ວັນອາຫານໂລກວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ຈະຈັດຂຶ້ນທ້າຍເດືອນຕຸລາ

    ໂດຍນໍາໃຊ້ລະບົບອອນລາຍ ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້ ໃຫ້ກຽດຖະແຫຼງຂ່າວ ຊົມເຊີຍວັນອາຫານໂລກ ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ປະຈໍາປີ 2021 ໃນວັນທີ 13 ຕຸລາ 2021 ທີ່ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ການສະເຫຼີມສະຫຼອງ 2 ວັນດັ່ງກ່າວໃນປີ 2021 ຍິ່ງເປັນປີທີ່ມີຄວາມໝາຍສໍາຄັນ ເນື່ອງຈາກເປັນໄລຍະຂອງການລິເລີ່ມການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ແລະ ສືບຕໍ່ປະຕິບັດຍຸດທະສາດຂອງການພັດທະນາ ຮອດປີ 2025 ແລະ ວິໄສທັດ 2030 ແລະ ທັງເປັນໄລຍະຈັດຕັ້ງປະຕິບັດ 2 ວາລະແຫ່ງຊາດ ພິເສດໄລຍະນີ້ ປະຊາຊົນລາວບັນດາເຜົ່າ ພວມສຸມໃສ່ການຜະລິດສະບຽງອາຫານທີ່ມີໂພຊະນາການດີ ແລະ ມີຄວາມປອດໄພຢ່າງເປັນຂະບວນຟົດຟື້ນ ເພື່ອຮັບໃຊ້ໃຫ້ສັງຄົມຢ່າງພຽງພໍ ອົງການອາຫານ ແລະ ການກະເສດ ຂອງສະຫະປະຊາຊາດ ກໍກໍາລັງສະເຫຼີມສະຫຼອງວັນສ້າງຕັ້ງອົງການຂອງຕົນ ຄົບຮອບ 76 ປີ ເຊິ່ງອົງການດັ່ງກ່າວໄດ້ມີຜົນງານໃນການປະກອບສ່ວນຊ່ວຍເຫຼືອໂລກນີ້ ເພື່ອຜ່ານພົ້ນສິ່ງທ້າທາຍອັນໃຫຍ່ຫຼວງ ໂດຍສະເພາະການປ່ຽນແປງດິນຟ້າອາກາດ ການເສື່ອມໂຊມຂອງສິ່ງແວດລ້ອມ ແລະ ໄພຂົ່ມຂູ່ດ້ານຄວາມສະຫງົບ ແລະ ຄວາມໝັ້ນຄົງ. ໃນຂະນະດຽວກັນ ກະຊວງກະສິກຳ ແລະ ປ່າໄມ້ ກໍ່ໄດ້ຮ່ວມກັບອົງການອາຫານ ແລະ ການກະເສດ ແຫ່ງສະຫະປະຊາຊາດ ປະຈຳ ສປປ ລາວ ຈັດຕັ້ງປະຕິບັດແຜນງານ ເພື່ອສະໜັບສະໜູນລະບົບການປ່ຽນແປງກະສິກໍາ ແລະ ອາຫານ ເພື່ອການພັດທະນາແບບຍືນຍົງ ແລະ ສີຂຽວ ທີ່ເອີ້ນໂດຍ ຫຍໍ້ວ່າ: “ໄຮໄຮ” ເຊິ່ງແຜນງານດັ່ງກ່າວແມ່ນຈະໄດ້ປະກອບສ່ວນເຂົ້າໃນການຈັດຕັ້ງປະຕິບັດສອງວຽກງານຫຼັກທີ່ໄດ້ລະບຸໃນວາລະແຫ່ງຊາດຂອງລັດຖະບານອີກດ້ວຍ.

     ດັ່ງນັ້ນ ໃນໂອກາດທີ່ມີຄວາມໝາຍສໍາຄັນນີ້ ກະຊວງກະສິກໍາ ແລະ ປ່າໄມ້ ຮ່ວມກັບອົງການອາຫານ ແລະ ການກະເສດ ຈະໄດ້ຈັດງານສະເຫຼີມສະຫຼອງວັນອາຫານໂລກ ຄົບຮອບ 41 ປີ ພາຍໃຕ້ຄໍາຂວັນວ່າ: “ການກະທຳຂອງພວກເຮົາ ຄືອະນາຄົດຂອງພວກເຮົາ ການຜະລິດທີ່ດີກວ່າ ໂພຊະນາການທີ່ດີກວ່າ ສະພາບແວດລ້ອມທີ່ດີກວ່າ ແລະ ຊີວິດທີ່ດີກວ່າເກົ່າ” ສະເຫຼີມສະຫຼອງວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກ ຄົບຮອບ 29 ປີ ພາຍໃຕ້ຄໍາຂວັນວ່າ: “ສ້າງອານາຄົດຮ່ວມກັນ: ຢຸດຕິຄວາມທຸກຍາກທີ່ຊຳເຮື້ອ ດ້ວຍການເຄົາລົບທຸກຄົນ ແລະ ຜືນແຜ່ນດິນຂອງພວກເຮົາ” ເຊິ່ງພິທີໂຮມຊຸມນຸມໃນຄັ້ງນີ້ ຈະມີຜູ້ເຂົ້າຮ່ວມຈາກບັນດາກະຊວງ ອົງການທຽບເທົ່າແຕ່ສູນກາງຮອດທ້ອງຖິ່ນ ທູດ ແລະ ຕາງໜ້າອົງການຈັດຕັ້ງສາກົນ ຢູ່ ສປປ ລາວ. ສໍາລັບພິທີສະເຫຼີມສະຫຼອງວັນດັ່ງກ່າວ ຈະໄດ້ຈັດຂຶ້ນໃນຕອນເຊົ້າຂອງວັນທີ 25 ຕຸລາ 2021 ທີ່ກະຊວງກະສິກໍາ ແລະ ປ່າໄມ້ ໂດຍການນຳໃຊ້ລະບົບອອນລາຍ.

# ຂ່າວ & ພາບ : ວຽງມາ

error: Content is protected !!