ຍີ່ປຸ່ນ ສະໜອງອຸປະກອນນຳໃຊ້ວຽກງານຕ້ານພະຍາດໂຄວິດໃຫ້ແກ່ລາວ

     ພິທີມອບ-ຮັບ ຊຸດປ້ອງກັນ (PPEs) ແລະ ອຸປະກອນນຳໃຊ້ວຽກງານຕ້ານພະຍາດໂຄວິດ-19 ທີ່ໄດ້ຮັບການຊ່ວຍເຫຼືອຈາກລັດຖະບານຍີ່ປຸ່ນ ຈັດຂຶ້ນວັນທີ 9 ມິຖຸນາ 2021 ທີ່ກະຊວງສາທາລະນະສຸກ ກ່າວມອບໂດຍທ່ານ ທາເກວະກະ ເຄໂຊ ເອກອັກຄະລາຊະທູດຍີ່ປຸ່ນປະຈຳລາວ ແລະ ຮັບໂດຍທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ  ມີທ່ານ ມາກ ເຈຄອບ ຫົວໜ້າອົງການອະນາໄມໂລກປະຈໍາລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

       ສໍາລັບອຸປະກອບທີ່ມອບຄັ້ງນີ້ມີ ຊຸດປ້ອງກັນ 20.000 ຊຸດ ໜ້າກາກ N95 8.000 ອັນ ແວ່ນຕາປ້ອງກັນ 1.250 ຊຸດ ແລະ ຖົງມືການແພດ 50.000 ຄູ່ ເຊິ່ງອຸປະກອນດັ່ງກ່າວ ແມ່ນຈັດຊື້ຈາກມູນນິທິອາຊີ-ເອີຣົບ (ASEF) ທີ່ໃຫ້ທຶນໂດຍລັດຖະບານຍີ່ປຸ່ນ ແລະ ໄດ້ຖືກສົ່ງມາຈາກປະເທດສິງກະໂປມາເຖິງນະຄອນຫຼວງວຽງຈັນ ໂດຍຜ່ານການປະສານງານກັບອົງການອະນາໄມໂລກຈຳປະລາວ ແລະ  ຫ້ອງການປາຊີຟິກຕາເວັນຕົກ (WPR) ການສະໜອງຊຸດປ້ອງກັນຈາກຍີ່ປຸ່ນຄັ້ງນີ້ ແມ່ນເປັນຄັ້ງທີສອງ ໃນນັ້ນ ເທື່ອທຳອິດແມ່ນຖືກຈັດສົ່ງໃນເດືອນກຸມພາ ປີ 2020 ທີ່ຜ່ານມາ.

     ທ່ານ ທາເກວະກະ ກ່າວວ່າ: “ຂ້າພະເຈົ້າຄາດຫວັງ ວ່າອຸປະກອນເຫຼົ່ານີ້ຈະເປັນປະໂຫຍດໃຫ້ແກ່ການຕໍ່ສູ້ກັບພະຍາດໂຄວິດ-19 ຢູ່ໃນທົ່ວປະເທດລາວບໍ່ໜ້ອຍກໍຫຼາຍ  ບໍ່ວ່າຍາມໃດ ປະເທດຍີ່ປຸ່ນໄດ້ຮ່ວມຄຽງຂ້າງກັບປະເທດລາວຕໍ່ສູ້ກັບພະຍາດໂຄວິດ-19 ສະເໝີມາ ການຊ່ວຍເຫຼືອໃນຄັ້ງນີ້ ຈະເຮັດໃຫ້ຄວາມສຳພັນໃນການເປັນຄູ່ມືທາງຍຸດທະສາດ ແລະ ການສ້າງຕັ້ງຄວາມສຳພັນທາງການທູດຄົບຮອບ 65 ປີໃນປີຜ່ານມານີ້ ມີຄວາມເຂັ້ມແຂງຍິ່ງຂຶ້ນກວ່າເກົ່າ”.

      ໃນວັນທີ 2 ມິຖຸນາທີ່ຜ່ານມານີ້ ທ່ານນາຍົກລັດຖະມົນຕີ ຊຸງະ ໂຢຊິຮິເດະ ໄດ້ປະກາດໃນກອງປະຊຸມກົນໄກການແບ່ງປັນວັກຊີນຂອງໂຄແວັກວ່າ: ຈະສະໜັບສະໜູນເງິນເພີ່ມອີກ 800 ລ້ານໂດລາສະຫະລັດ ເຊິ່ງລວມມີມູນຄ່າການຊ່ວຍເຫຼືອທັງໝົດເປັນ 1 ຕື້ໂດລາສະຫະລັດ ໃຫ້ແກ່ໂຄງການໂຄແວັກ ເພື່ອສະໜອງວັກຊີນໃຫ້ແກ່ປະເທດກຳລັງພັດທະນາ ລວມທັງປະເທດລາວອີກດ້ວຍ.

     ນອກນັ້ນ ປະເທດຍີ່ປຸ່ນກຳລັງດຳເນີນການຊ່ວຍເຫຼືອໃນການຍົກລະດັບລະບົບຄວາມເຢັນພິເສດໂດຍການມອບຕູ້ແຊ່ ແລະ ຕູ້ເຢັນເພື່ອນຳໃຊ້ເຂົ້າໃນການເກັບຮັກສາວັກຊີນ ເປັນມູນຄ່າ 1,8 ລ້ານໂດລາສະຫະລັດ ໃຫ້ແກ່ປະເທດລາວຕື່ມອີກ.

# ຂ່າວ & ພາບ: ລັດເວລາ

error: Content is protected !!