ອາເມຣິກາ ມອບອຸປະກອນດ້ານຄວາມປອດໄພແກ່ລາວ

    ທ່ານນາງ ຈອຍ ຊາກຸໄຣ ຮອງທູດ ສ ອາເມຣິກາ ປະຈຳ ສປປ ລາວ ແລະ ເຈົ້າໜ້າທີ່ຈາກກະຊວງການຕ່າງປະເທດຂອງ ສ ອາເມຣິກາ ໜ່ວຍງານຮັກສາຄວາມປອດໄພທາງການທູດ ມອບເຄື່ອງສະແກນໜັງສືເດີນທາງ (ATOM  ADR300 Document Readers) 30 ເຄື່ອງ ມູນຄ່າ 48.000 ໂດລາສະຫະລັດ ແກ່ທ່ານ ພັ.ທ ສຸວັນນະກອນ ສີພາມະວົງ ຮອງຫົວໜ້າກົມຕໍາຫຼວດກວດຄົນເຂົ້າ-ອອກເມືອງ ແລະ ຫົວໜ້າຄະນະຄຸ້ມຄອງດ່ານສະໜາມບິນສາກົນວັດໄຕ ກະຊວງປ້ອງກັນຄວາມສະຫງົບ ວັນທີ  26  ກໍລະກົດ 2021  ເຊິ່ງແມ່ນສ່ວນໜຶ່ງຂອງການສະໜັບສະໜູນຢ່າງຕໍ່ເນື່ອງຂອງ  ສ  ອາເມຣິກາ ໃນການບັງຄັບໃຊ້ກົດໝາຍລາວ ໃນການຕ້ານການກໍ່ອາຊະຍາກຳຂ້າມຊາດ. 

    ທ່ານນາງ ຈອຍ ຊາກຸໄຣ ກ່າວວ່າ: ພວກເຮົາມີຄວາມຍິນດີທີ່ໄດ້ມອບເຄື່ອງສະແກນໜັງສືເດີນທາງໃຫ້ກົມຕໍາຫຼວດກວດຄົນເຂົ້າ-ອອກເມືອງ ເຄື່ອງສະແກນນີ້ ຜະລິດໂດຍຜູ້ຊ່ຽວຊານ ເຊິ່ງມີແອັບພລີເຄຊັນໃນການນຳໃຊ້ງານເພື່ອລະບຸຕົວຕົນ ແລະ ຄວາມປອດໄພ ຖືກຊົມໃຊ້ຢ່າງກວ້າງຂວາງໃນຂະແໜງວຽກງານການບັງຄັບໃຊ້ກົດໝາຍ ລວມທັງທີ່ປະເທດ ສ ອາເມຣິກາ ເຄື່ອງມືທີທັນສະໄໝນີ້ ຈະຊ່ວຍຫຼຸດຜ່ອນຄ່າໃຊ້ຈ່າຍໃນການດໍາເນີນງານ ແລະ ເພີ່ມປະສິດທິຜົນຂອງວຽກງານຢູ່ດ່ານສາກົນຕ່າງໆທົ່ວ ສປປ ລາວ ເພີ່ມຄວາມສາມາດໃຫ້ການກວດຄົນເຂົ້າ-ອອກເມືອງ ໃນການກວດກາ ແລະ ກວດສອບເອກກະສານ ການປອມແປງເອກະສານທີ່ອາດເກີດຂຶ້ນ ພວກເຮົາຂໍຂອບໃຈ ແລະ ເຫັນຄວາມສຳຄັນຂອງກົມຕໍາຫຼວດກວດຄົນເຂົ້າ-ອອກເມືອງ ໃນການປ້ອງກັນຄວາມສະຫງົບຂອງ ສປປ ລາວ ຕາມຊາຍແດນ ແລະ ໝັ້ນໃຈວ່າເຄື່ອງສະແກນນີ້ ຈະສ້າງຜົນປະໂຫຍດໃຫ້ທັງກົມຕໍາຫຼວດກວດຄົນເຂົ້າ-ອອກເມືອງ ແລະ ປະຊາຊົນ ປີນີ້ແມ່ນປີແຫ່ງການສະເຫຼີມສະຫຼອງ ຄົບຮອບ 5 ປີ ສາຍພົວພັນແບບກວມລວມລະຫວ່າງ ສ ອາເມຣິກາ ແລະ ສປປ ລາວ ພວກເຮົາຫວັງຢ່າງຍິ່ງ ໃນການສືບຕໍ່ພັດທະນາສາຍພົວພັນໃຫ້ເຂັ້ມແຂງຂຶ້ນ ໃນການສົ່ງເສີມການເປີດກວ້າງອິນໂດປາຊີຟິກ.

# ຂ່າວ & ພາບ:  ສະບາໄພ

error: Content is protected !!