ຈະເປີດໃຫ້ບໍລິການສັກວັກຊິນ Johnson & Johnson ໃນຕົ້ນເດືອນໜ້ານີ້

    ທ່ານ ພອນປະສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາະນະສຸກ ໄດ້ລາຍງານສະພາບການຈັດຕັ້ງປະຕິບັດການໃຫ້ວັກຊິນປ້ອງກັນໂຄວິດ-19 ໃນວັນທີ 27 ກໍລະກົດ 2021 ໃຫ້ຮູ້ວ່າ ລັດຖະບານ ສປປ ລາວ ມີຄວາມມຸ່ງໝັ້ນເພື່ອຈະສັກວັກຊິນດັ່ງກ່າວໃຫ້ແກ່ພໍ່ແມ່ປະຊາຊົນລາວໃຫ້ໄດ້ 50% ໃນທ້າຍປີ 2021 ນີ້ ຂອງປະຊາຊກອນທີ່ມີອາຍຸ 18 ປີຂຶ້ນໄປ ເພື່ອສ້າງພູມຄຸ້ມກັນ ແລະ ຫຼຸດຜ່ອນການລະບາດພະ ຍາດໂຄວິດ-19 ໃນຊຸມຊົນ.

    ປັດຈຸບັນ ທົ່ວປະເທດມີປະຊົນທີ່ໄດ້ຮັບການສັກວັກຊິນກັນເຊື້ອໂຄວິດ-19 ເຂັມທີ 1 ໄດ້ 1.070.816 ຄົນ ເທົ່າກັບ 14,59% ເຂັມທີ 2 842.091 ຄົນ ເທົ່າກັບ 11,4% ເຊິ່ງການແຈກຢາຍວັກຊິນ ແມ່ນອີງໃສ່ 3 ຫຼັກການຄື ພື້ນທີ່ມີການລະບາດ ຈຳນວນປະຊາຊກອນຂອງແຂວງ ພື້ນທີ່ມີຄວາມສ່ຽງສູງ ແລະ ມີຊາຍແດນ ດັ່ງນັ້ນ ໄລຍະຜ່ານມາ ຮອບທີ 1 ແມ່ນນະຄອນຫຼວງວຽງຈັນ ແລະ ແຂວງບໍ່ແກ້ວ ທີ່ມີການລະບາດໃນຊຸມຊົນ ພ້ອມກັນນັ້ນຄະນະສະເພາະກິດຈຶ່ງໄດ້ຊີ້ນຳໃນການຍົກລະດັບອັດຕາພູມຄຸ້ມກັນ ແນໃສ່ເພື່ອເປັນການຢັບຢັ້ງການລະບາດໃຫ້ໄດ້ ໃນນີ້ ນວ ບັນລຸເຂັມທີ 1 ໄດ້ 43,7% ເຂັມທີ 2 ໄດ້ 36,6% ບໍ່ແກ້ວເຂັມທີ 1 ບັນລຸໄດ້ 39,9% ເຂັມທີ 2 ໄດ້ 34,13%.

    ເຖິງແນວໃດແນວກໍຕາມ ເພື່ອສືບຕໍ່ຍົກລະດັບອັດຕາພູມຄຸ້ມກັນຂອງພໍ່ແມ່ປະຊາຊົນໃນຂອບເຂດທົ່ວປະເທດໃຫ້ສູງຂຶ້ນ ສະນັ້ນ ນັບແຕ່ວັນທີ 2 ສິງຫາ 2021 ເປັນຕົ້ນໄປ ທົ່ວປະເທດຈະຮັບການສັກວັກຊິນ Johnson & Johnson ຈຳນວນ 1.008.000 ໂດສ ທີ່ໄດ້ຮັບຈາກການຊ່ວຍເຫຼືອຂອງລັດຖະບານສະຫະລັດອາເມຣິກາ ເຊິ່ງຢາຊະນິດດັ່ງກ່າວ ແມ່ນສັກເຂັມດຽວສາມາດສ້າງພູມຄຸ້ມກັນໄດ້ຢ່າງຄົບຖ້ວນ ເມື່ອສັກສຳເລັດ ຄາດວ່າຈະສ້າງພູມຄຸ້ມກັນໃຫ້ແກ່ປະຊາກອນໄດ້ 29% ດັ່ງນັ້ນ ຂໍຮຽກຮ້ອງຍັງພໍ່ແມ່ປະຊາຊົນ ຈົ່ງລົງທະບຽນລ່ວງໜ້າ ເພື່ອຮັບວັກຊິນຊະນິດດັ່ງກ່າວຜ່ານແອັບທີ່ທາງການກຳນົດໄວ້ ເມື່ອລົງທະບຽນແລ້ວ ກໍຕ້ອງໄດ້ໄປຕາມການນັດໝາຍເພື່ອຫຼີກລ່ຽງການແອອັດໃນສະຖານທີ່ສັກຢາ.

    ສຳລັບກຸ່ມເປົ້າໝາຍຂອງຜູ້ທີ່ຈະໄດ້ຮັບການສັກວັກຊິນ Johnson & Johnson ແມ່ນຜູ້ອາຍຸສູງ ມີພະຍາດປະຈຳຕົວ ແລະ ພະນັກງານຜູ້ເຮັດວຽກຢູ່ຈຸດຜ່ານແດນຕາມແນວຊາຍແດນ ຜູ້ເຮັດວຽກຢູ່ສູນກັກບໍລິເວນຊົ່ວຄາວ ພະນັກງານແພດໝໍທີ່ມີຄວາມສ່ຽງຕໍ່ການຕິດເຊື້ອໂຄວິດ-19 ແລະ ປະຊາຊົນທີ່ເດີນທາງເຂົ້າມາຈາກຕ່າງປະເທດ ພາຍຫຼັງກັກໂຕ 14 ວັນແລ້ວ ແມ່ນຈະໄດ້ຮັບການສັກຢາວັກຊິນກ່ອນຈະກັບສູ່ຄອບຄົວ.

    ນອກຈາກນີ້ ສປປ ລາວ ຍັງຈະໄດ້ຮັບການຊ່ວຍເຫຼືອວັກຊິນຊະນິດ Sinopharm ຈາກ ສປ ຈີນ ຈຳນວນ 1.000.000 ໂດສ ແລະ Astra Zeneca ຈຳນວນ 415.000 ໂດສ ຈາກປະເທດອັງກິດຕື່ມອີກ ສະນັ້ນປະຊາຊົນທີ່ໄດ້ສັກວັກຊິນ Sinopharm ເຂັມທີ 1 ແລ້ວ ຂໍໃຫ້ໝັ້ນໃຈວ່າຈະໄດ້ສັກເຂັມທີ 2 ໃນບໍ່ດົນນີ້ ສຳລັບ Astra Zeneca ເຂັມທີ 2 ຈະເປີດໃຫ້ບໍລິການໃນວັນທີ 2 ສິງຫາ ທີ່ສູນການຄ້າລາວໄອເຕັກ.

# ຂ່າວ & ພາບ:  ອົ່ນ ໄຟສົມທອງ

error: Content is protected !!