ອົດສະຕຣາລີ ໃຫ້ການຊ່ວຍເຫຼືອວັກຊິນແກ່ ສປປ ລາວ

    ວັນທີ  12 ພຶດສະພາ 2021 ທີ່ທຳນຽບປະທານປະເທດ ທ່ານ ນາງ ປານີ ຢາທໍ່ຕູ້ ຮອງປະທານປະເທດແຫ່ງ ສປປ ລາວ ໄດ້ຮັບຕ້ອນການເຂົ້າຢ້ຽມຄໍານັບຂອງທ່ານ ໂພລ ແຄລີ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງອົດສະຕຣາລີປະຈໍາ ສປປ ລາວ ໃນໂອກາດພິທີປະກາດການຊ່ວຍເຫຼືອຢາວັກຊິນ ແລະ ການຊ່ວຍເຫຼືອດ້ານວິຊາການຕ່າງໆ ມູນຄ່າ 15,2 ລ້ານໂດລາອົດສະຕຣາລີ ຈາກລັດຖະບານອົດສະຕຣາລີ ໃຫ້ແກ່ ສປປ ລາວ  ເພື່ອເປັນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງປະເທດ ລາວ ແລະ ອົດສະຕຣາລີໃຫ້ນັບມື້ດີຂື້ນເລື້ອຍໆ.

    ໃນໂອກາດດັ່ງກ່າວ ທ່ານ ນາງ ປານີ ຢາທໍ່ຕູ້ ໄດ້ຕີລາຄາສູງຕໍ່ສາຍພົວພັນມິດຕະພາບອັນຍາວນານ ແລະ ການຮ່ວມມືອັນດີງາມຕະຫຼອດໄລຍະເວລາ 69 ປີທີ່ຜ່ານມາ ນັບຕັ້ງແຕ່ສອງປະເທດໄດ້ສ້າງຕັ້ງສາຍພົວພັນການທູດນໍາກັນ     ໃນວັນທີ 15 ມັງກອນ 1952 ເປັນຕົ້ນ ການຊ່ວຍເຫຼືອເພື່ອການພັດທະນາ (ODA) ການພັດທະນາຊັບພະຍາກອນມະນຸດ ກະສິກຳ UXO ການຄ້າ-ການລົງທຶນ ແລະ ອື່ນໆ. ພິເສດ ໃນປີ 2022 ສປປ ລາວ  ແລະ  ອົດສະຕຣາລີ ຈະຮ່ວມກັນສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 70 ປີ ແລະ ຫວັງວ່າສອງຝ່າຍຈະຮ່ວມກັນສະເຫຼີມສະຫຼອງວັນສຳຄັນດັ່ງກ່າວຢ່າງມີບັນຍາກາດ ແລະ ມີຄວາມໝາຍ ພ້ອມນີ້ ທ່ານ ນາງ ປານີ ຢາທໍ່ຕູ້ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ແລະ ຂອບໃຈຢ່າງເລິກເຊິ່ງ ຕໍ່ລັດຖະບານ ແລະ ປະຊາຊົນອົດສະຕຣາລີ ທີ່ໄດ້ໃຫ້ການສະໜັບສະໜູນຊ່ວຍເຫຼືອ ສປປ ລາວ ຕະຫຼອດມາ ໂດຍສະເພາະ ການຊ່ວຍເຫຼືອເພີ່ມຕື່ມຢາວັກຊິນໃນຄັ້ງນີ້ ຈະປະກອບສ່ວນອັນສໍາຄັນໃຫ້ແກ່ຄວາມພະຍາຍາມຂອງລັດຖະບານລາວ ໃນການຈັດຕັ້ງປະຕິບັດການສັກຢາວັກຊິນແກ່ປະຊາຊົນລາວໃຫ້ຫຼາຍຂື້ນໃນຂອບເຂດທົ່ວປະເທດ ກໍຄືສືບຕໍ່ຊ່ວຍເຫຼືອໃນການຟື້ນຟູຜົນກະທົບທາງດ້ານເສດຖະກິດ-ສັງຄົມ ຈາກການແຜ່ລະບາດຂອງເຊື້ອພະຍາດໂຄວິດ-19 ຢູ່ ສປປ ລາວ ແລະ ສະແດງຄວາມຊົມເຊີຍລັດຖະບານອົດສະຕຣາລີ ຕໍ່ໝາກຜົນສໍາເລັດທີ່ຍາດມາໄດ້ໃນການປ້ອງກັນ ແລະ ຄວບຄຸມພະຍາດດັ່ງກ່າວໃນໄລຍະຜ່ານມາ.  

    ທ່ານ ໂພລ ແຄລີ ໄດ້ກ່າວວ່າ: ອົດສະຕຣາລີມີຄວາມຍິນດີທີ່ໄດ້ໃຫ້ຊ່ວຍເຫຼືອຢາວັກຊິນໃຫ້ແກ່ປະຊາຊົນລາວ ເຊິ່ງເປັນບຸລິມະສິດທີ່ສໍາຄັນ ແລະ ຮີບດ່ວນຂອງລັດຖະບານອົດສະຕຣາລີ ການຊ່ວຍເຫຼືອຄັ້ງນີ້ ຈະສະໜອງຢາວັກຊິນຈໍານວນ 1 ລ້ານໂດສ ການຝຶກອົບຮົມໃຫ້ແກ່ແພດໝໍ ໃນວຽກງານການບໍລິຫານການສັກວັກຊິນທີ່ປອດໄພ ແລະ ການຊ່ວຍເຫຼືອດ້ານວິຊາການຈາກສະຖາບັນການຄຸ້ມຄອງດ້ານສຸຂະພາບທີ່ມີຊື່ສຽງຂອງອົດສະຕຣາລີ. ການປະກອບສ່ວນໃນຄັ້ງນີ້ ຈະຊ່ວຍໃຫ້ລັດຖະບານລາວສາມາດເພີ່ມອັດຕາສ່ວນຂອງພົນລະເມືອງລາວທີ່ຈະໄດ້ຮັບການສັກວັກຊິນປ້ອງກັນຫຼາຍຂື້ນກວ່າເກົ່າ ພ້ອມທັງຈະໃຫ້ການສະໜັບສະໜູນຄວາມປອດໄພດ້ານສຸຂະພາບໃຫ້ແກ່ ສປປ ລາວ ໃນໄລຍະຍາວ.

    ການຊ່ວຍເຫຼືອຢາວັກຊິນຂອງອົດສະຕຣາລີໃນຄັ້ງນີ້  ແມ່ນການຊ່ວຍເຫຼືອເພີ່ມຈາກເບື້ອງຕົ້ນຈໍານວນ 4,8 ລ້ານໂດລາອົດສະຕຣາລີ ເພື່ອນໍາໃຊ້ເຂົ້າໃນວຽກງານແກ້ໄຂຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19 ທີ່ກຳລັງຈັດຕັ້ງປະຕິບັດຢູ່ປັດຈຸບັນ. 

    ນອກຈາກນີ້ ລັດຖະບານອົດສະຕຣາລີ ຍັງໄດ້ປະກອບສ່ວນທຶນຈຳນວນຫຼາຍເຂົ້າ ໃນໂຄງການ ໂຄແວັກສ (COVAX) ເຊິ່ງຈະຊ່ວຍເພີ່ມຈໍານວນການສັກຢາວັກຊິນໃຫ້ແກ່ປະຊາຊົນລາວໃຫ້ກວມກວ່າ 20% ໂດຍບໍ່ເສຍຄ່າໃຊ້ຈ່າຍ.

# ຂ່າວ & ພາບ : ລັດເວລາ

error: Content is protected !!