ມື້ນີ້ ພົບຜູ້ຕິດເຊື້ອໂຄວິດ-19 ໃໝ່ໃນຊຸມຊົນ 34 ກໍລະນີ

    ທ່ານນາງ ລັດສະໝິ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ແລະ ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ຕາງໜ້າກອງເລຂາຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໄດ້ຖະແຫຼງຂ່າວກ່ຽວກັບສະພາບການການລະບາດຂອງພະຍາດ COVID-19 ປະຈຳວັນທີ 12 ພຶດສະພາ 2021 ທີ່ກະຊວງສາທາລະນະສຸກ.

    ທ່ານນາງ ລັດສະໝິ ວົງຄຳຊາວ ຖະແຫຼງໃຫ້ຮູ້ວ່າ: ໃນວັນທີ 11 ພຶດສະພາ ໄດ້ເກັບຕົວຢ່າງມາກວດວິເຄາະ 4.985 ຕົວຢ່າງ ພົບຜູ້ຕິດເຊື້ອໃໝ່ 55 ຄົນ ປັດຈຸບັນ ສປປ ລາວ ມີຜູ້ຕິດເຊື້ອທັງໝົດ 1.417 ຄົນ ເສຍຊີວິດ 1 ຄົນ ໄດ້ຮັບການປິ່ນປົວຫາຍດີທັງໝົດ 328 ຄົນ ຍັງນອນຕິດຕາມປິ່ນປົວຢູ່ສະຖານທີ່ຄະນະສະເພາະກິດກຳນົດໄວ້ໃນຕ່ລະແຂວງ 1.088 ຄົນ.

    ສຳລັບຜູ້ຕິດເຊື້ອໃໝ່ທັງ 55 ຄົນໃນມື້ນີ້ ໃນນີ້ ຢູ່ນະຄອນຫຼວງວຽງຈັນ 9 ຄົນ ຈຳປາສັກ 21 ຄົນ ບໍ່ແກ້ວ 25 ຄົນ ເຊິ່ງຈຳນວນ 21 ຄົນທີ່ຕິດເຊື້ອຢູ່ແຂວງຈຳປາສັກ ແມ່ນກໍລະນີນຳເຂົ້າຈາກຕ່າງປະເທດ ແລະ 34 ກໍລະນີແມ່ນຕິດເຊື້ອໃນຊຸມຊົນທີ່ພົວພັນກັບຜູ້ຕິດເຊື້ອຜ່ານມາ ພາຍຫຼັງກວດພົບຜູ້ຕິດເຊື້ອໃໝ່ ພວກເຮົາໄດ້ລົງສອບສວນ ສອບຖາມປະຫວັດ ຕິດຕາມຜູ້ສຳຜັດໃກ້ຊິດ ແລະ ປະຫວັດການເຄື່ອນໄຫວຂອງພວກກ່ຽວ ພາຍຫຼັງໄດ້ຂໍ້ມູນລະອຽດ ຈະແຈ້ງທາມລາຍໃຫ້ຮັບຊາບຕື່ມອີກ.

    ສະພາບການລະບາດຂອງພະຍາດ COVID-19 ຢູ່ໃນໂລກ ຮອດປັດຈຸບັນ ທົ່ວໂລກມີການລາຍງານການຕົວເລກຜູ້ຕິດເຊື້ອສະສົມທັງໝົດ 160.299.036 ຄົນ ເສຍຊິວິດສະສົມ 3.330.092 ຄົນ ແລະ ປີ່ນປົວຫາຍດີ 139.017.840 ຄົນ ປະເທດທີ່ມີຜູ້ຕິດເຊື້ອ ແລະ ເສຍຊິວິດຫຼາຍກວ່າໝູ່ໃນໂລກແມ່ນ ສະຫະລັດອາເມຣິກາ ອິນເດຍ ບຣາຊິນ ແລະ ຝຣັ່ງ.

.

# ຂ່າວ & ພາບ : ອົ່ນ ໄຟສົມທອງ

error: Content is protected !!