ປະກາດຮອງລັດຖະມົນຕີກະຊວງ ຊສ ພັກການ-ຮັບອູດໜູນບຳນານ

    ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ (ຊສ) ຈັດພິທີປະກາດພະນັກງານການນຳອອກພັກການ-ຮັບອູດໜູນບຳນານ ວັນທີ 11 ມິຖຸນາ 2021 ທີ່ກະຊວງຂອງຕົນ ເປັນກຽດເຂົ້າຮ່ວມຂອງທ່ານນາງ ບຸນຄຳ ວໍລະຈິດ ລັດຖະມົນຕີກະຊວງ ຊສ ພ້ອມດ້ວຍຮອງລັດຖະມົນຕີ ຫົວໜ້າກົມ ຮອງກົມ.

    ໃນພິທີ ໄດ້ຮັບຟັງການຜ່ານລັດຖະດຳລັດຂອງປະທານປະເທດ ວ່າດ້ວຍການປະດັບຫຼຽນໄຊແຮງງານ ຫຼຽນກາ ແລະ ດຳລັດຂອງນາຍົກລັດຖະມົນຕີ ວ່າດ້ວຍການມອບໃບຍ້ອງຍໍຂັ້ນລັດຖະມົນຕີ ໃຫ້ຜູ້ທີ່ມີຜົນງານດີເດັ່ນໃນການປະກອບສ່ວນເຂົ້າໃນວຽກງານໄລຍະຜ່ານມາ ເຊິ່ງມີຫຼຽນໄຊແຮງງານຊັ້ນ II ຈຳນວນ 39 ທ່ານ ແລະ III ມີ 17 ທ່ານ ຫຼຽນກາແຮງງານ 14 ທ່ານ ໃບຍ້ອງຍໍຂັ້ນລັດຖະບານ 20 ທ່ານ ຂັ້ນກະຊວງ 67 ທ່ານ ແລະ 3 ກົມກອງ ເປັນກຽດມອບໂດຍທ່ານນາງ ບຸນຄຳ ວໍລະຈິດ.

    ນອກຈາກນີ້ ທ່ານ ສຸລິຍາ ພົມມິສິດ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກໄດ້ຜ່ານດຳລັດຂອງລັດຖະມົນຕີວ່າດ້ວຍການອະນຸມັດໃຫ້ພະນັກງານການນຳຂັ້ນສູງອອກພັກການ-ຮັບອູດໜູນບຳນານ ໂດຍອະນຸມັດໃຫ້ທ່ານ ບຸນມີ ພຸດທະວົງ ຮອງລັດຖະມົນຕີກະຊວງ ຊສ ອາຍຸກະສຽນ 65 ປີ ອາຍຸການ 46 ປີ ອອກພັກການ-ຮັບອູດໜູນບຳນານ.

    ໂອກາດນີ້ ທ່ານນາງ ບຸນຄຳ ວໍລະຈິດ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງທ່ານ ບຸນມີ ພຸດທະວົງ ທີ່ໄດ້ປະກອບສ່ວນຢ່າງຕັ້ງໜ້າ ໃນການຊີ້ນຳ-ນຳພາ ພ້ອມທັງແກ້ໄຂບັນຫາຕ່າງໆທີ່ເກີດຂຶ້ນໃນຂົງເຂດວຽກງານທີ່ຕົນຮັບຜິດໄດ້ຢ່າງສຳເລັດ ເຊິ່ງບັນດາຜົນງານດັ່ງກ່າວ  ໄດ້ສະແດງເຖິງຜົນສຳເລັດອັນໃຫຍ່ຫຼວງ  ທີ່ພັກ-ລັດມອບ ໝາຍໃຫ້ ສະນັ້ນ ໃນນາມທີ່ເປັນການຳຮຸ້ນສືບທອດຈະນຳເອົາຜົນງານ ແລະ ບົດຮຽນຂອງທ່ານມາຈັດຕັ້ງປະຕິບັດ ແລະ ຊີ້ນຳ-ນຳພາອ້າຍນ້ອງພະນັກງານໃຫ້ໄດ້ຮັບຜົນສຳເລັດ ເປັນຕົ້ນແມ່ນການປະຕິບັດພາລະບົດບາດ ວິຊາສະເພາະ ການແກ້ໄຂບັນຫາທີ່ຈະເກີດຂຶ້ນໃນຕໍ່ໜ້າ ການເຕົ້າໂຮມຄວາມສາມັກຄີ ແບບແຜນວິທີເຮັດວຽກໃຫ້ມີຄວາມຊັດເຈນ ແລະ ອື່ນໆໃຫ້ໄດ້ຮັບຜົນສຳເລັດຕາມການມອບໝາຍຂອງພັກ-ລັດ ແລະ ຂໍໃຫ້ທ່ານສືບຕໍ່ຊີ້ນຳ-ນຳພາ ສະໜັບສະໜູນ ໃຫ້ຄຳປຶກສາຕະຫຼອດໄປ.

​                           # ຂ່າວ & ພາບ:  ອົ່ນ ໄຟສົມທອງ

error: Content is protected !!