ການແຂ່ງຂັນບານເຕະນັດຊີງຊະນະເລີດ ລາຍການຄອມມານໂດ ແອວເອັບເອັບຄັບ 2020 ຈັດຂຶ້ນວັນທີ 31 ຕຸລາ 2020 ຢູ່ສະໜາມກີລາແຫ່ງຊາດ ໃຫ້ກຽດເຂົ້າຮ່ວມ ແລະ ມອບລາງວັນຂອງທ່ານ ວີເພັດ ສີຫາຈັກ ປະທານສະຫະພັນບານເຕະແຫ່ງຊາດລາວ (ສຕລ) ມີຮອງປະທານ ສຕລ ພ້ອມຄະນະບໍລິຫານງານ ຄະນະນຳ ຄູເຝິກ ແລະ ນັກກີລາ ຕະຫຼອດກອງເຊຍເຂົ້າຮ່ວມເກືອບ 2.000 ຄົນ.
ສຳລັບການແຂ່ງຂັນນັດຊີງຊະນະເລີດເປັນການມາພົບກັນ ລະຫວ່າງສະໂມສອນຊ້າງນ້ອຍ ເອັຟຊີ ທີມອັນດັບທີ 3 ຈາກ ລາວລີກ 1 ພົບກັບສະໂມສອນເມືອງຫາດ ຢູໄນເຕັດ ທີມອັນດັບທີ 3 ຈາກລາວລີກ 2 ຜ່ານການແຂ່ງຂັນຜົນປາກົດວ່າ: ສະໂມສອນຊ້າງນ້ອຍ ອອກນຳໄປກ່ອນ 1-0 ຈາກການຍິງຂອງ ທາກູມຸ ໃນນາທີ 7 ແຕ່ໃນນາທີ 88 ເມືອງຫາດ ຕີສະເໝີໄດ້ສຳເລັດ ຈາກການຍິງຂອງ ກິຕ້າ ສີສະຫວາດ ແຕ່ທ້າຍ ເກມ ທາກູມຸ ກາຍເປັນຮີໂຣຍິງ ປະຕູໄຊຊ່ວຍໃຫ້ຊ້າງນ້ອຍຄອງ ແຊັມລາຍການນີ້ໄປຄອງ ພ້ອມຮັບເງິນລາງວັນ 30 ລ້ານກີບ ສ່ວນເມືອງຫາດໄດ້ຮັບລາງວັນທີ 2 ພ້ອມເງິນລາງວັນ 20 ລ້ານກີບ.
ນອກນັ້ນຍັງມີລາງວັນນັກເຕະດີເດັ່ນຕົກເປັນຂອງ ທາກູມຸ ຈາກສະໂມສອນຊ້າງນ້ອຍ ນັກເຕະຍິງປະຕູສູງສຸດ ກິຕ້າ ສີສະຫວາດ ສະໂມສອນເມືອງຫາດ ຍິງໄດ້ 7 ປະຕູ ຜູ້ຮັກສາປະຕູດີເດັ່ນ ໄຊນະຄອນ ດາລາແສນ ຈາກສະໂມສອນເມືອງຫາດ ແລະ ຄູເຝິກດີເດັ່ນ ທ່ານ ອຳໄພວັນ ຈັນທະລາວົງ ຈາກສະໂມສອນເມືອງຫາດ.
ລາຍການນີ້ເລີ່ມດຳເນີນການແຂ່ງຂັນວັນທີ 19 ກັນຍາ ແລະ ສຳເລັດວັນທີ 31 ຕຸລາ 2020 ເຊິ່ງໄດ້ມີການຄັດເລືອກທີມຈາກລາຍການຄອມມານໂດລາວລີກ 2 ຈຳນວນ 13 ສະໂມສອນແຂ່ງຂັນໃນຮອບຄັດເລືອກ ເພື່ອເລືອກເອົາ 8 ສະໂມສອນຜ່ານ ເຂົ້າໄປຫຼິ້ນໃນຮອບ 16 ທີມສຸດ ທ້າຍກັບບັນດາສະໂມສອນທີ່ຮ່ວມລາຍການເປບຊີລາວລີກ 1.