ທົ່ວເມືອງສິໂຄດຕະບອງ ມີນັກສອບເສັງຈົບຊັ້ນ ມ4 ທັງໝົດ 1.587 ຄົນ

    ວັນທີ 23 ກໍລະກົດ 2021 ທ່ານນາງ ຂັນທະລີ ສີຣິພົງພັນ ຮອງລັດຖະມົນຕີກະຊວງສຶກສາທິການ ແລະ ກີລາ ແລະ ທ່ານນາງ ຄຳຫວັນ ລາດຊະຂັນຕີ ຮອງຫົວໜ້າພະແນກສຶກສາທິການ ແລະ ກີລາ ນະຄອນຫຼວງວຽງຈັນ ໄດ້ລົງຕິດຕາມການສອບເສັງຈົບຊັ້ນມັດທະຍົມຕົ້ນ ມ4 ຢູ່ພາຍໃນເມືອງສີໂຄດຕະບອງ ນະຄອນຫຼວງວຽງຈັນ.

    ທ່ານ ມະນີຫົງ ຈັນທະວົງສາ ຫົວໜ້າຫ້ອງການສຶກສາທິການ ແລະ ກີລາ ເມືອງສີໂຄດຕະບອງ ໄດ້ລາຍງານສະພາບການກະກຽມສອບເສັງຈົບຊັ້ນມັດທະຍົມຕົ້ນ ມ4 ຂອງເມືອງສີໂຄດຕະບອງ ເຊິ່ງເມືອງສີໂຄດຕະບອງມີສູນສອບເສັງຈົບຊັ້ນ ມ4 ທັງໝົດ 11 ສູນ ມີໂຮງຮຽນທີ່ເຂົ້າຮ່ວມສອບເສັງທັງໝົດ 25 ແຫ່ງ ເອກະຊົນ 15 ແຫ່ງ ໃນນັ້ນ ມີໂຮງຮຽນສຶກສາພິເສດ 1 ແຫ່ງ ທີ່ມີນັກຮຽນພິການທາງສາຍຕາ ແລະ ນັກຮຽນທີ່ບົກຜ່ອງໃນການປາກເວົ້າ ແລະ ຟັງ ການສອບເສັງແມ່ນເລີ່ມແຕ່ວັນທີ 21-23 ກໍລະກົດ 2021 ທົ່ວເມືອງມີນັກສອບເສັງທັງໝົດ 1.587 ຄົນ ຍິງ 828 ຄົນ ໄດ້ຈັດແບ່ງເປັນ 104 ຫ້ອງສອບເສັງ ສະເລ່ຍນັກຮຽນ 15-16 ຄົນຕໍ່ຫ້ອງ (ນັ່ງຄົນດຽວ) ສູນສອບເສັງທີ່ມີນັກຮຽນຫຼາຍກວ່າໝູ່ ແມ່ນສູນ ມສ ຈັນສະຫວ່າງ ມີນັກສອບເສັງຈຳນວນ 284 ຄົນ ແລະ ໜ້ອຍກວ່າໝູ່ແມ່ນສູນ ມສ ແສງວິໄລ ຈຳນວນ 86 ຄົນ ກຳມະການຍາມຫ້ອງສອບເສັງທົ່ວເມືອງມີທັງໝົດ 230 ຄົນ ແລະ ກຳມະການກວດບົດມີ 54 ຄົນ.

    ສຳລັບວິຊາສອບເສັງຈົບຊັ້ນ ມ4 ປະຈຳສົກຮຽນ 2020-2021 ມີທັງໝົດ 6 ວິຊາຄື: ວິຊາພາສາລາວ-ວັນນະຄະດີ ວິຊາວິທະຍາສາດສັງຄົມ ວິຊາວິທະຍາສາດທຳມະຊາດ ວິຊາສຶກສາພົນລະເມືອງ ວິຊາຄະນິດສາດ ແລະ ວິຊາພາສາອັງກິດ.

.

# ຂ່າວ & ພາບ:  ຊິລິການດາ

error: Content is protected !!