ໃນວັນທີ 17 ມິຖຸນາ 2021 ທ່ານ ດຣ ກາວີພອນ ສຸດທິ ຫົວໜ້າກອງຊ່ວຍເຫຼືອບັນເທົາທຸກອົງການກາແດງລາວ ພ້ອມດ້ວຍຄະນະ ໄດ້ນຳເອົາເຄື່ອງຊ່ວຍເຫຼືອບັນເທົາທຸກເບື້ອງຕົ້ນ ມາມອບໃຫ້ແກ່ຄອບຄົວທີ່ປະສົບເຄາະຮ້າຍຈາກໄພພິບັດໄຟໄໝ້ເຮືອນທີ່ບ້ານດ່ານຄຳ ເມືອງສີໂຄດຕະບອງ ນະຄອນຫຼວງວຽງຈັນ.
ເຫດການໄຟໄໝ້ເຮືອນຂອງປະຊາຊົນຈຳນວນໜຶ່ງຢູ່ພາຍໃນບ້ານ ເຊິ່ງໄດ້ຮັບຜົນເສຍຫາຍທັງໝົດຈຳນວນ 3 ຄອບຄົວ ຈຳນວນ 14 ຄົນ ຍິງ 8 ຄົນ ຢູ່ພາຍໃນບ້ານດ່ານຄຳ ເມືອງສີໂຄດຕະບອງ ນວ ເຊິ່ງເປັນເຮືອນຂອງຄອບຄົວຂອງທ່ານ ບຸນປອນ ຄອບຄົວທ່ານ ສາຍຄຳ ແລະ ຄອບຄົວຂອງທ່ານ ນາງ ນ້ອຍ ເຊິ່ງເປັນເຮືອນວິນລາ ຊັ້ນເທິງເຮັດດ້ວຍໄມ້ ຊັ້ນລຸ່ມກໍ່ດ້ວຍຊີມັງ ຈຶ່ງໄດ້ເຮັດໃຫ້ໄຟໄໝ້ລາມຢ່າງໄວວາ ແລະ ເສຍຫາຍຢ່າງຫຼວງຫຼາຍ.
ເຄື່ອງທີ່ນຳມາຊ່ວຍເຫຼືອໃນຄັ້ງນີ້ ປະກອບມີ: ເຄື່ອງໃຊ້ພາຍໃນຄົວເຮືອນ ເຂົ້າຈ້າວ ນ້ຳດື່ມ ແຟັບ ສະບູ ໝີ່ສຳເລັດຮູບ ປ໋ອງປາ ສາດ ມຸ້ງ ຜ້າຫົ່ມ ແລະ ເຄື່ອງນຸ່ງປະສົມ ລວມມູນຄ່າ 3.162.000 ກີບ ມອບໂດຍທ່ານ ດຣ ກາວີພອນ ສຸດທິ ສ່ວນຜູ້ຮັບ ເປັນຄອບຄົວຜູ້ປະສົບໄພ ໂດຍມີອຳນາດການປົກຄອງບ້ານເຂົ້າຮ່ວມເປັນສັກຂີພິຍານ ເຄື່ອງຈຳນວນດັ່ງກ່າວ ໄດ້ຮັບການສະໜັບສະໜູນຈາກສັງຄົມ ແລະ ສະພາກາຊາດໄທ ຄະນະກຳມະການກາແດງສາກົນ ສະຫະພັນກາແດງ ແລະ ຊີກວົງເດືອນແດງສາກົນ.
# ຂ່າວ & ພາບ: ບຸນມີ