ສັງທອງຂຸ້ນຂ້ຽວເກັບກ່ຽວເຂົ້ານາປີ ແລະ ກະກຽມປູກພືດລະດູແລ້ງ

    ປັດຈຸບັນຊາວກະສິກອນເມືອງສັງທອງ ກຳລັງຂຸ້ນຂ້ຽວເກັບກ່ຽວ ມ້ຽນມັດເຂົ້ານາປີ ແລະ ກະກຽມການປູກພືດຜັກລະດູແລ້ງໃຫ້ທ່ວງທັນຕາມລະດູການ ທ່ານ ດວງຕາ ຈັນທະວົງສາ ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງທັງທອງ ໃຫ້ສຳພາດວັນທີ 13 ຕຸລາ 2021 ວ່າ ສຳລັບເນື້ອທີ່ແຜນການປູກເຂົ້ນນາປີ ມີ 8.500 ເຮັກຕາ ໃນນີ້ ນາຫວ່ານ 3.000 ເຮັກຕາ ເຊິ່ງຫ້ອງການກະສິກຳ ແລະ ປ່າໄມ້ເມືອງໄດ້ລົງຊຸກຍູ້ສົ່ງເສີມຊາວນາດ້ວຍການນຳເອົາແນວພັນ ວິທີການປູກ ການບົວລະບັດຮັກສາຕ່າງໆເພື່ອໃຫ້ຜົນຜະລິດມີປະສິດທິພາບ.

    ມາຮອດປັດຈຸບັນ ຊາວກະສິກອນໄດ້ເລີ່ມເກັບກ່ຽວເຂົ້ານາປີສຳເລັດໃນເນື້ອທີ່ 2.416 ເຮັກຕາ ເທົ່າກັບ 28,4% ຂອງເນື້ອທີ່ປັກດຳທັງໝົດ ຄາດວ່າຈະສຳເລັດໃນຕົ້ນເດືອນພະຈິກນີ້ ພ້ອມດຽວກັນນັ້ນ ປະຊາຊົນກໍໄດ້ກະກຽມການຜະລິດລະດູແລ້ງ ເປັນຕົ້ນການປູກພືດຜັກໃນເນື້ອທີ່ແຜນການ 440 ເຮັກຕາ ພືອອຸດສາຫະກຳເນື້ອທີ່ 535 ເຮັກຕາ ແລະ ປູກເຂົ້ານາແຊງ 740 ເຮັກຕາ.

    ນອກຈາກນີ້ ປະຊາຊົນຍັງມີການຜະລິດກະສິກຳເປັນສິນຄ້າ ເປັນຕົ້ນແມ່ນການປູກພືດອຸດສາຫະກຳເຊັ່ນ ການປູກມັນຕົ້ນ ສາລີແຂງ ໝາກເດືອຍ ໃນເນື້ອທີ່ 700 ກວ່າເຮັກຕາ ໃນນີ້ ຫ້ອງການກະສິກຳກໍໄດ້ສົມທົບກັບໂຄງການກຣີນ ໂດຍການຈັດຕັ້ງກຸ່ມການຜະລິດຢູ່ເຂດບ້ານວັງບົວ ບ້ານຊໍ້ ວັງມ້າ ໂດຍໄດ້ສ້າງຕັ້ງກຸ່ມປູກມັນຕົ້ນ 2 ກຸ່ມ ມີ 40 ກວ່າຄອບຄົວ ພ້ອມກັນນັ້ນ ໂຄງການໄດ້ກໍໄດ້ສະໜອງເຄື່ອງຊອຍມັນຕົ້ນ 7 ເຄື່ອງ ຜ້າປູສຳລັບຕາກມັນຕົ້ນໄປມອບໃຫ້ 2 ກຸ່ມ ພ້ອມນີ້ ກໍຈະໄດ້ສືບຕໍ່ຂະຫຍາຍຕື່ມອີກ 3 ກຸ່ມ ສ່ວນການຜະລິດໝາກເດືອຍໄດ້ມີບໍລິສັດເຂົ້າມາຊຸກຍູ້ສົ່ງເສີມໃຫ້ປະຊາຊົນປູກ.

    ສຳລັບການເກັບກູ້ຜົນຜະລິດຜົນຜະລິດມັນຕົ້ນ ແມ່ນຈະເກັບກູ້ໃນເດືອນມັງກອນ ຫາເດືອນກຸມພາ ປີ 2022 ພາຍຫຼັງເກັບກູ້ຜົນຜະລິດແລ້ວ ຈະແມ່ນກຸ່ມຜະລິດເປັນຜູ້ເກັບຊື້ສົ່ງໃຫ້ໂຮງງານ ສ່ວນພືດຜັກຕ່າງໆແມ່ນສົ່ງຂາຍໃນຕະຫຼາດນະຄອນຫຼວງວຽງຈັນ.

error: Content is protected !!