8 ບ້ານຂອງເມືອງສັງທອງ ໄດ້ຮັບໂທລະໂຄ່ງຊ່ວຍເຫຼືອ

    ເພື່ອເປັນການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 66 ປີ ທີ່ຫາກໍຜ່ານພົ້ນໄປບໍ່ພໍທໍ່ໃດນີ້ ດັ່ງນັ້ນ ວັນທີ 27 ກໍລະກົດ 2021 ທີ່ສະໂມສອນເມືອງສັງທອງ ນະຄອນຫຼວງວຽງຈັນ ສະຫະພັນແມ່ຍິງນະຄອນຫຼວງວຽງຈັນ ໄດ້ນໍາເອົາໂທລະໂຄ່ງຈໍານວນ 8 ຊຸດ ແລະ ໂທລະພາບ 1 ເຄື່ອງ ມາມອບໃຫ້ບ້ານທີ່ຂາດເຂີນ 8 ບ້ານຄື: ບ້ານໃໝ່ປາກສັງ ບ້ານຫ້ວຍຕົມ ບ້ານໂຄກແຫ້ ບ້ານໄຮ່ໃຕ້ ບ້ານຫີນສິວ ບ້ານໜອງບົວ ບ້ານກົ້ວ ແລະ ບ້ານວັງມ້າ ສ່ວນໂທລະພາບ ແມ່ນມອບໃຫ້ໂຮງຮຽນປະຖົມບ້ານນາປໍ ລວມມູນຄ່າ 27.580.000 ກີບ.

    ໃຫ້ກຽດມອບໂດຍທ່ານ ນາງ ປິ່ນຄໍາ ວິລາພັນ ປະທານສະຫະພັນແມ່ຍິງນະຄອນຫຼວງວຽງຈັນ ແລະ ຮັບໂດຍທ່ານ ໄອສູນ ສະພັງທອງ ປະທານແນວລາວສ້າງຊາດເມືອງສັງທອງ ພ້ອມດ້ວຍພະນັກງານວິຊາການ ແລະ ອໍານາດການປົກຄອງບ້ານເຂົ້າຮ່ວມ.

    ອຸປະກອນດັ່ງກ່າວ ແມ່ນຈະນໍາໄປໂຄສະນາເຜີຍແຜ່ວຽກງານຂ່າວສານ ເພື່ອໃຫ້ປະຊາຊົນໄດ້ຮັບຮູ້ຢ່າງທົ່ວເຖິງ ໃນລະບຽບກົດໝາຍ ວຽກງານຂອງພັກ-ລັດ ແລະ ເພື່ອເປັນການເຜີຍແຜ່ ການຕ້ານ ແລະ ສະກັດກັ້ນການລະບາດຂອງພະຍາດໂຄວິດ-19 ທີ່ກໍາລັງລະບາດໃນປັດຈຸບັນນີ້.

# ຂ່າວ & ພາບ: ວຽງມາ

error: Content is protected !!