ລັດ ​ແລະ ​ເອກະ​ຊົນ ຮ່ວມ​ມືຜະລິດຕະພັນຈາກພືດທີ່ເປັນຢາ

         ພິທີເຊັນບົດບັນທຶກຄວາມເຂົ້າໃຈ ສ້າງອາຄານຫ້ອງທົດລອງ ເພື່ອສຶກສາ ຄົ້ນຄວ້າ ວິໄຈ ແລະ ຢັ້ງຢືນຄຸນນະພາບພືດທີ່ເປັນຢາຂອງລາວ ລະຫວ່າງສະຖາບັນການແພດ ແລະ ການຢາພື້ນເມືອງ ກະຊວງສາທາລະນະສຸກ ແລະ ບໍລິສັດ ຄອລທີວາ ຈຳກັດ ຈັດຂຶ້ນວັນທີ 10 ມິຖຸນາ 2021 ທີ່ກະຊວງສາທາລະນະສຸກ ຮ່ວມລົງນາມລະຫວ່ງທ່ານ ບຸນເລື່ອນ ດວງເດືອນ ຫົວໜ້າສະຖາບັນການແພດ ແລະ ການຢາ ພື້ນເມືອງ  ແລະ ທ່ານ ພອນສະຫວັນ ອາເລັກຟາມ ປະທານບໍລິສັດ ຄອລທີວາ ຈຳກັດ ມີທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ທ່ານ ສົມພັນ ແພງຄຳມີ ອະດີດຮອງປະທານສະພາແຫ່ງຊາດ ທ່ານ ບຸນກອງ ສີຫາວົງ ອະດີດລັດຖະມົນຕີກະຊວງສາທາລະນະສຸກ ແລະ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.

    ການເຊັນບົນທຶກກັນຄັ້ງນີ້ ສອງຝ່າຍ​ໄດ້ສ້າງອາຄານຫ້ອງທົດລອງ ສຶກສາ ຄົ້ນຄວ້າ ວິໄຈ ປະກອບອຸປະກອນເຄື່ອງມືທີ່ທັນສະໄໝຄົບວົງຈອນ ລວມທັງຊອບແວ ແລະ ໄອທີຕ່າງໆ ສຳລັບການສຶກສາຄົ້ນຄວ້າ ວິໄຈ ແລະ ໃຫ້ສາມາດເຄື່ອນໄຫວໄດ້ຢ່າງເປັນປົກກະຕິໃນແຕ່ລະໄລຍະ ພ້ອມທັງສ້າງເງື່ອນໄຂໃນການປູກ ການສະກັດ ການຂະຫຍາຍແນວພັນ ເພື່ອສ້າງໃຫ້ເປັນເສດຖະກິດໃຫ້ແກ່ໂຄງການ  ​ເຊິ່ງອາຄານກວ້າງ 8 ແມັດ ແລະ ຍາວ 20 ແມັດ ເປັນອາຄານ 3 ຊັ້ນ  ສ້າງອາຄານຫ້ອງທົດລອງໃຫ້ໄດ້ມາດຕະຖານຂອງພາກພື້ນ ແລະ ສາກົນ ຈັດຫາພື້ນທີ່ປູກແນວພັນພືດທີ່ເປັນຢາ ເຊິ່ງໂຄງການມີອາຍຸການຮ່ວມມືກັນ 20 ປີ ໂດຍບໍ່ນັບໄລຍະເວລາຂອງການກໍ່ສ້າງອາຄານຫ້ອງທົດລອງ 2 ປີ ​ແລະ ມີ​ງົບປະມານ​ນຳ​ໃຊ້​ເຂົ້າ​ໃນ​ໂຄງການ 20 ລ້ານ​ໂດ​ລາ​ສະຫະລັດ.

 # ຂ່າວ & ພາບ:  ສົມສະຫວັນ

error: Content is protected !!