ສ້າງຂະບວນການແຂ່ງຂັນກີລາ ເນື່ອງໃນໂອກາດວັນສຳຄັນຂອງຊາດ

    ວັນທີ 2 ທັນວາ 2021 ທີ່ເດີ່ນກີລາເມືອງຫົງສາ ແຂວງໄຊຍະບູລີ ຈັດການແຂ່ງຂັນກີລາເພື່ອສະເຫຼີມສະຫຼອງວັນຊາດທີ 2 ທັນວາ ຄົບຮອບ 46 ປີ ແລະ ວັນຄ້າຍວັນເກີດປະທານໄກສອນ ພົມວິຫານ ຄົບຮອບ 101 ປີ ໂດຍມີທ່ານ ຄໍາຫຼ້າ ຜີວວັນນາ ເຈົ້າເມືອງຫົງສາ ມີຄະນະນໍາຂອງເມືອງ ແຂກຖືກເຊີນ ນັກກີລາບານເຕະເພດຍິງ ເພດຊາຍ ແລະ ມວນຊົນເຂົ້າຮ່ວມ.

    ໃນພິທີ  ທ່ານ ບຸນ ທັນ ພູລີຈັນ ​ຮອງຫົວໜ້າຫ້ອງການສຶກສາທິການ ແລະ ກີລາ ເມືອງຫົງສາ ໄດ້ສະຫຼຸບຜົນຂອງການແຂ່ງຂັນກີລາຄັ້ງນີ້ ໄດ້ເລີ່ມການແຂ່ງຂັນມາແຕ່ວັນທີ 11 ພະຈິກ 2021 ເປັນຕົ້ນມາ  ຫາວັນ 2 ທັນວາ 2021 ເຊິ່ງການແຂ່ງຂັນກີລາບານເຕະໃນຄັ້ງນີ້ ມີນັກກີລາ 2 ປະເພດຄື: ເພດຍິງ ແລະ ເພດຊາຍ ປະກອບມີຮຸ່ນອາວຸໂສ ອາຍຸ 40 ຂຶ້ນໄປ ແລະ ຮຸ່ນຊາວໝຸ່ມຍິງ-ຊາຍ ເຂົ້າຮ່ວມທັງໝົດ 19 ທີມ ຮຸ່ນອາວຸໂສລວມມີ 7 ທີມ ມີນັກກີລາເຂົ້າຮ່ວມທັງໝົດ 440 ຄົນ ຍິງ 110 ຄົນ ໄດ້ລົງທະບຽນ 1 ລ້ານກີບຕໍ່ທີມ ແລະ ສໍາລັບເພດຍິງ 800.000 ກີບຕໍ່ທີມ ເພື່ອລົງທະບຽນໃຊ້ຈ່າຍເຂົ້າໃນການບໍລິຫານ ຊື້ອຸປະກອນຕ່າງໆເຂົ້າໃນວຽກງານກີລາ.

    ຜ່ານການແຂ່ງຂັນ ຮຸ່ນອາວຸໂສ ອັນດັບທີ  1  ແມ່ນທີມບານເຕະກອງບັນຊາການ ປກສ ເມືອງ ໄດ້ຮັບຂັນ 1 ​ໜ່ວຍ ພ້ອມເງິນສົດ 1.200.0000 ກີບ ອັນດັບທີ 2 ແມ່ນທີມ ກຸ່ມເສດຖະກິດ ໄດ້ຮັບເງິນສົດ 1.000.000 ກີບ ອັນດັບທີ 3 ແມ່ນທີມກຸ່ມການເມືອງ ໄດ້ຮັບເງິນສົດ 800.​000 ກີບ ຮຸ່ນຊາວໝຸ່ມເພດຊາຍ ອັນດັບທີ1  ແມ່ນທີມກຸ່ມການເມືອງ+ກຸ່ມເສດຖະກິດ ໄດ້ຮັບຂັນ 1 ໜ່ວຍ ພ້ອມເງິນສົດ 1.200.000 ກີບ ອັນດັບທີ 2 ແມ່ນທີມ ປກສ ໄດ້ຮັບເງິນສົດ 1.000.000 ກີບ ອັນດັບທີ 3 ແມ່ນທີມ ປກຊ+ຕຸລາການ ໄດ້ຮັບເງິນສົດ ທີມລະ 800.000 ກີບ ສ່ວນບານເຕະຊາວໝຸ່ມຍິງ ອັນດັບທີ 1 ແມ່ນ ມສ ບ້ານເມືອງຫານ ໄດ້ຮັບເງິນສົດ 1.000.000 ກີບ ພ້ອມຂັນ 1 ໜ່ວຍ ອັນດັບທີ 2 ແມ່ນທີມ ຫ້ອງວ່າການເມືອງ ໄດ້ຮັບເງິນສົດ 800.000 ກີບ ແລະ ອັນດັບທີ 3 ແມ່ນທີມ ຮ້ານຊັນເດີ ໄດ້ຮັບເງິນສົດ 500.000 ກີບ ໃຫ້ກຽດຊຶ້ນມອບຂັນ ແລະ ເງິນສົດ ໂດຍທ່ານ ຄໍາຫຼ້າ ຜີວວັນນາ ເຈົ້າເມືອງໆຫົງສາ.

# ຂ່າວ & ພາບ :  ບຸນມີ ສີວິໄລ

error: Content is protected !!