ນໍາໃຊ້ວັດຖຸດິບພາຍໃນບ້ານ ແປຮູບເປັນຜະລິດຕະພັນຈໍາໜ່າຍ ເຮັດໃຫ້ຊີວິດການເປັນຢູ່ຄອບຄົວດີຂຶ້ນ

    ທ່ານ ນາງ ວັນມະນີ ຢາທໍຕູ້ ປະທານສະຫະພັນແມ່ຍິງເມືອງຮົ່ມ ແຂວງໄຊສົມບູນ ໄດ້ປະກອບຄໍາເຫັນຕົວແບບການແປຮູບອາຫານທີ່ນໍາໃຊ້ວັດຖຸດິບພາຍໃນບ້ານຂອງຫະພັນແມ່ຍິງເມືອງຮົ່ມ ຕໍ່ກອງປະຊຸມໃຫຍ່ຄັ້ງທີ VIII ຜູ້ແທນແມ່ຍິງລາວທົ່ວປະເທດເມື່ອບໍ່ດົນມານີ້ວ່າ:

    ເພື່ອສ້າງໃຫ້ແມ່ຍິງພາຍໃນເມືອງມີວຽກເຮັດງານທຳ ຫາລາຍໄດ້ເພີ່ມໃຫ້ແກ່ຄອບຄົວ ເພື່ອແກ້ໄຂຊີວິດການເປັນຢູ່ຂອງເອື້ອຍອ້າຍນ້ອງແມ່ຍິງໃຫ້ມີລາຍຮັບດີຂຶ້ນ ເຊິ່ງເປັນການປະກອບສ່ວນເຂົ້າໃນວຽກງານການແກ້ໄຂຄວາມທຸກຍາກ ພ້ອມນັ້ນເພື່ອເຮັດໃຫ້ການປະຕິບັດແຜນພັດທະນາແມ່ຍິງຂອງແຂວງ ແລະ ເມືອງໃຫ້ປາກົດຜົນເປັນຈິງ ສະຫະພັນແມ່ຍິງເມືອງພວກເຮົາໄດ້ສົມທົບທາງຫ້ອງການອຸດສາຫະກຳ-ການຄ້າ ເມືອງຮົ່ມ ຈັດຕັ້ງຄະນະຮັບຜິດຊອບຢູ່ຂັ້ນເມືອງ ເພື່ອຊຸກຍູ້ ແລະ ຕິດຕາມການເຄື່ອນໄຫວກິດຈະກຳດັ່ງກ່າວ ໂດຍອີງໃສ່ທ່າແຮງທາງດ້ານວັດຖຸດິບທີ່ມີຂອງເມືອງ ໂດຍການດຳເນີນກິດຈະກຳທຳອິດ ໄດ້ເລີ່ມຈາກບ້ານ 3 ສ້າງເປັນບ້ານທຳອິດເຮັດເປັນຕົວແບບກຸ່ມປູກຂີງ ຂາຍຂີງແຫ້ງ ຜະລິດຕະພັນຊາຂີງ ແລະ ໝາກນັດແປຮູບ ເຊິ່ງເລີ່ມປີ 2011 ມີກຸ່ມຜະລິດ 2 ກຸ່ມ ມີສະມາຊິກທັງໝົດ 20 ຄົນ ໂດຍວັດຖຸດິບທີ່ນຳເອົາມາຜະລິດ ສະມາຊິກກຸ່ມປູກເອງ ຄອບຄົວໜຶ່ງປູກຂີງ 2-3 ເປົາ ໝາກນັດປູກເນື້ອທີ່ 90 ເຮັກຕາ ແລະ ວິທີການຜະລິດເປັນຊາຂີງແມ່ນເຝິກມາຈາກແຂວງວຽງຈັນ ສ່ວນການແປຮູບໝາກນັດ ເປັນຕົ້ນ ເຮັດສະບູໝາກນັດ ສະບູຂີງ ແລະ ນໍ້າມຢາລ້າງຈານໝາກນັດ ແມ່ນສູນກາງສະຫະພັນແມ່ຍິງລາວເປັນຜູ້ເຝິກໃຫ້ແຕ່ປີ 2019 ພ້ອມນັ້ນ ຍັງໄດ້ຮັບເຄື່ອງເຕົາອົບ 1 ໜ່ວຍ ຈັກປັ່ນນໍ້າໝາກໄມ້ 1 ອັນ ເຄື່ອງຕັດໝາກນັດອົບແຫ້ງ 1 ອັນ  ແມ່ພິມເຮັດສະບູໝາກນັດ ສະບູຂີງ ແລະ ນ້ຳຢາລ້າງຈານໝາກນັດຈຳນວນ 6 ແຜ່ນ ຈາກຜະລິດຕະພັນນັ້ນຂາຍຂີງແຫ້ງໄດ້ 225.000.000 ກີບຕໍ່ປີ ຊາຊິງຂາຍໄດ້ 8.000.000 ກີບຕໍ່ປີ ແລະ ຜະລິດຕະພັນແປຮູບໝາກນັດ ສະເລ່ຍໄດ້ 10-15 ລ້ານກີບຕໍ່ປີ ແລະ ຂາຍໝາກນັດດິບ 50 – 60 ລ້ານກີບຕໍ່ປີ.

    ຜ່ານການຈັດຕັ້ງປະຕິບັດກິດຈະກຳດັ່ງກ່າວ ເຫັນວ່າການປູກຂີງດິບ ຕາກແຫ້ງເຮັດເປັນຜະລິດຕະພັນຊາຂີງ ໝາກນັດແປຮູບ ແມ່ນໄດ້ຂາຍດີເປັນທີ່ຍອມຮັບຈາກສັງຄົມພາຍໃນແຂວງ ແລະ ຕ່າງແຂວງ ເຊິ່ງລາຍຮັບທີ່ຂາຍໄດ້ແມ່ນໄດ້ແບ່ງໃຫ້ສະມາຊິກ 70% ແລະ ແບ່ງໄວ້ສະສົມເປັນທຶນ 30% ນອກຈາກນີ້ ຍັງໄດ້ນຳພາເອື້ອຍນ້ອງແມ່ຍິງດຳເນີນກິດຈະກຳຫາລາຍໄດ້ຕ່າງໆ ໂດຍຮັບເຄື່ອງຈັກຫຍິບ 10 ເຄື່ອງ ພ້ອມດ້ວຍທຶນສ້ອມແປງຫ້ອງເປັນສູນເຝິກອົບຮົມວິຊາຊີບເປັນເງິນສົດຈຳນວນ 13.000.000 ກີບ ໄດ້ຮັບ ໂຄງການຫຍິບຜ້າອັດປາກອັດດັງ ຈຳນວນ 66 ລ້ານກີບ ໄດ້ຮັບໂຄງການຊ່ວຍເຫຼືອລ້າປະເພດອາຫານ ແລະ ເຄື່ອງໃຊ້ຄອບຄົວກຸ້ມກິນພາຍໃນ 5 ວັນ ໃຫ້ 77 ຄອບຄົວທີ່ມີຄວາມຫຍຸ້ງຍາກໃນການດຳລົງຊີວິດ ຈາກສູນກາງສະຫະພັນແມ່ຍິງລາວ ປ້ານາລີ ສີສຸລິດ ພ້ອມລູກຫຼານ ຊ່ວຍ 10.000.000 ກີບ ແລະ ປ້າສອນທອນ ສູນຍະວົງ ພ້ອມລູກຫຼານຊ່ວຍ 10.000.000 ກີບ ລວມເປັນ 20.000.000 ກີບ ໄດ້ລົງເຝິກອົບຮົມໃຫ້ແກ່ສະມາຊິກບ້ານເປົ້າ ໝາຍຂອງໂຄງການໄດ້ຈໍານວນ 2 ຄັ້ງ ຜູ້ເຂົ້າຮ່ວມ 63 ຄົນໃນການຈັດຕັ້ງປະຕິບັດກິດຈະກຳດັ່ງກ່າວ ເອື້ອຍນ້ອງແມ່ຍິງກຸ່ມໄດ້ມີຄວາມຕື່ນຕົວໃນການປະຕິບັດກິດຈະກໍາຢ່າງຕັ້ງໜ້າ ເຖິງວ່າກິດຈະກໍບໍ່ທັນເຕີບໃຫຍ່ ລາຍຮັບບໍ່ທັນສູງ ແຕ່ກໍເປັນໜໍ່ແໜ່ງອັນດີທີ່ຊ່ວຍໃຫ້ແມ່ຍິງມີລາຍຮັບເຂົ້າໃນຄອບຄົວໃຫ້ມີຢູ່ມີກິນດີຂຶ້ນ.

# ຂ່າວ & ພາບ :  ຂັນທະວີ

error: Content is protected !!