ປະກາດການຈັດຕັ້ງສະຫະພັນກຳມະບານກຸ່ມບໍລິສັດພົງສະຫວັນ

    ສະຫະພັນກຳມະບານນະຄອນຫຼວງວຽງຈັນ (ນວ) ຈັດພິທີຮັບສະມາຊິກໃໝ່ ແລະ ປະກາດການຈັດຕັ້ງສະຫະພັນກຳມະບານກຸ່ມບໍລິສັດພົງສະຫວັນ ວັນທີ 13 ມັງກອນ 2022 ທີ່ຫ້ອງວ່າການປົກຄອງ ນວ ມີທ່ານ ດາວເພັດ ອາລຸນ ປະທານສະຫະພັນກຳມະບານ ນວ ທ່ານ ໄພບູນ ພົງສະຫວັນ ປະທານຜູ້ບໍລິຫານກຸ່ມບໍລິສັດພົງສະຫວັນ ຜູ້ອຳນວຍການທະນາຄານພົງສະຫວັນ ພ້ອມດ້ວຍສະມາຊິກກຳມະບານ ແລະ ຂະແໜງການ່ຽວຂ້ອງເຂົ້າຮ່ວມ.

    ໃນພິທີ ທ່ານ ສຸດທິເດດ ນາລີວັນ ຕາງໜ້າກຸ່ມບໍລິສັດພົງສະຫວັນ ໄດ້ຜ່ານບົດສະຫຼຸບຫຍໍ້ການເຄື່ອນໄຫວວຽກງານໄລຍະຜ່ານມາຂອງກຸ່ມບໍລິສັດດັ່ງກ່າວວ່າ ພາຍຫຼັງປະເທດຊາດໄດ້ຮັບການປົດປ່ອຍໃນປີ 1975 ໄດ້ປະຕິບັດສອງໜ້າທີ່ຍຸດທະສາດຄື ການປົກປັກຮັກສາ ແລະ ສ້າງສາປະເທດຊາດ ໃນໄລຍະເລີ່ມຕົ້ນຂອງການປະຕິບັດໄລຍະໃໝ່ ຄອບຄົວພົງສະຫວັນໄດ້ມີການເລີ່ມຕົ້ນດຳເນີນທຸລະກິດ ໃນເບື້ອງຕົ້ນໄດ້ຮ່ວມກັບອົງການຈັດຕັ້ງຂອງພັກລັດ ດຳເນີນທຸລະກິດການຜະລິດ ແລະ ການບໍລິການ ຜະລິດໄມ້ແປຮູບທີ່ຕົກຄ້າງຂາຍຢູ່ພາຍໃນ ແລະ ສົ່ງອອກຕ່າງປະເທດ ຫຼັງຈາກນັ້ນ ກໍມີການເຕີບໃຫຍ່ຂະຫຍາຍຕົວຈາກບໍລິສັດດຽວມາເປັນ  17 ຫົວໜ່ວຍບໍລິສັດທີ່ທັນສະໄໝ ເຂັ້ມແຂງຂຶ້ນເລື້ອຍໆ ສາມາດແຂ່ງຂັນກັບພາກພື້ນ ແລະ ສາກົນໄດ້ ມີກຳມະກອນ ແລະ ຊາວຜູ້ອອແຮງງານຫຼາຍກວ່າ 3.000 ຄົນ ພ້ອມດຽວກັນນັ້ນ ກໍໄດ້ປະກອບສ່ວນຢ່າງຕັ້ງໜ້າ ໃນການເສຍພາສີອາກອນໃຫ້ແກ່ລັດຖະບານໃນແຕ່ລະປີຫຼາຍກວ່າ 60 ລ້ານໂດສະຫະລັດ ແລະ ໄດ້ປະກອບສ່ວນຊ່ວບເຫຼືອສັງຄົມຕະຫຼອດມາ.

     ຫຼັງຈາກນັ້ນ ກໍໄດ້ຮັບຟັງຂໍ້ຕົກລົງວ່າດ້ວຍການສ້າງຕັ້ງສະຫະພັນກຳມະບານກຸ່ມບໍລິສັດພົງສະຫວັນ ຂໍ້ຕົກລົງວ່າດ້ວຍການຮັບມະຫາຊົນກ້າວໜ້າຂອງກຸ່ມບໍລິສັດພົງສະຫວັນເຂົ້າເປັນສະມາຊິກກຳມະບານລາວ ໂດຍໄດ້ຕົກລົງຮັບເອົາມະຫາຊົນກ້າວໜ້າເຂົ້າເປັນສະມາຊິກກຳມະບານລາວ 252 ຄົນ ຍິງ 106 ຄົນ ພ້ອມດຽວກັນນີ້ ກໍໄດ້ແຕ່ງຕັ້ງທ່ານ ສຸດທິເດດ ນາລີວັນ ເປັນປະທານ ທ່ານວຽງຄອນ ສິດທິໄຊ ເປັນຮອງປະທານ ແລະ ປະທານກວດກາ ສະຫະພັນກຳມະບານກຸ່ບບໍລິສັດພົງສະຫວັນ ແລະ 3 ທ່ານເປັນຄະນະ ຕອນທ້າຍພິທີ ໄດ້ຮັບຟັງການໂອ້ລົມຂອງທ່ານ ດາວເພັດ ອາລຸນ ອີກດ້ວຍ.

..

# ຂ່າວ- ພາບ : ອົ່ນ ໄຟສົມທອງ

error: Content is protected !!