ລຸກຊຳບວກສະໜັບສະໜູນເງິນ 11 ຕື້ກວ່າກີບ ແກ້ໄຂການແຜ່ລະບາດຂອງພະຍາດໂຄວິດ-19

    ລາຊະອານາຈັກແຫ່ງລຸກຊຳບວກ ສືບຕໍ່ເຮັດວຽກຄຽງຄູ່ກັບ ສປປ ລາວ ເຊິ່ງເປັນປະເທດຄູ່ຮ່ວມພັດທະນາ ເພື່ອສ້າງຄວາມເຂັ້ມແຂງລະດັບຊາດ ແລະ ເສີມສ້າງຄວາມອາດສາມາດ ໃນການກວດຊອກຫາ ການປະເມີນ ແລະ ການຕອບໂຕ້ຕໍ່ວິກິດການລະບາດຂອງພະຍາດໂຄວິດ-19 ທີ່ກຳລັງເກີດຂື້ນຢູ່ໃນສປປ ລາວ.

    ເພື່ອຮັບມືກັບການເພີ່ມຂື້ນຂອງເຊື້ອພະຍາດໂຄວິດ-19 ຫຼ້າສຸດ ລຸກຊຳບວກໄດ້ສະໜັບສະໜູນໃຫ້ການຊ່ວຍເຫຼືອໃນການຕອບໂຕ້ ໂດຍຜ່ານໂຄງການສະໜັບສະໜູນຂະແໜງສາທາລະນະສຸກ ລາວ-ລຸກຊຳບວກ ໄລຍະ 2 (ໂຄງການ ລາວ/027) ເຊິ່ງໄດ້ມອບເງິນເພີ່ມຕື່ມອີກຈຳນວນ 1.000.000 ເອີໂຣ ຫຼື ປະມານ 11.5 ຕື້ກີບ ເພື່ອນຳໃຊ້ເຂົ້າໃນການກວດຊອກຫາ ການຫຼຸດຜ່ອນ ແລະ ການປ້ອງກັນການແຜ່ລະບາດຂອງພະຍາດໂຄວິດ-19 ຢູ່ພາຍໃນປະເທດ.

    ພິທີມອບ-ຮັບເງິນຊ່ວຍເຫຼືອຢ່າງເປັນທາງການໃນຄັ້ງນີ້ ຈັດຂື້ນວັນທີ 10 ມິຖຸນາ 2021 ທີ່ກະຊວງສາທາລະນະສຸກ ໂດຍການເຂົ້າຮ່ວມ ແລະ ເປັນສັກຂີພະຍານຂອງທ່ານ ບຸນແຝງ ພຸມມະໄລສິດ ລັດຖະມົນຕີກະຊວງສາທາລະນະສຸກ ແລະ ທ່ານ Sam Schreiner ອຸປະທູດແຫ່ງລາຊະອານາຈັກລຸກຊຳບວກ ມີພະນັກງານຂັ້ນສູງຈາກບັນດາກົມຕ່າງໆຂອງກະຊວງ ຫົວໜ້າສູນວິເຄາະ ແລະ ລະບາດວິທະຍາ ຫົວໜ້າສະຖາບັນປັດສະເຕີລາວ ຕົວແທນຈາກສະຖານທູດລຸກຊຳບວກ ປະຈຳ ສປປ ລາວ ແລະ ຕົວແທນຈາກໂຄງການລາວ/027.

    ທ່ານ Sam Schreiner ໄດ້ຊົມເຊີຍຕໍ່ລັດຖະບານ ແລະ ປະຊາຊົນລາວ ໃນການແກ້ໄຂຈັດການກັບວິກິດທີ່ກຳລັງເກີດຂື້ນຢ່າງຕໍ່ເນື່ອງ ຖືວ່າປະສົບຜົນສຳເລັດເປັນສ່ວນໃຫ່ຍ ນອກນີ້ ຍັງໄດ້ກ່າວຕື່ມວ່າ:ການຕອບໂຕ້ ແລະ ການຮັບມືກັບພະຍາດໂຄວິດ-19 ທີ່ມີິປະສິດທິຜົນ ນອກຈາກການເລັ່ງສັກຢາວັກແຊງຢ່າງຮີບດ່ວນແລ້ວ ຍັງຕ້ອງມີກົນລະຍຸດການເຝົ້າລະວັງ ແລະ ຍຸດທະສາດໃນການກວດຊອກຫາເຊື້ອພະຍາດແບບຄົບຖ້ວນອີກ ໃນນີ້ ການຊ່ວຍເຫຼືອເພື່ອສ້າງຄວາມອາດສາມາດໃນການປະຕິບັດການໃນຫ້ອງທົດລອງແມ່ນມີຄວາມຈຳເປັນທີ່ສຸດ ເພື່ອຈະສາມາດຄົ້ນພົບ ແລະ ກວດຊອກຫາກໍລະນີທີ່ຕິດເຊື້ອໃຫ້ໄດ້ໄວທີ່ສຸດ ແລະ ຕອບໂຕ້ໃຫ້ທັນເວລາ ເພື່ອຄວບຄຸມການແຜ່ລະບາດຂອງພະຍາດ.

# ຂ່າວ & ພາບ: ຊິລິການດາ

error: Content is protected !!