ກາແດງລາວ ຊ່ວຍປັບປຸງຊີວິດການເປັນຢູ່ຂອງປະຊາຊົນເຂດນໍ້າຖໍ້ວມ ເມືອງສະໜາມໄຊ

    ເປັນ​ເວ­ລາ​ກວ່າ 2 ປີ​ແລ້ວ ທີ່​ປະ­ຊາ­ຊົນ​ຫຼາຍ​ບ້ານ​ຂອງ​ເມືອງ​ສະ­ໜາມ​ໄຊ ແຂວງ​ອັດ​ຕະ​ປື ພະ­ຍາ­ຍາມ​ທີ່​ຈະ​ບໍ່​ຄິດ​ຫວນ​ຄືນ​ພາບ​ແຫ່ງ​ຄວາມ​ສູນ​ເສຍ​ຕໍ່​ຊີ­ວິດ ແລະ ຊັບ​ສິນ​ຕ່າງໆ ຈາກ​ເຫດ­ການ​ສັນ​ອ່າງ­ເກັບ­ນ້ຳ​ເຂື່ອນ​ເຊ​ປຽນ-ເຊ​ນ້ຳ​ນ້ອຍ​ແຕກ ໃນ​ວັນ​ທີ 23 ກໍ­ລະ­ກົດ 2018 ປັດ­ຈຸ­ບັນ ປະ­ຊາ­ຊົນ​ສ່ວນ​ໃຫຍ່​ໄດ້​ຕັ້ງ­ໜ້າ​ທຳ​ມາ​ຫາ​ກິນ ເຮັດ​ການ​ຜະ­ລິດ ປູກ­ຝັງ-ລ້ຽງ­ສັດ​ຢ່າງ​ເປັນ​ຂະ​ບວນ ເພື່ອ​ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ຕົນ​ໃຫ້​ດີ​ຂຶ້ນ ຕາມ​ແນວ­ທາງ​ນະ­ໂຍ­ບາຍ​ຂອງ​ພັກ ແລະ ລັດ­ຖະ­ບານ ກໍ​ຄື​ອຳ­ນາດ​ການ​ປົກ­ຄອງ​ທ້ອງ­ຖິ່ນ​ວາງ​ອອກ.

    ສະ­ເພາະ​ໂຄງ­ການ​ຟື້ນ​ຟູ​ໄພ­ພິ­ບັດ​ຢູ່​ເມືອງ​ສະ­ໜາມ​ໄຊ ອົງ­ການ​ກາ­ແດງ​ລາວ​ໄດ້​ຊ່ວຍ​ປັບ­ປຸງ​ຊີ­ວິດ​ການ​ເປັນ​ຢູ່ ຂອງ​ຜູ້​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ໃຫ້​ດີ​ຂຶ້ນ ໂດຍ​ການ​ມອບ​ເງິນ ແລະ ອຸ­ປະ­ກອນ​ໃຫ້​ບ້ານ​ເປົ້າ​ໝາຍ​ຂອງ​ໂຄງ­ການ 864 ຄອບ­ຄົວ ໃນ 12 ບ້ານ ຄື: ທ່າ​ອວນ ປິນ​ດົງ ຕະ​ມໍ​ຢອດ ຫີນ​ລາດ ດອນ​ບົກ ດອນ​ມ່ວງ ໂຄກ​ກ່ອງ ຫາດ​ອຸ­ດົມ​ໄຊ ສົ້ມ­ປ່ອຍ ຫາດ​ຍາວ ຕະ​ເຫງົ້າ ແລະ ຫີນ​ສົມ­ບັດ ເພື່ອ​ສ້ອມ­ແປງ​ເຮືອນ ເປັນ​ທຶນ​ໃນ​ການ​ລ້ຽງ­ສັດ ຄ້າ-ຂາຍ­ຍ່ອຍ ເຊິ່ງ​ອົງ­ການ​ກາ­ແດງ​ລາວ ໄດ້​ຮັບ​ທຶນ​ສະ­ໜັບ­ສະ­ໜູນ​ຈາກ​ສະ­ຫະ­ພັນ​ກາ­ແດງ​ສາ­ກົນ ມູນ​ຄ່າ 2,2 ຕື້​ກວ່າ​ກີບ.

    ທ່ານ ຄຳ​ບອນ ອ່ອນ​ດາ​ລິນ ນາຍ­ບ້ານ​ຕະ​ມໍ​ຢອດ ກ່າວ​ວ່າ: ບ້ານ​ຕະ​ມໍ​ຢອດ ເປັນ​ບ້ານ​ໜຶ່ງ​ທີ່​ໄດ້​ຮັບ​ຜົນ​ກະ­ທົບ​ໜັກ ຈາກ​ເຫດ­ການ​ສັນ​ອ່າງ­ເກັບ­ນ້ຳ​ເຂື່ອນ​ເຊ​ປຽນ-ເຊ​ນ້ຳ​ນ້ອຍ​ແຕກ ເຊິ່ງ​ໄລ­ຍະ​ນັ້ນ ພັກ ແລະ ລັດ­ຖະ­ບານ ໄດ້​ສຸມ​ໃສ່​ການ​ຊ່ວຍ­ເຫຼືອ​ຜູ້​ປະ­ສົບ​ໄພ​ເປັນ​ແຕ່​ລະ​ໄລ­ຍະ ເພື່ອ​ເລັ່ງ​ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ເຂົາ­ເຈົ້າ​ໃຫ້​ດີ​ຂຶ້ນ ໂດຍ​ສະ­ເພາະ​ອົງ­ການ​ກາ­ແດງ​ລາວ ນອກ­ຈາກ​ໄດ້​ນຳ​ເຄື່ອງ​ຊ່ວຍ­ເຫຼືອ​ມາ​ມອບ​ເພື່ອ​ຊ່ວຍ­ເຫຼືອ​ບັນ­ເທົາ​ທຸກ ໃນ​ໄລ­ຍະ​ນ້ຳ​ຖ້ວມ​ແລ້ວ ຍັງ​ມີ​ໂຄງ­ການ​ສືບ­ຕໍ່​ຊ່ວຍ­ເຫຼືອ​ຜູ້​ປະ­ສົບ​ໄພ​ຕື່ມ​ອີກ ສະ­ເພາະ​ບ້ານ​ຕະ​ມໍ​ຢອດ ມີ 116 ຫຼັງ­ຄາ​ເຮືອນ 480 ກວ່າ​ຄອບ­ຄົວ ທີ່​ໄດ້​ຮັບ​ການ​ຊ່ວຍ­ເຫຼືອ​ສ້າງ​ຫ້ອງ​ນ້ຳ ທຶນ​ລ້ຽງ­ສັດ ແລະ ສ້ອມ­ແປງ​ເຮືອນ ເຊິ່ງ​ໄດ້​ເຮັດ​ໃຫ້​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ດີ​ຂຶ້ນ ຮັບ­ປະ­ກັນ​ດ້ານ​ສຸ​ຂະ​ອະ­ນາ­ໄມ ແລະ ຄວາມ​ເຂັ້ມ­ແຂງ​ດ້ານ​ສະ­ບຽງ​ອາ­ຫານ​ຫຼາຍ​ຂຶ້ນ.

ຕິດຕໍ່ພວກເຮົາ