ແຂວງຫຼວງພະບາງ ຈະປຸກລະດົມການບໍລິຈາກເລືອດໃຫ້ບັນລຸ 4.800 ຖົງ

    ສູນເລືອດ ຂອງອົງການກາແດງລາວແຂວງຫຼວງພະບາງ ໄດ້ຮ່ວມກັບຄະນະບໍລິຫານງານຊາວໜຸ່ມແຂວງ ສະຫະພັນແມ່ຍິງແຂວງ ແລະ ການຈັດຕັ້ງຂັ້ນຕ່າງໆ ດຳເນີນການປຸກລະດົມ ແລະ ຈັດພິທີຮັບບໍ ລິຈາກເລືອດ ໃນປີ 2020 ໄດ້ຫຼາຍກວ່າ 197 ຄັ້ງ ມີຜູ້ເຂົ້າຮ່ວມບໍລິຈາກເລືອດ 12.895 ຄົນ ໃນນີ້ ໄດ້ຮັບເລືອດຕົວຈິງ 4.587 ຖົງ ລື່ນຄາດໝາຍຂອງແຜນການທີ່ວາງໄວ້.

    ທ່ານ ດຣ ວຽງສະຫັວນ ກະເສີມສຸກ ຫົວໜ້າອົງການກາແດງລາວ ປະຈຳແຂວງຫຼວງພະບາງ ໃຫ້ສຳພາດເມື່ອບໍ່ດົນມານີ້ວ່າ: ໃນປີຜ່ານມາ ຈຳນວນຜູ້ບໍລິຈາກເລືອດແບບສະໝັກໃຈ ກວມເອົາ 90% ຂອງການບໍລິຈາກເລືອດທັງໝົດ ສຳລັບປີ 2021 ຄາດໝາຍສູ້ຊົນການປຸກລະດົມ ແລະ ຈັດຫາເລືອດ ຈະໃຫ້ບັນລຸ 4.800 ຖົງ   ໃນໂອກາດວັນທີ 14 ມິຖຸນາ ວັນຜູ້ບໍລິຈາກເລືອດໂລກຈະໄດ້ໜູນວຽນມາອີກເທື່ອໜຶ່ງ ຂໍສະແດງຄວາມຮູ້ບຸນຄຸນ ແລະ ຂອບໃຈຢ່າງສູງມາຍັງບຸກຄົນ ກໍຄືການຈັດຕັ້ງທີ່ໄດ້ປະກອບສ່ວນໃນຂະບວນການບໍລິຈາກເລືອດຢ່າງຕັ້ງໜ້າ ທັງເຮັດການປຸກລະດົມ ເຊີນຊວນ ແລະ ປະກອບສ່ວນດ້ານວັດຖຸປັດໄຈ ເຂົ້າໃນກິດຈະກຳສະເຫຼີມສະຫຼອງວັນຜູ້ບໍລິຈາກເລືອດແຕ່ລະປີ.

    ສຳລັບກິດຈະກຳສະເຫຼີມສະຫຼອງວັນຜູ້ບໍລິຈາກເລືອດໂລກປີນີ້ ເນື່ອງຈາກມີການລະບາດຂອງພະ ຍາດໂຄວິດ-19 ສູນເລືອດຂອງອົງການກາແດງລາວແຂວງຫຼວງພະບາງ ຈະຈັດຮັບພິທີບໍລິຈາກເລືອດແບບເປີດກວ້າງ ຢູ່ຫ້ອງການຄະນະບໍລິຫານງານຊາວໜຸ່ມແຂວງ ວັນທີ 14 ມິຖຸນາ 2021 ໂດຍປະຕິບັດມາດຕະການຂອງຄະນະສະເພາະກິດວາງອອກ ເປັນຕົ້ນ ການໃສ່ຜ້າອັດປາກ-ດັງ ລ້າງມືດ້ວຍນ້ຳສະອາດ ຫຼື ເຈວລ້າງມື ແລະ ການປະຕິບັດໄລຍະຫ່າງ ເຊິ່ງຈະມີອາສາສະໝັກຊາວໜຸ່ມ ອາສາສະໝັກກູ້ໄພ ຖ້າໃຫ້ຄໍາແນະນໍາ ແລະ ຊ່ວຍເຫຼືອຜູ້ທີ່ຮ່ວມບໍລິຈາກເລືອດພາຍໃນພິທີຕື່ມອີກ.

# ຂ່າວ & ພາບ:  ສະບາໄພ

error: Content is protected !!