ວັນນີ້ ນວ ມີຜູ້ຕິດເຊື້ອໂຄວິດ-19 ໃນຊຸມຊົນເພີ່ມອີກ 2 ກໍລະນີ

    ທ່ານ ດຣ ສີສະຫວາດ ສຸດທະນີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຖະແຫຼງວັນທີ 10 ມິຖຸນາ 2021 ທີ່ກະຊວງສາທາລະນະສຸກວ່າ  ວັນທີ 9 ມິຖຸນາ 2021 ໄດ້ເກັບຕົວຢ່າງມາກວດວິເຄາະທັງໝົດ 1.410 ຕົວຢ່າງ ກວດພົບຜູ້ຕິດເຊື້ອທັງໝົດ 4 ກໍລະນີ ໃນນີ້ ຢູ່ນະຄອນຫຼວງວຽງຈັນ (ນວ) 2 ກໍລະນີ ຈຳປາສັກ 2 ສຳລັບຢູ່ ນວ 2 ກໍລະນີ ເປັນກໍລະນີຕິດເຊື້ອໃນຊຸມຊົນ ໂດຍຕິດເຊື້ອຈາກການສຳຜັດໃກ້ຊິດກັບຜູ້ຕິດເຊື້ອເກົ່າ. 

    ປັດຈຸບັນ ທົ່ວປະເທດມີຜູ້ຕິດເຊື້ອສະສົມ 1.975 ກໍລະນີ (ໃໝ່ 4) ເສຍຊີວິດສະສົມ 3 ກໍລະນີ ປິ່ນປົວຫາຍດີສະສົມ 1.807 ກໍລະນີ ກຳລັງປິ່ນປົວ 165 ກໍລະນີ ສຳລັບຄົນເຈັບທີ່ທີ່ປະກາດຕາມຫາໃນວັນທີ 9 ມິຖຸນາ ແມ່ນພົບຜູ້ກ່ຽວແລ້ວ ເນື່ອງຈາກວ່າຜູ້ກ່ຽວມີອາການບໍ່ສະບາຍຫຼາຍ ເລີຍຂາດການຕິດຕໍ່ໃນເບື້ອງຕົ້ນ ຕອນນີ້ ຄົນເຈັບເຂົ້າມາປິ່ນປົວຢູ່ໂຮງໝໍແລ້ວ ເຊິ່ງຄົນເຈັບເປັນເພດຊາຍ ອາຍຸ 57 ປີ ຢູ່ບ້ານໜອງສະໂນຄຳ ເມືອງສີໂຄດຕະບອງ ອາຊີບນັກແປພາສາ ມີຜູ້ໃກ້ຊິດກັບຜູ້ກ່ຽວ 2 ຄົນ ໄດ້ກວດຫາເຊື້ອ (1 ຄົນແມ່ນຜົນກວດເປັນບວກ ແລະ ອີກ 1 ຄົນແມ່ນນຳໄປຈຳກັດບໍລິເວນເພື່ອຕິດຕາມອາການ) ແລະ ຜູ້ຕິດເຊື້ອອີກ 1 ຄົນແມ່ນຕິດຢູ່ຫ້ອງແຖວບ້ານຕານມີໄຊ ອາໄສຢູ່ກັບຜູ້ຕິດເຊື້ອເກົ່າຜ່ານມາ.

# ຂ່າວ-ພາບ : ອົ່ນ ໄຟສົມທອງ

error: Content is protected !!