ຄອບຄົວທຸກຍາກເມືອງຮົ່ມ ໄດ້ຮັບເຄື່ອງຊ່ວຍເຫຼືອ

    ວັນທີ 17 ມັງກອນ 2022 ທ່ານນາງ ນາລີ ສີສຸລິດ ພັນລະຍາປະທານປະເທດ ປະທານກິດຕິມະສັກ ໂຄງການຈິດອາສາຄອບຄົວການນໍາ ຮ່ວມກັບນັກທຸລະກິດລາວ ໄດ້ນໍາພາຄະນະກໍາມາທິການຕ່າງປະ ເທດ ສູນກາງອົງການພຸດທະສາສະໜາສໍາພັນແຫ່ງ ສປປ ລາວ ສະມາຊິກຈິດອາສາຄອບຄົວການນໍາ ຮ່ວມກັບນັກທຸລະກິດລາວ ສະມາຄົມຊ່ວຍເຫຼືອ ແລະ ບັນເທົາທຸກ ນະຄອນຫຼວງວຽງຈັນ ພ້ອມດ້ວຍປະຊາ ຊົນນະຄອນຫຼວງວຽງຈັນ ໄດ້ໄປຢ້ຽມຢາມ ແລະ ມອບເຄື່ອງຊ່ວຍເຫຼືອປະຊາຊົນທີ່ທຸກຍາກບ້ານນໍ້າຄຽນ ແລະ ບ້ານຜາລະແວກ ເມືອງຮົ່ມ ແຂວງໄຊສົມບູນ ຖືກຕ້ອນຮັບໂດຍທ່ານ ຕົງມົວ ຊົວໂກ້ ຮອງເຈົ້າແຂວງ ໄຊສົມບູນ ພ້ອມດ້ວຍພະແນກການກ່ຽວຂ້ອງແຂວງ ການນໍາເມືອງຮົ່ມ ອໍານາດການປົກຄອງບ້ານ ແລະ ປະຊາຊົນສອງບ້ານ.

    ທ່ານ ກົງຄໍາ ສຸທໍາມະວົງ ຮອງເຈົ້າເມືອງຮົ່ມ ໄດ້ຂຶ້ນລາຍງານຫຍໍ້ກ່ຽວກັບສະພາບການພັດທະນາ ແລະ  ແກ້ໄຂຄວາມທຸກຍາກຂອງປະຊາຊົນເມືອງຮົ່ມໃນໄລຍະຜ່ານມາ ເຊິ່ງເຫັນວ່າເມືອງຮົ່ມເປັນເມືອງ ໜຶ່ງໃນ 48​ ເມືອງທຸກຍາກໃນທົ່ວປະເທດ ປັດຈຸບັນ ມີຄອບຄົວທຸກຍາກ 1.102 ຄອບຄົວ ທຽບໃສ່ດໍາລັດ 348 ຂອງລັດຖະບານ ຜ່ານມາ ລັດຖະບານ ກໍຄືແຂວງ ໄດ້ສຸມທຶນຮອນເຂົ້າໃສ່ການພັດທະນາ ໂດຍສະ ເພາະ ການກໍ່ສ້າງພື້ນຖານໂຄງລ່າງ ເພື່ອສ້າງເງື່ອນໄຂອໍານວຍຄວາມສະດວກໃຫ້ປະຊາຊົນໃນການ ພັດທະນາແກ້ໄຂຊີວິດການເປັນຢູ່ໃຫ້ດີຂຶ້ນເທື່ອລະກ້າວ  ນອກນີ້ ລັດຖະບານ ແລະ ອົງການຈັດຕັ້ງຕ່າງໆ ຍັງໄດ້ມີກອງທຶນຕ່າງໆຊ່ວຍເຫຼືອບ້ານ ແລະ ຄອບຄົວທຸກຍາກຢູ່ພາຍໃນເມືອງ ເປັນຕົ້ນ ກອງທຶນບ້ວງ 500 ລ້ານ ແລະ ກອງທຶນງົວໜູນວຽນ ເຊິ່ງກອງທຶນ 500 ລ້ານຂອງລັດຖະບານ ປັດຈຸບັນມີ 9 ບ້ານ 9 ກອງທຶນ ປັດຈຸບັນມີທຶນທັງໝົດ 1,36 ຕື້ກີບ ທຶນງົວໜູນວຽນມີ ມີ 8 ບ້ານ ມີງົວ 310 ໂຕ ມີຄອບຄົວລ້ຽງ ງົວ 270 ຄອບຄົວ.

    ແຕ່ເຖິງຢ່າງໃດກໍຕາມ ເຖິງວ່າພັກ-ລັດຖະບານ ແລະ ການຈັດຕັ້ງທຸກພາກສ່ວນໄດ້ສຸມທຶນຮອນເພື່ອ ແກ້ໄຂຄວາມທຸກຍາກແລ້ວກໍຕາມແຕ່ ຖ້າທຽບໃສ່ແຜນແກ້ໄຂຄວາມທຸກຍາກຂອງເມືອງ ແລະ ຍັງເຫັນວ່າ ບໍ່ທັນບັນລຸຕາມເປົ້າໝາຍທີ່ວາງໄວ້ ໂດຍສະເພາະ ບ້ານຜາລະແວກ ເປັນບ້ານໜຶ່ງທີ່ເປັນບ້ານພື້ນຖານ ການປະຕິວັດ ແຕ່ບ້ານຍັງມີຄອບຄົວທຸກຍາກ 192 ຄອບຄົວ ໃນນີ້ມີ 15 ຄອບຄົວເຫັນວ່າຍັງທຸກຍາກຫຼາຍ ກວ່າໜູ່ ຕ້ອງໄດ້ແກ້ໄຂເປັນພິເສດຈຶ່ງຈະໄດ້ ສະນັ້ນ ຕໍ່ກັບສະພາບການດັ່ງກ່າວ ຜ່ານມາທາງແຂວງ ກໍຄືເມືອງຮົ່ມ ໄດ້ແຕ່ງຕັ້ງຄະນະກໍາມະການແກ້ໄຂຄວາມທຸກຍາກສະເພາະ 15 ຄອບຄົວນີ້ຂຶ້ນ ຄະນະກໍາມະ ການໄດ້ປະສານສົມທົບເກັບກໍາຂໍ້ມູນດ້ານຕ່າງໆຄືນ ເປັນຕົ້ນ ຂໍ້ມູນເນື້ອທີ່ຈັດສັນທີ່ດິນທໍາການຜະລິດ ດ້ານທີ່ຢູ່ອາໄສ ແລະ ດ້ານເສັ້ນທາງເຂົ້າເຂດທໍາການຜະລິດ.

    ຜ່ານການລົງເກັບກໍາຂໍ້ມູນລະອຽດ ເຫັນວ່າດ້ານເນື້ອທີ່ທໍາການຜະລິດກໍານົດເອົາຢູ່ເຂດຍອດນໍ້າມັງ ເນື້ອທີ່ 44,7 ເຮັກຕາ ທີ່ເໝາະສົມກັບການປູກຝັງ-ລ້ຽງສັດ ຕັ້ງຢູ່ຫ່າງຈາກບ້ານປະມານ 9 ກິໂລແມັດ ດ້ານທີ່ຢູ່ອາໄສມີ 5 ຄອບຄົວມີດິນປຸກສ້າງເປັນຂອງຕົນເອງ 5 ຄອບຄົວຢູ່ນໍາດິນພີ່ນ້ອງຊົ່ວຄາວ ແລະ 4 ຄອບຄົວບໍ່ມີດິນປຸກສ້າງ ທາງບ້ານຈັດສັນໃຫ້ແຕ່ລະເຮືອນຍັງເປັນປະຖົມປະຖານ ບໍ່ແໜ້ນໜາຖາວອນ ຊຸດ ໂຊມຫຼາຍ ດັ່ງນັ້ນ ຕ້ອງໄດ້ປຸກສ້າງເຮືອນໃໝ່ ແລະ ສ້ອມແປງໃຫ້ເຂົາເຈົ້າ ມູນຄ່າປະມານ 600-700 ລ້ານກີບ ສ້າງ ແລະ ສ້ອມແປງເສັ້ນທາງໄປຫາບ່ອນທໍາການຜະລິດກວ້າງ 5 ແມັດ ຍາວ 7 ກິໂລແມັດ ມູນຄ່າ 3 ຕື້ກວ່າກີບ ພ້ອມນີ້ ທ່ານຮອງເຈົ້າເມືອງຮົ່ມຍັງໄດ້ລາຍງານຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດວຽກງານແກ້ໄຂ້ຄວາມທຸກຍາກ 15 ຄອບຄົວຕື່ມອີກ. ພາຍຫຼັງຮັບຟັງລາຍງານ ແລ້ວ ການນໍາແຂວງ ເມືອງ ແລະ ວິຊາການກ່ຽວຂ້ອງ ຍັງໄດ້ນໍາພາທ່ານ ນາງ ນາລີ ສີສຸລິດ ພ້ອມຄະ ນະ ໄປຢ້ຽມຢາມພົບປະກັບຄອບຄົວທີ່ທຸກຍາກແຕ່ລະຄອບຄົວຕົວຈິງ ເພື່ອຈະໄດ້ພ້ອມກັນຊອກຫາຊ່ອງ ທາງແກ້ໄຂຮ່ວມກັນ ເພື່ອໃຫ້ຄອບຄົວທຸກຍາກໄດ້ມີເຮືອນຖາວອນຢູ່ ມີເນື້ອທີ່ທໍາການຜະລິດ ເປົ້າໝາຍ ແມ່ນມີວຽກເຮັດງານທໍາ ມີລາຍຮັບ ຫຼຸດພົ້ນອອກຈາກຄວາມທຸກຍາກ. ໃນໂອກາດການມາຢ້ຽມຢາມຄັ້ງນີ້ ທ່ານນາງ ນາລີ ສີສຸລິດ ພ້ອມຄະນະ ຍັງໄດ້ນໍາເອົາເຄື່ອງອຸປະໂພກ-ບໍລິໂພກ ເປັນຕົ້ນ ເຄື່ອງນຸ່ງຫົ່ມ ເຂົ້າ ສານ ຢາປົວພະຍາດທີ່ໄດ້ຈາກການປະກອບສ່ວນຂອງຄອບຄົວການນໍາ ນັກທຸລະກິດ ແລະ ປະຊາຊົນນະ ຄອນຫຼວງວຽງຈັນ ມອບໃຫ້ປະຊາຊົນທຸກຍາກ 20 ຄອບຄົວ ແລະ 15 ຄອບຄົວບ້ານຜາລະແວກຕື່ມອີກ.

.

# ຂ່າວ – ພາບ : ຂັນທະວີ

error: Content is protected !!