ເຊກອງ ສະເຫຼີມສະຫຼອງວັນລັດຖະທຳມະນູນ ຄົບຮອບ 30 ປີ

   ວັນທີ 28 ກັນຍາ 2021 ສະພາປະຊາຊົນແຂວງເຊກອງ ຈັດພິທີໂຮມຊຸມນຸມສະເຫຼີມສະຫຼອງວັນລັດຖະທຳມະນູນແຫ່ງຊາດ ຄົບຮອບ 30 ປີ (15 ສິງຫາ 1991-15 ສິງຫາ 2021) ຢູ່ສະໂມສອນສະພາປະຊາຊົນແຂວງ ມີທ່ານ ເຫຼັກໄຫຼ ສີວິໄລ ເລຂາພັກແຂວງ ເຈົ້າແຂວງເຊກອງ ທ່ານ ດົງເພັດ ພະຍົນ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍການນຳພັກ-ລັດ ອົງການປົກຄອງແຂວງເຊກອງ ແລະ ການນຳ 4  ເມືອງເຂົ້າຮ່ວມ.

   ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ ຂຶ້ນກ່າວສູນທອນພົດຕໍ່ພິທີໂຮມຊຸມນຸມ ໂດຍທ່ານໄດ້ຫວນຄືນເຖິງຂະບວນວິວັດແຫ່ງການກຳເນີດເກີດມີລັດຖະທຳມະນູນສະບັບທຳອິດຂອງສາທາລະນະລັດ ປະຊາທິປະໄຕ ປະຊາຊົນລາວ ຍົກໃຫ້ເຫັນຄວາມໝາຍ ຄວາມສຳຄັນຂອງລັດຖະທຳມະນູນ ໝາກຜົນຂອງການຜັນຂະຫຍາຍ ແລະ ຈັດຕັ້ງປະຕິບັດລັດຖະທຳມະນູນຕະຫຼອດໄລຍະ 30 ປີຜ່ານມາ ມີທັງຂໍ້ສະດວກ ຂໍ້ຫຍຸ້ງຍາກ ດ້ານດີ ແລະ ບັນຫາຄວນເອົາໃຈໃສ່ປັບປຸງແກ້ໄຂ ເຊິ່ງເປັນທິດຊີ້ນໍາສຳຄັນທີ່ສຸດໃນການສ້າງລັດທີ່ປົກຄອງດ້ວຍກົດໝາຍ ແລະ ສືບຕໍ່ບູລະນະລະບອບປະຊາທິປະໄຕປະຊາຊົນໃຫ້ໜັກແໜ້ນເຂັ້ມແຂງຍິ່ງຂຶ້ນ.

   ພ້ອມນີ້ ທ່ານເຈົ້າແຂວງຍັງໄດ້ຕາງໜ້າໃຫ້ພັກ-ລັດ ສະແດງຄວາມຊົມເຊີຍສັນລະເສີນຕໍ່ພະນັກງານ ສະມາຊິກພັກ ທະຫານ ຕຳຫຼວດ ກຳມະກອນ ກະສິກອນ ນັກຮຽນຮູ້ປັນຍາຊົນ ນັກທຸລະກິດ-ຜູ້ປະກອບການ ແລະ ປະຊາຊົນລາວບັນດາເຜົ່າ ຊັ້ນຄົນ ສາສະໜາ ຊາວຕ່າງດ້າວ ນັບທັງພີ່ນ້ອງຊາວລາວທີ່ດໍາລົງຊີວິດຢູ່ຕ່າງປະເທດ ແລະ ຊາວຕ່າງປະເທດທີ່ດໍາລົງຊີວິດ ແລະ ເຄື່ອນໄຫວວຽກງານຢູ່ ສປປ ລາວ ທີ່ໄດ້ຕັ້ງໜ້າປະກອບສ່ວນເຂົ້າໃນຜົນງານລວມແຫ່ງການປົກປັກຮັກສາ ແລະ ພັດທະນາປະເທດລາວ ກໍຄືການເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍໃນຕະຫລອດ 3 ທົດສະວັດຜ່ານມາ ພ້ອມທັງຮຽກຮ້ອງໃຫ້ພ້ອມກັນສືບຕໍ່ຕັ້ງໜ້າຫັນນ້ຳໃຈວັນລັດຖະທຳມະນູນແຫ່ງຊາດ ໃຫ້ເຂົ້າສູ່ຊີວິດຕົວຈິງຢ່າງມີຊີວິດຊີວາ ພ້ອມກັນຍົກສູງສະຕິເຄົາລົບ ປະຕິບັດລັດຖະທຳມະນູນ ແລະ ກົດໝາຍຢ່າງເຂັ້ມງວດ ປະກອບສ່ວນຢ່າງຕັ້ງໜ້າ ເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດອັນແສນຮັກແຫ່ງນີ້ ໃຫ້ຮັ່ງມີເຂັ້ມແຂງຂຶ້ນຢ່າງບໍ່ຢຸດຢັ້ງ.

   # ຂ່າວ – ພາບ :  ຊິລິການດາ

error: Content is protected !!