​ຜູ້­ອຳ­ນວຍ­ການ ຫົວ­ໜ້າ​ບັນ­ນາ­ທິ­ການ ແລະ ເຈົ້າ​ຂອງ​ໜ້າ​ຂ່າວ (Admin) ສື່​ສັງ­ຄົມ​ອອນ​ລາຍ​ຂອງ​ບຸກ­ຄົນ ນິ­ຕິ­ບຸກ­ຄົນ ການ­ຈັດ­ຕັ້ງ​ຂອງ​ພາກ​ລັດ ແລະ ເອ­ກະ​ຊົນ ທີ່​ເຄື່ອນ​ໄຫວ​ຢູ່​ພາຍ​ໃນ ສປປ ລາວ ຊາບ​ດັ່ງ­ນີ້:

1. ເພື່ອ​ເຮັດ​ໃຫ້​ວຽກ​ງານ​ການ​ໂຄ­ສະ­ນາ​ຜ່ານ​ສື່​ສັງ­ຄົມ​ອອນ​ລາຍ ກໍ​ຄື ການ​ສ້າງ­ຕັ້ງ​ໜ້າ​ຂ່າວ​ເຟ​ສ​ບຸກ (Facebook) ຢູ​ທູບ (Youtube ແລະ ເວັບ​ໄຊ (Website) ທີ່​ເຮັດ​ໜ້າ­ທີ່​ບໍ­ລິ­ການ​ຂ່າວ ແລະ ສະ­ໜອງ​ຂໍ້​ມູນ​ຂ່າວ­ສານ​ໃຫ້​ແກ່​ສັງ­ຄົມ​ໃຫ້​ໄດ້​ຮັບ​ຂໍ້​ມູນ​ຂ່າວ­ສານ​ທີ່​ຖືກ­ຕ້ອງ ເປັນ​ຈິງ ໜ້າ​ເຊື່ອ​ຖື ແລະ ເປັນ​ປະ­ໂຫຍດ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ.

2. ໃນ​ໄລ­ຍະ​ຜ່ານ​ມາ ພາຍ­ຫຼັງ​ໄດ້​ອອກ​ແຈ້ງ​ການ ເລກ​ທີ 256/ຖວ​ທ ລົງ​ວັນ​ທີ 12 ກໍ­ລະ­ກົດ 2019 ກ່ຽວ​ກັບ​ການ​ສ້າງ­ຕັ້ງ​ໜ້າ​ຂ່າວ (Social Media) ເພື່ອ​ສະ­ໜອງ​ຂ່າວ­ສານ​ຮັບ​ໃຊ້​ສັງ­ຄົມ ເຊິ່ງ​ບັນ­ດາ​ຜູ້­ອຳ­ນວຍ­ການ ຄະ­ນະ​ບັນ­ນາ­ທິ­ການ ແລະ ເຈົ້າ​ຂອງ​ໜ້າ​ຂ່າວ​ອອນ​ລາຍ​ຈຳ­ນວນ​ໜຶ່ງ​ໄດ້​ມີ​ຄວາມ​ຕື່ນ​ຕົວ ແລະ ໄດ້​ລົງ­ທະ­ບຽນ​ນຳ​ກົມ​ສື່​ມວນ​ຊົນ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ແລ້ວ ແຕ່​ຍັງ​ມີ­ໜ້າ​ຂ່າວ​ອອນ​ລາຍ​ຈຳ­ນວນ​ຫຼວງ­ຫຼາຍ​ບໍ່​ທັນ​ມາ​ລົງ­ທະ­ບຽນ ສະ­ນັ້ນ ຖື​ວ່າ​ໜ້າ​ຂ່າວ​ດັ່ງ­ກ່າວ​ບໍ່​ໄດ້​ຮັບ​ອະ­ນຸ­ຍາດ​ຖືກ­ຕ້ອງ​ຕາມ​ກົດ­ໝາຍ​ສື່​ມວນ​ຊົນ (ສະ­ບັບ​ປັບ ປຸງ) ເລກ​ທີ 01/ສພຊ ລົງ​ວັນ​ທີ 04 ພະ­ຈິກ 2016 ແລະ ລະ­ເມີດ​ລະ­ບຽບ​ການ​ທີ່​ກ່ຽວ­ຂ້ອງ.

3. ເພື່ອ​ໃຫ້​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ​ຂອງ ສປປ ລາວ ແລະ ເພື່ອ​ປົກ​ປ້ອງ​ຜູ້​ໃຫ້​ບໍ​ລິ ການ ແລະ ຜູ້​ບໍ­ລິ­ໂພກ​ຂໍ້​ມູນ​ຂ່າວ­ສານ​ຜ່ານ​ສື່​ສັງ ຄົມ​ອອນ​ລາຍ ບຸກ­ຄົນ ນິ­ຕິ­ບຸກ­ຄົນ ການ­ຈັດ­ຕັ້ງ ຂອງ​ພາກ​ລັດ ແລະ ເອ­ກະ​ຊົນ ທີ່​ສ້າງ​ໜ້າ​ຂ່າວ​ອອນ​ລາຍ​ແລ້ວ ແລະ ກຳ­ລັງ​ຈະ​ສ້າງ​ເພື່ອ​ບໍ​ລິ ການ​ຂ່າວ ແລະ ສະ­ໜອງ​ຂໍ້​ມູນ​ຂ່າວ­ສານ​ໃຫ້​ແກ່ ສັງ­ຄົມ ຕ້ອງ​ໄດ້​ລົງ­ທະ­ບຽນ​ນຳ​ພາກ­ສ່ວນ​ຄຸ້ມ​ຄອງ​ສື່​ມວນ​ຊົນ ຄື: ກົມ​ສື່​ມວນ​ຊົນ ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ.

4. ຫ້າມ​ບຸກ­ຄົນ ນິ­ຕິ­ບຸກ­ຄົນ ການ­ຈັດ­ຕັ້ງ​ຂອງ​ພາກ​ລັດ ແລະ ເອ­ກະ​ຊົນ ເຄື່ອນ​ໄຫວ​ໂຄ­ສະ­ນາ ແລະ ເຜີຍ­ແຜ່​ຂໍ້​ມູນ​ຂ່າວ­ສານ​ຜ່ານ​ສື່​ອອນ​ລາຍ ໂດຍ​ທີ່​ຍັງ​ບໍ່​ໄດ້​ຮັບ​ອະ­ນຸ­ຍາດ​ຢ່າງ​ຖືກ­ຕ້ອງ​ຕາມ​ກົດ­ໝາຍ​ສື່​ມວນ​ຊົນ.

5. ຖ້າ​ບຸກ­ຄົນ ນິ­ຕິ­ບຸກ­ຄົນ ການ­ຈັດ­ຕັ້ງ​ຂອງ​ພາກ​ລັດ ແລະ ເອ­ກະ​ຊົນ ຍັງ​ສືບ­ຕໍ່​ເຄື່ອນ​ໄຫວ​ໂຄ­ສະ­ນາ ແລະ ສະ­ໜອງ​ຂໍ້​ມູນ​ຂ່າວ­ສານ​ຜ່ານ​ສື່​ອອນ​ລາຍ​ໃຫ້​ແກ່​ສັງ­ຄົມ ໂດຍ​ບໍ່​ໄດ້​ຮັບ​ອະ­ນຸ­ຍາດ ແມ່ນ​ຈະ​ໄດ້​ດຳ­ເນີນ​ມາດ​ຕະ­ການ​ຕາມ​ລະ­ບຽບ​ກົດ­ໝາຍ​ຂອງ ສປປ ລາວ.

6. ການ​ລົງ­ທະ­ບຽນ​ສາ­ມາດ​ດາວ​ໂຫຼດ​ແບບ​ຟອມ​ລົງ­ທະ­ບຽນ​ນຳ​ເວັບ​ໄຊ www.medialaos.com ຫຼື ເອົາ​ຢູ່​ກົມ​ສື່​ມວນ​ຊົນ ແລະ ສາ­ມາດ​ສົ່ງ​ຟອມ​ລົງ­ທະ­ບຽນ​ເຂົ້າ​ທາງ​ອີ​ເມວ: [email protected]

7. ແຈ້ງ​ການ​ສະ­ບັບ​ນີ້​ປ່ຽນ​ແທນ​ແຈ້ງ​ການ​ເລກ​ທີ 256/ຖວ​ທ ລົງ​ວັນ​ທີ 12 ກໍ­ລະ­ກົດ 2019 ກ່ຽວ​ກັບ​ການ​ສ້າງ­ຕັ້ງ​ໜ້າ​ຂ່າວ (Social Media) ເພື່ອ​ສະ­ໜອງ​ຂ່າວ­ສານ​ຮັບ​ໃຊ້​ສັງ­ຄົມ.

ຍຸກ​ປັດ­ຈຸ­ບັນ​ແມ່ນ​ຍຸກ​ເຊື່ອມ​ໂຍງ​ສາ­ກົນ ແລະ ພາກ​ພື້ນ ສະ­ນັ້ນ ທຸກໆ​ການ​ພົວ­ພັນ​ໃນ​ໂລກ ເປັນ­ຕົ້ນ ແມ່ນ​ການ​ພົວ­ພັນ​ທາງ​ດ້ານ​ເສດ­ຖະ­ກິດ-ສັງ ຄົມ ຂໍ້​ມູນ​ຂ່າວ­ສານ​ຕ່າງໆ​ລ້ວນ​ແຕ່​ຖືກ​ຫັນ​ເປັນ​ກົດ­ໝາຍ ເປັນ​ນິ­ຕິ​ກຳ​ລຸ່ມ​ກົດ­ໝາຍ.

ການ​ປົກ­ຄອງ​ລັດ​ດ້ວຍ​ກົດ­ໝາຍ​ແມ່ນ​ການ​ປົກ­ຄອງ​ທີ່​ດີ ກ້າວ­ໜ້າ ແລະ ເປັນ​ວິ­ທະ­ຍາ­ສາດ ເພາະ​ກົດ­ໝາຍ​ເປັນ​ພາ­ຫະ­ນະ​ຕົ້ນ­ຕໍ​ເພື່ອ​ດັດ​ປັບ ການ​ພົວ­ພັນ​ສັງ­ຄົມ ປົກ​ປ້ອງ​ສິດ ແລະ ຜົນ​ປະ ໂຫຍດ​ອັນ​ຊອບ​ທຳ​ຂອງ​ພົນ­ລະ­ເມືອງ ແລະ ສະ ກັດ​ກັ້ນ​ການ​ລ່ວງ​ລະ­ເມີດ​ກົດ­ໝາຍ ກໍ​ຄື ລະ­ບຽບ​ການ​ຕ່າງໆ​ຂອງ​ລັດ.

ສະ­ເໜີ​ຂໍ້​ມູນ​ນີ້​ແມ່ນ​ເພື່ອ​ໃຫ້​ຜູ້​ທີ່​ເຮັດ​ໜ້າ­ທີ່​ບໍ­ລິ­ການ​ຂ່າວ ແລະ ສະ­ໜອງ​ຂໍ້​ມູນ​ໃນ​ສື່​ອອນ​ລາຍ​ໄດ້​ເຂົ້າ­ໃຈ ແລະ ຮີບ​ຮ້ອນ​ໄປ​ລົງ­ທະ­ບຽນ ເຊິ່ງ​ເລື່ອງ​ລົງ­ທະ­ບຽນ​ນີ້​ເຂົາ​ເຮັດ​ທົ່ວ​ໂລກ ບໍ່​ແມ່ນ​ແຕ່​ບ້ານ​ເມືອງ​ເຮົາ​ເນີ !.

ໄປ​ສາ​ຖ້າ​ບໍ່​ຢາກ​ປວດ​ຫົວ.

ໂດຍ: ແນວ​ລາວ

error: Content is protected !!