ກະຊວງສຶກສາທິການ ແລະ ກີລາ (ສສກ) ຮ່ວມກັບຫ້ອງການເລຂາຄະນະກຳມາທິການ ເພື່ອອຸຍເນັດສະໂກ ໄດ້ຈັດກອງປະຊຸມປະຈຳປີຂອງຄະນະກຳມາທິການ ແລະ ອະນຸກຳມາທິການແຫ່ງຊາດລາວ ເພື່ອອຸຍເນັດສະໂກ ໂດຍຜ່ານລະບົບຮູບແບບເຊິ່ງໜ້າ ແລະ ແບບທາງໄກ ເມື່ອບໍ່ດົນຜ່ານມາ ທີ່ຫ້ອງປະຊຸມກະຊວງສຶກສາທິການ ແລະ ກີລາ (ຕຶກ ICT) ໂດຍເປັນປະທານຂອງທ່ານ ຮສ ປອ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກີລາ ມີບັນດາຮອງລັດຖະມົນຕີຈາກກະຊວງທີ່ກ່ຽວຂ້ອງ ຫ້ອງການ ກົມ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມດັ່ງກ່າວ ຜູ້ເຂົ້າຮ່ວມໄດ້ຮັບຟັງການລາຍງານຜົນສຳເລັດຂອງກອງປະຊຸມໃຫຍ່ ຄັ້ງທີ 41 ຂອງອົງການອຸຍເນັດສະໂກ ການຂຶ້ນງົບປະມານເພື່ອເຂົ້າຮ່ວມກອງປະຊຸມໃຫຍ່ຂອງອົງການອຸຍເນັດສະໂກ ແນະນຳກ່ຽວກັບໂຄງການປະກອບສ່ວນ 2022-2023 ສ້າງຄວາມເຂົ້າໃຈກ່ຽວກັບເມືອງແຫ່ງການຮຽນຮູ້ ພ້ອມທັງຖອດຖອນບົດຮຽນ ແລະ ປຶກສາຫາລືການປະສານງານ ແລະ ຕິດຕາມວຽກຂອງອະນຸກຳມາທິການຝ່າຍຕ່າງໆ.
ນອກຈາກນີ້ ຍັງໄດ້ເຜີຍແຜ່ຂໍ້ຕົກລົງວ່າດ້ວຍການແຕ່ງຕັ້ງ ທ່ານ ຮສ ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການແລະ ກີລາ ເປັນປະທານຄະນະກຳມາທິການແຫ່ງຊາດເພື່ອອຸຍເນັດສະໂກ ທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງຖະແຫລ່ງຂ່າວ ວັດທະນະທຳ ແລະ ທ່ອງທ່ຽວ ທ່ານ ທອງພັນ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້ ແລະ ທ່ານ ໄຊນະຄອນ ອິນທະວົງ ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ເປັນຮອງປະທານ.
ໂອກາດນີ້ ທ່ານ ຮສ.ປອ ພຸດ ສິມມາລາວົງ ໄດ້ກ່າວວ່າ: ການເຂົ້າເປັນສະມາຊິກຂອງອົງການອຸຍເນັດສະໂກແມ່ນມີຄວາມສຳຄັນຫຼາຍສຳລັບ ສປປ ລາວ ໃນຖານະທີ່ປະເທດເຮົາເປັນປະເທດສະມາຊິກໃນປີ 1951 ມາຮອດປັດຈຸບັນໄດ້ 71 ປີ ເຊິ່ງພວກເຮົາໄດ້ມີພັນທະໜ້າທີ່ໃນການປະກອບສ່ວນສ້າງສັນຕິພາບຢູ່ໃນໂລກ ອັນເປັນເປົ້າໝາຍຫຼັກຂອງອົງການອຸຍເນັດສະໂກ ໃນການນຳເອົາບັນດາຫົວຄິດຂອງອົງການໄປຜັນຂະຫຍາຍ ແລະ ຈັດຕັ້ງປະຕິບັດຕາມແຜນພັດທະນາປະເທດໃນແຕ່ລະໄລຍະ.
ປັດຈຸບັນ ບັນດາປະເທດສະມາຊິກກຳລັງສູ້ຊົນໃຫ້ບັນລຸເປົ້າໝາຍການພັດທະນາແບບຍືນຍົງ ແຕ່ນີ້ຮອດປີ 2030 ເປົ້າໝາຍດັ່ງກ່າວ ໄດ້ກ່ຽວຂ້ອງກັບຫຼາຍຂະແໜງການຢູ່ ສປປ ລາວ ສະນັ້ນ ຈຶ່ງມີຄວາມສຳຄັນຫຼາຍທີ່ສຸດທີ່ບັນດາກະຊວງ ແລະ ອະນຸກຳມະການຕ້ອງໄດ້ເອົາໃຈໃສ່ປະກອບສ່ວນ ເພື່ອບັນລຸບັນດາເປົ້າໝາຍດັ່ງກ່າວ.
# ຂ່າວ & ພາບ : ບຸນມີ