ລັດຖະມົນຕີກະຊວງ ຮສສ ເຂົ້າຮ່ວມກອງປະຊຸມສະມັດຊາໃຫຍ່ຂອງອົງການແຮງງານສາກົນ

    ໃນວັນທີ 8 ມິຖຸນາ 2021 ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຂອງ ສປປ ລາວ ພ້ອມຄະນະ ເຂົ້າຮ່ວມກອງປະຊຸມສະມັດຊາໃຫຍ່ຂອງອົງການແຮງງານສາກົນ ສະໄໝທີ 109 ປະຈຳປີ 2021 ແລະ ກອງປະຊຸມປິ່ນອອ້ມຕ່າງໆ ທີ່ໄດ້ຈັດຂຶ້ນລະຫວ່າງ 3-19 ມິຖຸນາ 2021 ທີ່ເມືອງເຈນີວາ ປະເທດສະວິດ ພາຍໃຕ້ຫົວຂໍ້: “ ການຮັບມືກັບການແຜ່ລະບາດຂອງເຊື້ອພະຍາດໂຄວິດ-19 ຂອງລັດຖະບານ ເພື່ອປົກປ້ອງຜູ້ອອກແຮງງານ ແລະ ຜູ້ໃຊ້ແຮງງານຢູ່ ສປປ ລາວ” ດ້ວຍຮູບແບບກອງປະຊຸມທາງໄກ ໂດຍເປັນປະທານຂອງທ່ານ ໂອມາ ຊະໄນເບີ (Omar ZNIBER) ເອກອັກຄະລັດຖະທູດວິສາມັນຜູ້ມີອຳນາດເຕັມ ຜູ້ຕາງໜ້າຖາວອນຂອງປະເທດໂມລ໋ອກໂກ ປະຈໍາອົງການສະຫະປະຊາຊາດ ແລະ ອົງການຈັດຕັ້ງສາກົນທີ່ເຊີແນວ ແລະ ມີຜູ້ແທນຈາກບັນດາປະເທດສະມາຊິກອົງການແຮງງານສາກົນ ຈຳນວນ 3.856 ທ່ານ ໃນ 176 ປະເທດເຂົ້າຮວ່ມ.

    ກອງປະຊຸມຄັ້ງນີ້ ພາຍໃຕ້ການຜັນຂະຫຍາຍເນື້ອໃນຂອງຖະແຫຼງການອົງການແຮງງານສາກົນ ຕໍ່ກັບຄວາມຍຸຕິທໍາທາງສັງຄົມ ເພື່ອຄວາມເປັນທຳຂອງໂລກາພິວັດ ກອງປະຊຸມສະມັດຊາໃຫຍ່ອົງການແຮງງານສາກົນ ຄັ້ງທີ 109 ດັ່ງກ່າວ ມີກອງປະຊຸມປຶກສາຫາລືລະດັບວິຊາການຈຳນວນໜຶ່ງປິ່ນອອ້ມ ແລະ ຮັບຮອງເອກະສານຈຳນວນ 4 ເອກະສານ ຄື: 

  1. ເອກະສານບົດລາຍງານການເງິນ 
  2. ເອກະສານບົດລາຍງານຄວາມຄືບໜ້າການຈັດຕັ້ງປະຕິບັດສົນທິສັນຍາຂອງອົງການແຮງງານສາກົນ 
  3. ເອກະສານການຮັບຮອງເອົາບົດລາຍງານການປຶກສາຫາລືກ່ຽວກັບການຮັບມືກັບການແຜ່ລະບາດຂອງເຊື້ອພະຍາດໂຄວິດ-19 ແລະ ບົດລາຍງານການປຶກສາຫາລືກ່ຽວກັບປະກັນສັງຄົມ 
  4. ເອກະສານການລົບລ້າງບັນດາສົນທິສັນຍາ ຈຳນວນ 8 ສະບັບ ການຖອດຖອນສົນທິສັນຍາ ຈຳນວນ 9 ສະບັບ ແລະ ຖອດຖອນຂໍ້ແນະນໍາ ຈໍານວນ 11 ສະບັບ.

    ກອງປະຊຸມໃນຄັ້ງນີ້ ທ່ານ ນາງ ໃບຄຳ ຂັດທິຍະ ຕາງໜ້າຄະນະຜູ້ແທນແຫ່ງ ສປປ ລາວ ໄດ້ກ່າວປະກອບຄວາມເຫັນ ເຊິ່ງມີບາງຕອນທີ່ສຳຄັນວ່າ: “ ການແຜ່ລະບາດຂອງພະຍາດໂຄວິດ-19 ໄດ້ກະທົບຕໍ່ການດຳລົງຊີວິດ ແລະ ການພັດທະນາເສດຖະກິດ-ສັງຄົມຂອງທົ່ວໂລກ ໂດຍສະເພາະແມ່ນສະເຖຍລະພາບຂອງການເຮັດວຽກ ແລະ ລາຍຮັບຂອງກໍາລັງແຮງງານ ສຳລັບ ສປປ ລາວ ໂຄວິດ 19 ໄດ້ເຮັດໃຫ້ກໍາລັງແຮງງານທີ່ເຮັດວຽກຢູ່ພາຍໃນປະເທດຈຳນວນ 114 ພັນຄົນ ຖືກໂຈະການຈ້າງງານຊົ່ວຄາວ ແລະ 130 ພັນຄົນ ຕ້ອງໄດ້ກັບຈາກການເຮັດວຽກຢູ່ຕ່າງປະເທດ ນອກນັ້ນ ກໍຍັງມີແຮງງານນອກລະບົບຈຳນວນຫຼາຍໄດ້ຮັບຜົນກະທົບ ເພື່ອແກ້ໄຂບັນຫາດັ່ງກ່າວ ລັດຖະບານໄດ້ປະຕິບັດມາດຕະການໃນການຊ່ວຍເຫຼືອຜູ້ອອກແຮງງານ ແລະ ຜູ້ລົງທຶນທີ່ໄດ້ຮັບຜົນກະທົບ ເຊັ່ນ: ກຳນົດນະໂຍບາຍຍົກເວັ້້ນອາກອນເງິນເດືອນ ຫຼຸດຜ່ອນ ຫຼື ເລື່ອນເວລາການຈ່າຍພັນທະຕ່າງໆຂອງຜູ້ລົງທຶນ ລວມທັງການຈ່າຍເງີນສົມທົບເຂົ້າກອງທຶນປະກັນສັງຄົມ ພ້ອມນີ້ ລັດຖະບານໄດ້ອະນຸຍາດຈ່າຍເງິນອຸດໜູນການວ່າງງານໃຫ້ສະມາຊິກກອງທຶນເປັນກໍລະນີພິເສດ ເຊິ່ງໄດ້ຈ່າຍທັງໝົດ 38,18 ຕື້ກີບ ຫຼື ປະມານ 4 ລ້ານໂດລາສະຫະລັດ” ພ້ອມນັ້ນ ທ່ານ ລັດຖະມົນຕີຍັງໄດ້ສະແດງຄວາມຂອບໃຈຕໍ່ກັບການສະໜັບສະໜູນຂອງບັນດາອົງການຈັດຕັ້ງສາກົນ ແລະ ປະເທດສະມາຊິກ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ໃນການຮັບມືກັບການແຜ່ລະບາດຂອງພະຍາດໂຄວິດ-19 ພ້ອມທັງໄດ້ຮຽກຮ້ອງໃຫ້ອົງການແຮງງານສາກົນ ແລະ ບັນດາທ່ານຜູ້ແທນກອງປະຊຸມໃຫຍ່ ຄັ້ງທີ 109 ຈົ່ງພະຍາຍາມເຮັດໃຫ້ມາດຕະການການຮັບມືກັບພະຍາດໂຄວິດ-19 ທີ່ກອງປະຊຸມໄດ້ຄົ້ນຄ້ວາ ຈົ່ງໄດ້ບັນຈຸເນື້ອໃນທີ່ຄົບຖ້ວນ ເພື່ອເຮັດໃຫ້ເກີດມີການຮ່ວມມື ມີການຊ່ວຍເຫຼືອທີ່ມີປະສິດທິພາບ ໃນລະດັບພາກພື້ນ ແລະ ສາກົນ ໂດຍສະເພາະແມ່ນຢາກໃຫ້ເບີ່ງຊ່ວຍເຫຼືອປະເທດສະມາຊິກທີ່ຍັງຂາດຊັບພະຍາກອນໃນການຮັບມືກັບບັນຫາທີ່ຮ້າຍແຮງດັ່ງກ່າວໃຫ້ຫຼຸດພົ້ນຈາກວິກິດການໄປພ້ອມໆກັນ.

# ຂ່າວ-ພາບ :  ບຸນມີ ສີວິໄລ

error: Content is protected !!