ລາວ ໂທລະຄົມມະນາຄົມ ມອບອຸປະກອນ VDO Conference ໃຫ້ກະຊວງ ຮສສ

    ວັນທີ 10 ມິຖຸນາ 2021 ຢູ່ກະຊວງແຮງງານ ແລະ ສະຫວັດດີການ-ສັງຄົມ (ຮສສ) ໄດ້ມີພິທີມອບ-ຮັບ VDO Conference ພ້ອມອຸປະກອນຄົບຊຸດ ຈຳນວນ 1 ຊຸດ ມູນຄ່າ 57.442.000 ກີບ ຈາກບໍລິສັດ ລາວ ໂທລະຄົມມະນາຄົມ ມະຫາຊົນ ໃຫ້ແກ່ກະຊວງ ຮສສ ເພື່ອນຳໃຊ້ເຂົ້າໃນວຽກງານວິຊາສະເພາະ ເປັນຕົ້ນແມ່ນການປະຊຸມທາງໄກແບບ Online ກັບບັນດາກະຊວງ ກົມ-ກອງ ບັນດາແຂວງຕ່າງໆພາຍໃນປະເທດ ແລະ ອົງການຈັດຕັ້ງສາກົນ ໃຫ້ມີຄວາມສະດວກສະບາຍ ວ່ອງໄວ ແລະ ທັນສະພາບການ ໂດຍສະເພາະແມ່ນການນຳໃຊ້ໃນວຽກງານປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແລະ ຜົນກະທົບຈາກພະຍາດດັ່ງກ່າວ.  

    ເປັນກຽດກ່າວມອບເຄື່ອງຈຳນວນດັ່ງກ່າວນີ້ ໂດຍທ່ານ ສຸພົນຈັນ ທະວີໄຊ ຜູ້ອຳນວຍການໃຫຍ່ບໍລິສັດ ລາວ ໂທລະຄົມມະນາຄົມ ມະຫາຊົນ ແລະ ກ່າວຮັບໂດຍທ່ານ ນາງ ຄຳໃບ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ມີພາກສ່ວນທີ່ກ່ຽວຂ້ອງສອງຝ່າຍເຂົ້າຮ່ວມ. ໂອກາດນີ້ ທ່ານລັດຖະມົນຕີກະຊວງແຮງງານ ແລະ ສະຫວັດດີການ-ສັງຄົມ ກໍໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈ ພ້ອມທັງຕີລາຄາສູງຕໍ່ການປະກອບສ່ວນຂອງບໍລິສັດ ລາວ ໂທລະຄົມມະນາຄົມ ມະຫາຊົນ ໃນຄັ້ງນີ້ ເຊິ່ງແມ່ນເຕັກໂນໂລຊີທີ່ທັນສະໄໝ ແລະ ມີຄວາມຈຳເປັນຫຼາຍ ໃນສະພາບການຂອງວຽກງານກະຊວງໃນປັດຈຸບັນ.

# ຂ່າວ-ພາບ :  ຊິລິການດາ

error: Content is protected !!