ວັນນີ້ ມີຜູ້ຕິດເຊື້ອພະຍາດໂຄວິດ-19 ເພີ່ມໃໝ່ 1 ພັນກວ່າຄົນ

    ທ່ານ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ລາຍສະພາບການລະບາດຂອງພະຍາດໂຄວິດ-19 ປະຈໍາວັນທີ 14 ມັງກອນ 2022 ວ່າ: ວັນທີ 13 ມັງກອນ ທົ່ວປະເທດໄດ້ເກັບຕົວຢ່າງມາກວດຊອກຫາເຊືື້ອໂຄວິດ-19 ທັງໝົດ 6.222 ຕົວຢ່າງ ໃນຂອບເຂດທົ່ວປະເທດ ແລະ ກວດພົບເຊື້ອທັງໝົດ 1.052 ຄົນ ໃນນີ້ຕິດເຊື້ອພາຍໃນ 1.047 ຄົນ ຈາກນະຄອນຫຼວງ 400 ຄົນ ແຂວງສະຫວັນນະເຂດ 14 ຄົນ ຈຳປາສັກ 37 ຄົນ ສາລະວັນ 21 ຄົນ ເຊກອງ 21 ຄົນ ອັດຕະປື 41 ຄົນ ບໍ່ແກ້ວ 40 ຄົນ ວຽງຈັນ 31 ຄົນ ຫຼວງພະບາງ 36 ຄົນ ຫຼວງນ້ຳທາ 7 ຄົນ ອຸດົມໄຊ 63 ຄົນ ຜົ້ງສາລີ 102 ຄົນ ໄຊຍະບູລີ 53 ຄົນ ຊຽງຂວາງ 67 ຄົນ ຄຳມ່ວນ 25 ຄົນ ບໍລິຄຳໄຊ 49 ຄົນ ໄຊສົມບູນ 33 ຄົນ ແລະ ແຂວງຫົວພັນ 12 ຄົນ.

    ສໍາລັບການຕິດເຊື້ອນໍາເຂົ້າ ມີ 5 ຄົນ ຈາກນະຄອນຫຼວງ 3 ຄົນ ສະຫວັນນະເຂດ 1 ຄົນ ແລະ ຈຳປາສັກ 1 ຄົນ ເຊິ່ງໄດ້ເຂົ້າຈຳກັດບໍລິເວນຕາມສະຖານທີ່ກຳນົດໄວ້ກ່ອນຈະກວດພົບເຊື້ອ ຮອດປັດຈຸບັນ ມີຜູ້ຕິດເຊື້ອສະສົມທັງໝົດ 123.293 ກໍລະນີ ອອກໂຮງໝໍວັນທີ 13 ມັງກອນ 233 ຄົນ ກຳລັງປິ່ນປົວ 7.436 ຄົນ ແລະ ເສຍຊີວິດສະສົມທັງໝົດ 476 ຄົນ ໃນນີ້ເສຍຊີວິດໃໝ່ 5 ຄົນເຊິ່ງຈາກຫຼວງພະບາງ 4 ຄົນ ແລະ ບໍລິຄຳໄຊ 1 ຄົນ.

        # ຂ່າວ & ພາບ : ຂັນທະວີ

error: Content is protected !!