ຮ່ວມມືພັດທະນາການຊໍາລະພາສີ-ອາກອນ ຄ່າທຳນຽມ-ຄ່າບໍລິການ ເບີກຈ່າຍງົບປະມານ

    ພິທີລົງນາມບົດບັນທຶກຄວາມເຂົ້າໃຈ ວ່າດ້ວຍການພັດທະນາການຊໍາລະພາສີ-ອາກອນ ຄ່າທຳນຽມ-ຄ່າບໍລິການ ເບີກຈ່າຍງົບປະມານແຫ່ງລັດ ຜ່ານບໍລິການການເງິນດີຈີຕອນ M Money ແລະ ການນໍາໃຊ້ບໍລິການລະບົບພື້ນຖານໂຄງລ່າງໂທລະຄົມ ຈັດຂຶ້ນວັນທີ 5 ພະຈິກ 2021 ຢູ່ກະຊວງການເງິນ ລະຫວ່າງທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ ແລະ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ກຸ່ມບໍລິສັດ ລາວໂທລະຄົມມະນາຄົມ ມະຫາຊົນ (ລລທ) ໂດຍມີທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ທ່ານ ສຈ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະ​ຜູ້​ບໍລິຫານທັງສອງຝ່າຍ ແລະ ພາກສ່ວນກ່ຽວຂ້ອງ ເຂົ້າຮ່ວມ.

    ການລົງນາມບົດບັນທຶກຄວາມເຂົ້າໃຈຄັ້ງນີ້ ເພື່ອຈັດຕັ້ງປະຕິບັດການຮ່ວມມືໃນໂຄງການ “ການນໍາໃຊ້ບໍລິການ ລະບົບພື້ນຖານໂຄງລ່າງເຄືອຂ່າຍໂທລະຄົມມະນາຄົມ ແລະ ລະບົບກະເປົາເງິນເທິງມືຖື M-Money ຂອງກຸ່ມບໍລິສັດ ລາວໂທລະຄົມມະນາຄົມມະຫາຊົນ ເຂົ້າໃນການເກັບລາຍຮັບພາສີອາກອນ ແລະ ລາຍຈ່າຍຂະແໜງການເງິນແຫ່ງລັດ ຂອງກະຊວງການເງິນ” ໃນຂົງເຂດການຮ່ວມມືທີ່ສອງຝ່າຍກໍານົດໄວ້ ທັງເປັນການຫັນແຜນວຽກຈຸດສຸມ ແລະ ແຜນດຳເນີນງານ 5 ປີ (2021-2025) ຂອງຂະແໜງການເງິນ ຫັນເຂົ້າສູ່ລະບົບຈັດເກັບ ແລະ ຊຳລະພັນທະທາງດີຈີຕອນ (Fintech) ເຊິ່ງເປັນຊ່ອງທາງ ແລະ ເຄື່ອງມືທາງດ້ານການເງິນອັນໜຶ່ງ ທີ່ຈະເພີ່ມທະວີຄວາມເຂັ້ມແຂງ ແລະ ຄວາມໂປ່ງໃສໃຫ້ລະບົບຄຸ້ມຄອງລາຍຮັບ-ລາຍຈ່າຍງົບປະມານແຫ່ງລັດ ເພື່ອຮັບປະກັນການຈັດເກັບລາຍຮັບເຂົ້າງົບປະມານແຫ່ງລັດໃຫ້ບັນລຸຕາມແຜນການ ລວມເຖິງການເບີກຈ່າຍງົບປະມານແຫ່ງລັດຕ່າໆໃຫ້ມີຄວາມວ່ອງໄວ ທັນສະໄໝ ແລະ ກວດສອບໄດ້ ໂຄງການດັ່ງກ່າວ ມີຄວາມໝາຍຄວາມສຳຄັນ ເພາະເປັນອີກໂຄງການໜຶ່ງທີ່ສົ່ງເສີມ ສະໜອງທາງເລືອກ ອຳນວຍຄວາມສະດວກໃຫ້ຜູ້ຊົມໃຊ້ ຫົວໜ້າທຸລະກິດ ເຂົ້າເຖິງການບໍລິການຂອງພາກລັດ ໃນການປະຕິບັດການຊຳລະພັນທະໃຫ້ລັດ ແລະ ເບີກຈ່າຍງົບປະມານຕ່າງໆຢ່າງມີປະສິດຜົນ. 

    ການຮ່ວມມືຄັ້ງນີ້ ເປັນບາດກ້າວໜຶ່ງທີ່ສຳຄັນໃນການຫັນການຊຳລະພັນທະຂະແໜງການເງິນໃນຮູບແບບໃໝ່ ຜ່ານ M Money ກະເປົາເງິນເທິງມືຖື ເຂົ້າໃນຫົວໜ່ວຍວຽກງານຂອງລັດ ແລະ ມີຄວາມຈຳເປັນໃນການດຳລົງຊີວິດປະຈຳວັນຂອງຜູ້ຄົນທົ່ວປະເທດ ເປັນສ່ວນໜຶ່ງໃນການສ້າງທ່າແຮງ ຊຸກຍູ້ ເສີມສ້າງ ແລະ ຜັນຂະຫຍາຍເສດຖະກິດດີຈີຕອນ ຫຼຸດຜ່ອນການນຳໃຊ້ເງິນສົດ ຕາມແຜນພັດທະນາເສດຖະກິດດີຈີຕອນຂອງພັກ-ລັດ ໃຫ້ປາກົດຜົນເປັນຈິງ ຕາມວິໄສທັດຂອງບໍລິສັດ ລາວໂມບາຍມັນນີ ຈຳກັດຜູ້ດຽວ ເປັນຜູ້ນຳດ້ານການບໍລິການການເງິນດີຈີ ໃນ ສປປ ລາວ ອີກດ້ວຍ. 

.# ຂ່າວ – ພາບ : ສະບາໄພ

error: Content is protected !!