ຮອງນາຍົກ ກວດກາໂຄງການກໍ່ສ້າງເສັ້ນທາງລົດໄຟລາວ-ຈີນ ແລະ ສະຖານີລົດໄຟລາວ-ໄທ ຕອນທີ 2

    ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍລັດຖະມົນຕີ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ກະຊວງການເງິນ ກະຊວງພະລັງງານ ແລະ ບໍ່ແຮ່ ແລະ ທ່ານ ພູຂົງ ບັນນະວົງ ຮອງເຈົ້າຄອງນະຄອນຫຼວງວຽງຈັນ ພ້ອມຄະນະ ໄດ້ເຄື່ອນໄຫວຢ້ຽມຢາມກວດກາໂຄງການເສັ້ນທາງລົດໄຟລາວ-ຈີນ ຈຸດສະຖານີນະຄອນຫຼວງວຽງຈັນ ບ້ານໂຄກສະອາດ ເມືອງໄຊທານີ ທີ່ເປັນຈຸດເຊື່ອມຕໍ່ໃສ່ທາງດ່ວນວຽງຈັນໝາຍເລກ 1 (ໄປຕາມເສັ້ນທາງເລກທີ 13 ໃຕ້) ວັນທີ 10 ມິຖຸນາ 2021 ຖືກຕ້ອນຮັບຈາກທ່ານ ສ່ຽວ ຊ່ຽນ ເຫວິນ ອໍານວຍການໃຫຍ່ບໍລິສັດເສັ້ນທາງລົດໄຟລາວ-ຈີນ ພ້ອມຄະນະ. 

    ການລົງເຄື່ອນໄຫວຄັ້ງນີ້ ໄດ້ຢ້ຽມຊົມສະຖານທີ່ກໍ່ສ້າງສະຖານີນະຄອນຫຼວງວຽງຈັນ ເຊິ່ງທ່ານ ສ່ຽວ ຊ່ຽນ ເຫວິນ ໄດ້ລາຍງານໃຫ້ຮູ້ວ່າ: ຈຸດສະຖານີດັ່ງກ່າວ ມີເນື້ອທີ່ທັງໝົດ 15.000 ຕາແມັດ ໃນນີ້ ໄດ້ເລີ່ມລົງມືກໍ່ສ້າງແຕ່ເດືອນກໍລະກົດ 2020 ເປັນຕົ້ນມາ ໂດຍຮູບແບບການກໍ່ສ້າງ ເປັນໂຄງເຫຼັກທີ່ມີນໍ້າໜັກ 700 ກວ່າໂຕນ ພ້ອມນັ້ນ ໄດ້ມີການຈັດສັນເປັນແຕ່ລະເຂດ ເພື່ອອໍານວຍຄວາມສະດວກໃຫ້ແກ່ລູກຄ້າທີ່ໄປໃຊ້ບໍລິການມີຄວາມສະດວກສະບາຍ ໂດຍສະເພາະ ສະຖານທີ່ຈອດລົດໄດ້ແບ່ງເປັນ 2 ເຂດຄື: ສະຖານທີ່ຈອດລົດເມ ຈອດໄດ້ 20 ຄັນ ແລະ ລົດທົ່ວໄປຈອດໄດ້ 40 ຄັນ ເຊິ່ງຕະຫຼອດໄລຍະການກໍ່ສ້າງ ບໍລິສັດໄດ້ພົບຂໍ້ຫຍຸ້ງຍາກ ເປັນຕົ້ນ ການນໍາເຂົ້າວິຊາການສະເພາະ ດ້ານການນໍາເຂົ້າພະນັກງານ ແລະ ວັດສະດຸ ກົນຈັກຮັບໃຊ້ໃຫ້ແກ່ໂຄງການຊັກຊ້າ ເນື່ອງຈາກວ່າໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19 ເຖິງຢ່າງໃດກໍຕາມ ບໍລິສັດກໍໄດ້ເອົາໃຈໃສ່ສຸມທຸກກໍາລັງເພື່ອເຮັດໃຫ້ໂຄງການສໍາເລັດຕາມແຜນການທີ່ວາງໄວ້ ມາຮອດປັດຈຸບັນການກໍ່ສ້າງສະຖານີດັ່ງກ່າວສໍາເລັດແລ້ວ 70% ແລະ ກໍາລັງຢູ່ໃນໄລຍະການຕົບແຕ່ງພາຍໃນ ຄາດວ່າຈະໃຫ້ສໍາເລັດໃນເດືອນກັນຍາ 2021. 

    ຈາກນັ້ນ ທ່ານ ສອນໄຊ ສີພັນດອນ ພ້ອມຄະນະ ຍັງໄດ້ຢ້ຽມຢາມສະຖານີສິນຄ້າວຽງຈັນໃຕ້ ເຊື່ຶອມຕໍ່ລາງ 1,435 ແມັດ ແລະ ລາງ 1 ແມັດ ທ່ານາແລ້ງ ແລະ ເຂດໂລຈິສຕິກ ແລະ ຢ້ຽມຢາມໂຄງການກໍ່ສ້າງສະຖານີລົດໄຟລາວ-ໄທ ຕອນທີ 2 ແຕ່ທ່ານາແລ້ງ ຫາ ສະຖານີວຽງຈັນ ບ້ານ ຄຳສະຫວາດ ເມືອງໄຊເສດຖາ ທີ່ມີຄວາມຍາວ 7,5 ກິໂລແມັດ ຕື່ມອີກ

# ຂ່າວ-ພາບ :  ຂັນທະວີ

error: Content is protected !!