ລັດວິສາຫະກິດສະບຽງອາຫານ ຈະພົວພັນກັບບັນດາແຂວງອອ້ມຂ້າງ ເພື່ອເຊື່ອມໂຍງການເຮັດສັນຍາເກັບຊື້ສັດລ້ຽງກັບປະຊາຊົນ

    ທ່ານ ຄໍາຫຼ້າ ແສງດາວົງ ອໍານວຍການບໍລິສັດລັດວິສາຫະກິດສະບຽງອາຫານນະຄອນຫຼວງວຽງຈັນໃຫ້ສໍາພາດເນື່ອງໃນໂອກາດວັນຊາດທີ 2 ທັນວາ ຄົບຮອບ 46 ປີ (2/12./1975-2/12/2021) ວັນທີ 30 ພະຈິກ 2021 ວ່າ: ວັນຊາດທີ 2 ທັນວາ ເປັນວັນທີ່ມີຄວາມໝາຍຄວາມສໍາຄັນຂອງທົ່ວພັກ-ລັດ ແລະ ປວງຊົນລາວທັງຊາດ ເຊິ່ງເປັນວັນແຫ່ງໄຊຊະນະອັນຍີ່ງໃຫ່ຍໃນປະຫວັດສາດຂອງຊາດລາວ ຕະຫຼອດໄລຍະ 46 ປີຜ່ານມາ ພາຍໃຕ້ການນໍາພາອັນສະຫຼາດສ່ອງໃສຂອງພັກ ປະເທດຊາດໄດ້ຮັບການພັດທະນາເປັນກ້າວໆ ແລະ ມີໃບໜ້າອັນໃໝ່ ພົ້ນເດັ່ນ ປະເທດລາວມີເສັ້ນທາງລົດໄຟແລ່ນເຊື່ອມຕໍ່ກັບປະເທດຈີນ ເຊິ່ງຈະກາຍເປັນສິ່ງອໍານວຍຄວາມສະດວກໃນການໄປມາ ແລະ ຂົນສົ່ງສິນຄ້າລະຫວ່າງລາວ-ຈີນ ຈີນ-ລາວ ມີຄວາມສະດວກ ວ່ອງໄວ ພ້ອມທັງຫຼຸດຜ່ອນຕົ້ນທຶນຕື່ມອີກ ຄຽງຄູ່ກັນນັ້ນ ລັດວິສາຫະກິດສະບຽງອາຫານກໍໄດ້ມີການພັດທະນາ ແລະ ເຕີບໃຫຍ່ຂະຫຍາຍຕົວ ພົ້ນເດັ່ນ ໄດ້ມີການປັບປຸງທຸກລະບົບຂອງລັດວິສາຫະກິດດັ່່ງກ່າວໃຫ້ມີບາດກ້າວທີ່ດີຂຶ້ນ ໂດຍສະເພາະ ໄດ້ປັບໂຮງງານຂ້າສັດດອນດູ່ໃຫ້ກ້າວສູ່ມາດຕະຖານສາກົນ ແລະ ເປັນທີ່ຍອມຮັບຂອງສັງຄົມ ເຊິ່ງຜົນສໍາເລັດທີ່ກ່າວມານັ້ນ ຍ້ອນໄດ້ຮັບຊີ້ນໍາ-ນໍາພາຂອງພັກ-ລັດຖະບານ ໃນການອໍານວຍຄວາມສະດວກ ແລະ ຊຸກຍູ້ສົ່ງເສີມໃຫ້ລັດວິສາຫະກິດສະບຽງອາຫານນະຄອນຫຼວງວຽງຈັນໄດ້ມີການພັດທະນາມາເຖິງປັດຈຸບັນນີ້. 

    ປັດຈຸບັນນີ້ພັກ ແລະ ລັດຖະບານກໍາລັງສຸມໃສ່ການພັດທະນາເສດຖະກິດ-ສັງຄົມທີ່ຕິດພັນກັບວາລະແຫ່ງຊາດ ເຊິ່ງກ່ຽວພັນກັບລັດວິສາຫະກິດສະບຽງອາຫານໂດຍກົງ ແມ່ນວາລະແຫ່ງຊາດວ່າດ້ວຍການແກ້ໄຂຂໍ້ຫຍຸ້ງຍາກທາງດ້ານເສດຖະກິດ-ການເງິນ ເພື່ອຜັນຂະຫຍາຍວາລະດັ່ງກ່າວໃຫ້ເປັນຮູບປະທໍາ ແລະ ມີຜົນສໍາເລັດຕາມແຜນການວາງໄວ້ ເມື່ອບໍ່ດົນມານີ້ ທາງບໍລິສັດ ລັດວິສາຫະກິດສະບຽງອາຫານ ນະຄອນຫຼວງວຽງຈັນ ໄດ້ມີການເຊັນສັນຍາຊື້-ຂາຍສັດປະເພດ ງົວ ຄວາຍ ແລະ ແບ້ ກັບກຸ່ມບໍລິສັດ ຄໍາໄພຊະນະ ຈໍາກັດຜູ້ດຽວ ເພື່ອປ້ອນໃຫ້ໂຮງງານຂ້າສັດທັນສະໄໝດອນດູ່ ໃນການສະໜອງທາດຊີ້ນອອກສູ່ສັງຄົມໄດ້ຢ່າງພຽງພໍ ເຊິ່ງປັດຈຸບັນ ການຂ້າຄົວໝູຢູ່ໂຮງງານດັ່ງກ່າວມື້ໜື່ງສະເລ່ຍປະມານ 380 ຫາ 400 ໂຕ ສ່ວນ ງົວ ແລະ ຄວາຍແມ່ນ 10-15 ໂຕຕໍ່ມື້. 

    ສະເພາະໃນຕໍ່ໜ້າ ຖ້າຫາກພະຍາດໂຄວິດ 19 ມີການເບົາບາງລົງ ການຊື້-ຂາຍ ແລະ ການບໍລິການກັບມາສູ່ສະພາບປົກກະຕິ ທາງບໍລິສັດກໍຈະເພີ່ມການຜະລິດຂື້ນຕື່ມອີກ ພ້ອມທັງພົວພັນກັບບັນດາແຂວງອ້ອມຂ້າງ ເພື່ອຈະເຊື່ອມໂຍງການເຮັດສັນຍາເກັບຊື້ສັດລ້ຽງກັບປະຊາຊົນ ແລະ ສົ່ງເສີມການລ້ຽງເພື່ອປ້ອນເຂົ້າໂຮງງານຂ້າສັດທັນສະໄໝດອນດູ່ ເຮັດໃຫ້ທຸກຄົນໃນສັງຄົມໄດ້ບໍລິໂພກຊີ້ນທີ່ຄວາມສະອາດ ແລະ ປອດໄພອີກດ້ວຍ.

# ຂ່າວ – ພາບ : ຂັນທະວີ

error: Content is protected !!