ນັກຮົບຊຸດຂາວ

ການ​ແຜ່​ລະ­ບາດ​ຂອງ​ພະ­ຍາດ​ໂຄ​ວິດ-19 ໄດ້​ສະ­ທ້ອນ​ໃຫ້​ເຫັນ​ຫຼາຍ​ບັນ­ຫາ​ຂອງ​ຄົນ​ໃນ​ສັງ­ຄົມ ເຊັ່ນ: ການ​ຊ່ວງ​ຊີງ​ສົກ​ສວຍ​ຊື້​ເຄື່ອງ​ຂາຍ­ຂອງ ໂດຍ​ຂຶ້ນ​ລາ­ຄາ​ຍາມ​ສະ­ພາບ​ບ້ານ​ເມືອງ​ວິ​ກິດ ຄົນ​ຂາຍ​ບາງ​ກຸ່ມ​ກໍ​ບໍ່​ສົນ​ວ່າ​ສິນ­ຄ້າ​ໄດ້​ຄຸນ​ນະ​ພາບ ຂໍ​ພຽງ​ແຕ່​ໄດ້​ເງິນ ບາງ​ຄົນ​ຖືກ​ຕົວະ​ຕົ້ມ​ຫັກ​ຫຼ່ຽມ​ຜົນ​ປະ­ໂຫຍດ​ກັນ ເຖິງ​ຂັ້ນ​ຮ້ອງ­ໄຫ້​ເປີດ​ເສື້ອ​ໃຫ້​ສັງ­ຄົມ​ໄດ້​ເຫັນ ນີ້​ຄື​ທາດ​ແທ້​ຂອງ​ຄົນ​ພຽງ​ບາງ​ກຸ່ມ ເອີ້ນ​ວ່າ: ສວຍ­ໂອ­ກາດ​ເຫັນ­ແກ່​ໄດ້ ເພາະ​ມີ​ນິ­ໄສ​ເຫັນ​ແຕ່​ຜົນ​ປະ­ໂຫຍດ​ເຕັມ​ຫົວ­ໃຈ.

ພາບປະກອບ

ການ​ປິ່ນ­ປົວ​ພະ­ຍາດ​ໂຄ​ວິດ-19 ຖື​ໄດ້​ວ່າ​ເປັນ​ການ​ເສຍ­ສະ­ຫຼະ​ສູງ​ຂອງ​ແພດ​ໝໍ ໂດຍ​ອາ­ໄສ​ຈິດ­ໃຈ​ກ້າ­ຫານ ເພື່ອ​ຊົດ​ຊ່ວຍ​ຜູ້​ຕິດ­ເຊື້ອ​ພະ­ຍາດ ເຊິ່ງ​ສະ­ພາບ​ການ​ຕອນ​ນີ້ ຖື​ວ່າ​ເປັນ​ຜົນ­ສຳ­ເລັດ​ເປັນ​ທີ່​ພໍ­ໃຈ​ຂອງ​ທຸກ​ຝ່າຍ ທັງ​ລັດ­ຖະ­ບານ ຄະ­ນະ​ສະ­ເພາະ​ກິດ ແລະ ປະ­ຊາ­ຊົນ​ທີ່​ເຝົ້າ​ລໍ­ຄອຍ​ຕິດ­ຕາມ​ສະ­ຖາ­ນະ​ການ​ມື້​ຕໍ່​ມື້ ການ​ສືບ­ຕໍ່​ມາດ​ຕະ­ການ​ຄຳ​ສັ່ງ​ເລກ​ທີ 06/ນຍ ແລະ ຄຳ​ແນະ­ນຳ​ຂອງ​ຄະ­ນະ​ສະ­ເພາະ​ກິດ ໃນ​ແຕ່​ລະ​ໄລ­ຍະ ເຫັນ​ໄດ້​ຈາກ​ຫາງ​ສຽງ​ປະ­ຊາ­ຊົນ​ແລ້ວ ແມ່ນ​ໄດ້​ຮັບ​ຄວາມ​ເຫັນ​ດີ​ຊົມ­ເຊີຍ​ເປັນ​ຢ່າງ​ສູງ ເພາະ​ຄົນ​ໃນ​ສັງ­ຄົມ ກໍ​ຄົງ​ຈະ​ເຫັນ​ໄດ້​ຈາກ​ບາງ​ປະ­ເທດ​ໃນ​ໂລກ ທີ່​ດຳ­ເນີນ​ມາດ​ຕະ­ການ​ຜິດ­ພາດ ເຮັດ​ໃຫ້​ປະ­ຊາ­ຊົນ​ຕິດ­ເຊື້ອ​ພະ­ຍາດ​ຫຼາຍ​ຂຶ້ນ… ແນວ­ໃດ​ກໍ​ຕາມ ສັງ­ຄົມ​ກໍ​ສະ­ແດງ​ອອກ​ເຊິ່ງ​ນ້ຳ­ໃຈ​ຈາກ​ຫຼາຍ​ພາກ­ສ່ວນ ຊຸກ­ຍູ້​ໃຫ້​ກຳ­ລັງ​ໃຈ​ແພດ​ໝໍ ຜູ້​ມີ​ນ້ຳ­ໃຈ​ເສຍ­ສະ­ຫຼະ​ກ້າ­ຫານ ໃນ​ສະ­ໜາມ­ຮົບ​ຂອງ​ການ​ປິ່ນ­ປົວ​ສູ້​ກັບ​ພະ­ຍາດ​ແຜ່​ລະ­ບາດ​ໂຄ​ວິດ-19.

ເຖິງ​ແມ່ນ​ວ່າ​ມີ​ຄົນ​ຈຳ­ນວນ​ໜຶ່ງ ສວຍ­ໂອ­ກາດ​ໃນ​ທາງ​ຫາ​ຜົນ​ປະ­ໂຫຍດ​ເຂົ້າ​ໃສ່​ຕົນ ແຕ່​ສັງ­ຄົມ​ສ່ວນ​ໃຫຍ່​ກໍ​ໄດ້​ສະ­ແດງ​ອອກ ເຊິ່ງ​ນ້ຳ­ໃຈ​ເສຍ­ສະ­ຫຼະ​ເອື້ອ­ເຟື້ອ​ເພື່ອ​ແພ່ ເຊັ່ນ: ບາງ​ບໍ­ລິ­ສັດ​ກໍ​ໄດ້​ຕັ້ງ​ໂຕະ​ແຈກ​ແບ່ງ­ປັນ​ອາ­ຫານ ເປັນ​ການ​ຢຶດ​ໜ່ຽວ​ສາ­ມັກ­ຄີ​ນ້ຳ­ໃຈ​ແຫ່ງ​ມະ­ນຸດ­ສະ­ທຳ ສົມ​ກັບ​ເປັນ​ຊາວ​ພຸດ ທີ່​ພະ­ພຸດ­ທະ­ເຈົ້າ​ໄດ້​ສອນ​ໃຫ້​ຮູ້­ຈັກ​ສັງ­ຄົມ​ສົງ­ເຄາະ​ໃນ​ຍາມ​ວິ​ກິດ ເຊັ່ນ: ໃຫ້​ທານ​ແບ່ງ­ປັນ​ສິ່ງ​ຂອງ​ໃນ​ຍາມ​ຈຳ­ເປັນ ໃຫ້​ກຳ­ລັງ​ໃຈ​ຜູ້​ຕິດ­ເຊື້ອ​ພະ­ຍາດ ຫຼື ສັງ­ຄົມ​ທີ່­ຢູ່​ໃນ​ພາ­ວະ​ຈິດ​ຕົກ ການ​ຊ່ວຍ­ເຫຼືອ​ກັນ​ໃຫ້​ແຕ່​ລະ​ຝ່າຍ ໄດ້​ຮັບ​ປະ­ໂຫຍດ​ຍາມ​ວິ​ກິດ​ນ້ຳ­ໃຈ​ສະ­ເໝີ​ຕົ້ນ​ສະ­ເໝີ​ປາຍ ຊ່ວຍ­ເຫຼືອ​ກັນ ນີ້​ຄື​ຄຸນ​ນະ​ທຳ​ຊາວ​ພຸດ​ທີ່­ແທ້​ຈິງ.

ສະ­ຫຼຸບ​ໄດ້​ວ່າ: ເຫດ­ການ​ຄັ້ງ​ນີ້ ເຖິງ​ວ່າ​ຍັງ​ບໍ່​ຈົບ​ແຕ່​ພວກ​ເຮົາ​ກໍ​ເຫັນ​ນ້ຳ­ໃຈ​ເສຍ­ສະ­ຫຼະ ແບ່ງ­ປັນ​ຈາກ​ຫຼາຍ​ຝ່າຍ​ໃນ​ສັງ­ຄົມ ເຊິ່ງ​ເປັນ​ມູນ­ເຊື້ອ​ອັນ​ດີ­ງາມ ໂດຍ​ສະ­ເພາະ ກໍ​ແມ່ນ​ແພດ​ໝໍ​ຜູ້​ເສຍ­ສະ­ຫຼະ​ສູງ​ໃນ​ເຫດ­ການ​ຄັ້ງ​ນີ້.

ໂດຍ: ດັ້ນ​ກີບ​ເມກ

ຕິດຕໍ່ພວກເຮົາ