ກະຊວງ ຖວທ ປະກາດພະນັກງານການນໍາຂັ້ນສູງອອກພັກການ-ຮັບອຸດໜູນບໍານານ

     ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ (ຖວທ) ຈັດພິທີປະກາດພະນັກງານການນໍາຂັ້ນສູງອອກພັກການ-ຮັບອຸດໜູນບໍານານ ວັນທີ 10 ມິຖຸນາ 2021 ທີ່ຫໍວັດທະນະທໍາແຫ່ງຊາດ ໂດຍມີທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ ພ້ອມດ້ວຍຕາງໜ້າຈາກບັນດາກົມອ້ອມຂ້າງກະຊວງ ຖວທ ເຂົ້າຮ່ວມ.

    ທ່ານ ສີອຳພອນ ຈັນລາຕີ ຕາງໜ້າຈາກຄະນະຈັດຕັ້ງສູນກາງພັກ ໄດ້ຂຶ້ນຜ່ານສອງດຳລັດຂອງ ນາຍົກລັດ ຖະມົນຕີ ວ່າດ້ວຍການອະນຸມັດໃຫ້ພະນັກງານການນຳຂັ້ນສູງອອກພັກການ-ຮັບອຸດໜູນບໍານານ ຄື: ດຳລັດສະບັບເລກທີ 260 ລົງວັນ ທີ 1 ເມສາ 2021 ອະນຸມັດໃຫ້ທ່ານ ບົວເງິນ ຊາພູວົງ ຮອງລັດຖະມົນຕີກະຊວງ ຖວທ ອອກພັກການ-ຮັບອຸດໜູນບໍານານ ແລະ ດຳລັດສະບັບເລກທີ 300 ລົງວັນທີ 26 ເມສາ 2021 ອະນຸມັດໃຫ້ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງ ຖວທ ອອກພັກການ-ຮັບອຸດໜູນບໍານານ. ພ້ອມນີ້ ທ່ານ ລືໄຊ ສິນທະວົງ ຮອງຫົວໜ້າກົມຈັດຕັ້ງ ກະຊວງ ຖວທ ໄດ້ຂຶ້ນຜ່ານດຳລັດຂອງນາຍົກລັດຖະມົນຕີ ສະບັບເລກທີ 309 ລົງວັນທີ 11 ພຶດສະພາ 2021 ອະນຸມັດໃຫ້ທ່ານ ທອງໃບ ໂພທິສານ ຫົວໜ້າກົມມໍລະດົກ ອອກພັກການ-ຮັບອຸດໜູນບໍານານ.

    ໃນໂອກາດນີ້ ທ່ານນາງ ສວນສະຫວັນ ວິຍະເກດ ໄດ້ໃຫ້ກຽດໂອ້ລົມ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ທັງ 3 ທ່ານທີ່ອອກພັກການ-ຮັບອຸດໜູນບໍານານໃນຄັ້ງນີ້ ເຊີ່ງເວົ້າໄດ້ວ່າເປັນຮຸ່ນບຸກເບີກໃນວຽກງານຖະແຫຼງຂ່າວ ວັດທະນະທໍາ ແລະ ທ່ອງທ່ຽວໃນໄລຍະໃໝ່ຂອງລາວເຮົາ ພວກທ່ານດັ່ງກ່າວ ໄດ້ເອົາໃຈໃສ່ປະຕິບັດໜ້າທີ່ຂອງຕົນຕາມທີ່ພັກ ແລະ ລັດຖະບານມອບໝາຍໃຫ້ຢ່າງໄດ້ຮັບຜົນສຳເລັດ ແລະ ປະກອບສ່ວນສໍາຄັນ ເຮັດໃຫ້ວຽກງານຖະແຫລງຂ່າວ ວັດທະນະທຳ ແລະ ທ່ອງທ່ຽວຂອງລາວ ໄດ້ຮັບການພັດທະນານັບມື້ເຕີບໃຫຍ່ ຂະຫຍາຍຕົວຢ່າງຕໍ່ເນື່ອງ ເຊີ່ງກາຍເປັນບົດຮຽນສຳຄັນໃຫ້ແກ່ຄົນຮຸ່ນໃໝ່ໄດ້ສືບທອດ ແລະ ຮໍ່າຮຽນເອົາເປັນແບບຢ່າງ.

# ຂ່າວ-ພາບ :  ໄຊບັນດິດ

error: Content is protected !!