ການດັບມອດໄຟໄໝ້ຢູ່ສະໜາມບໍາບັດຂີ້ເຫຍື້ອ ຫຼັກ 32 ປັດຈຸບັນ ສຸມໃສ່ດັບຄວັນສີຂາວໃຫ້ຫຼຸດລົງຕາມລໍາດັບ ຈົນກວ່າຈະສິ້ນສຸດ

    ວັນທີ 1 ກຸມພາ 2021 ທີ່ສະຖານິວິທະຍຸ ແລະ ໂທລະພາບ ນະຄອນຫຼວງວຽງຈັນ (ນວ)  ທ່ານ ບຸນຈັນ ແກ້ວສີທໍາມະ ຫົວໜ້າຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ (ຄບຕ) ໄດ້ຖະແຫຼງຂ່າວກ່ຽວກັບສະພາບເກີດເຫດໄຟໄໝ້ຢູ່ສະໜາມບໍາບັດຂີ້ເຫຍື້ອ ຫຼັກ 32 ບ້ານນາຜາສຸກ ເມືອງໄຊທານີ ນວ ໂດຍມີທ່ານ ທ່ານ ແອງພອນ ແພງສຸວັນ ຮອງຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ນວ ແລະ ທ່ານ ບົວລີ ແກ້ວມະນີວັນ ຮອງເລຂາພັກເມືອງ ປະທານກວດກາພັກ-ອົງການກວດກາລັດ ເມືອງໄຊທານີ ເຂົ້າຮ່ວມ.

    ທ່ານ ບຸນຈັນ ແກ້ວສີທໍາມະ ໃຫ້ຮູ້ວ່າ: ເຫດໄຟໄໝ້ຢູ່ສະໜາມບໍາບັດຂີ້ເຫຍື້ອ ຫຼັກ 32 ເກີດຈາກຫຼາຍປັດໄຈ ເນື່ອງຈາກວ່າໃນສະໜາມຂີ້ເຫຍື້ອມີຫຼາກຫຼາຍວັດສະດຸທັບຖົມກັນ ເຊິ່ງກໍ່ໃຫ້ເກີດມີແກັດຢູເທນໃຕ້ດິນ ແລະ ເກີດຈາກຕົວມັນເອງ ສາມາດເກີດໄຟໄດ້ຕະຫຼອດເວລາ ໃນວັນທີ 29 ມັງກອນ 2022 ເວລາ 12:20 ໂມງ ພະນັກງານເຫັນຄວັນໄຟໄໝ້ຢູ່ຂຸມຂີ້ເຫຍື້ອ ໝາຍເລກ 1 ເບື້ອງຕົ້ນ ໄດ້ເອົາລົດນໍ້າປະຈຳສະໜາມໄປມອດ ແຕ່ຈຸດເກີດເຫດແມ່ນຢູ່ເທິງເຄິ່ງກາງຂຸມຂີ້ເຫຍື້ອ (ຂຸມຂະໜາດເນື້ອທີ່ 200×200 ມ) ເຮັດໃຫ້ລົດສີດນໍ້າເຂົ້າໄປບໍ່ທົ່ວເຖິງ ບວກກັບສະພາບອາກາດແຫ້ງ ລົມພັດແຮງ ເຮັດໃຫ້ໄຟໃໝ້ລາມອອກເປັນບໍລິເວນກວ້າງຢ່າງວ່ອງໄວ ຈາກນັ້ນ ພະນັກງານໄດ້ປະສານດ່ວນໄປຫາກອງມອດໄຟ ນວ ເມືອງໄຊທານີ ແລະ ຫ້ອງການ ຄບຕ ເພື່ອມາຊ່ວຍມອດໄຟ ຮອດເວລາປະມານ 13:30 ໂມງ ມີລົດດັບເພີງຈາກເມືອງໄຊທານີມາຮອດສະໜາມ 1 ຄັນ ບວກກັບລົດນ້ຳປະຈຳສະໜາມ 1 ຄັນ ແລະ ເວລາປະມານ 14:00 ໂມງ ລົດຈາກຫ້ອງການ ຄບຕ 4 ຄັນ ແລະ ລົດດັບເພີງໃຫຍ່ຈາກກົມມອດໄຟ ກະຊວງ ປກສ ມາ 3 ຄັນ ໄດ້ປະຕິບັດການມອດໄຟຢ່າງຕໍ່ເນື່ອງ ການປະຕິບັດວຽກງານພົບຄວາມຫຍຸ້ງຍາກ ເນື່ອງຈາກມີສະພາບລົມແຮງ ລົມປ່ຽນທິດທາງໄປມາ ມີຄວັນຈຳນວນຫຼາຍ ເຈົ້າໜ້າທີ່ດັບເພິ່ງຈາກກົມມອດໄຟ ກະຊວງ ປກສ ໄດ້ວາງແຜນນໍາໃຊ້ລົດດັບເພີງສົດປ້ອງກັນການແຜ່ລາມບໍ່ໃຫ້ໄຟໃໝ້ສິ່ງປຸກສ້າງທີ່ສໍາຄັນເຊັ່ນ: ຫ້ອງການ ໂຮງງານເກັບຊື້ເສດຊຸມຊົນ ເຕົາເຜົາຂີ້ເຫຍື້ອຕິດເຊື້ອ ແລະ ອື່ນໆ ຈົນມາຮອດເວລາປະມານ 2:30 ໂມງ ຕອນເຊົ້າຂອງວັນທີ 30 ມັງກອນ ແປວໄຟຈົ່ງຄອຍຈາງລົງເປັນສ່ວນຫຼາຍ ໂດຍສາມາດປ້ອງກັນການເສຍຊີວິດ ແລະ ຊັບສິນທີ່ສຳຄັນໄວ້ໄດ້.

    ອີງໃສ່ການປົນສໍາຫຼວດຂອງໂດຣນທີ່ສະຖາບັນຄົ້ນຄວ້າຊັບພະຍາກອນທໍາມະຊາດ ແລະ ສິ່ງແວດລ້ອມໄດ້ເອົາມາບິນສໍາຫຼວດ ຄັ້ງວັນທີ 30 ມັງກອນ ຜ່ານການສັງເກດເບິ່ງເນື້ອທີ່ຖືກໄຟໄໝ້ລຸກລາມ ກວມເອົາ 70% ຂອງເນື້ອທີ່ຂຸມຂີ້ເຫຍື້ອທັງໝົດ 48,2 ເຮັກຕາ ໄຟໄໝ້ປະເມີນໄດ້ 33,74 ເຮັກຕາ ແລະ ຍັງເຫຼືອປະມານ 14.46 ທີ່ຍັງບໍ່ຖືກໄໝ້ ແຕ່ກໍມີຄວາມສ່ຽງສູງຫຼາຍຈະຖືກລູກລາມໄໝ້ ໄຟໄໝ້ຄັ້ງນີ້ ເຮັດໃຫ້ເກີດຄວັນດໍາ ໝອກໝາປົກຄຸມເປັນໄລຍະຫຼາຍກິໂລແມັດ ເຮັດໃຫ້ປະຊາຊົນບາງເຂດໄດ້ຮັບຜົນກະທົບທາງດ້ານກິ່ນຂິວ.

    ສໍາລັບການດໍາເນີນການປະຕິບັດໄຟ ໄດ້ສົມທົບກັບເຈົ້າໜ້າທີ່ດັບເພີງຈາກກົມມອດໄຟ ກະຊວງ ປກສ ວາງແຜນນຳໃຊ້ລົດສີດນ້ຳປ້ອງກັນຄວບຄຸມພື້ນທີ່ບໍ່ໃຫ້ໄຟແຜ່ລາມອອກກວ້າງ ອີງໃສ່ບົດຮຽນປະສົບການໃນປີ 2018 ໄດ້ເອົາດິນມາຖົມເປັນທາງຜ່າເຂົ້າກອງຂີ້ເຫຍື້ອທີ່ໃໝ້ ດຸດເປັນທາງລັກສະນະເປັນກ້າງປາ ໃຊ້ລົດນໍ້າສີດໄປນໍາ ແລະ ລົດດັບເພີງສົດມອດບໍ່ໃຫ້ເກີດປະກາຍໄຟ (ດິນຖົມເຮັດໃຫ້ຂີ້ເຫຍື້ອທີ່ໄໝ້ຢູ່ລຸ່ມຂາດອົກຊີ ໄຟຈະດັບໄປ ແລະ ສີດພົ່ມນໍ້າໃຫ້ຂີ້ເຫຍື້ອມີຄວາມຊຸ່ມ ຈະບໍ່ກັບມາໄໝ້ຄືນ) ສໍາລັບເວລາກາງຄືນ ໄດ້ແປງຈຸປະຈໍາການລົງກວດກາຕິດຕາມແປວໄຟ ພ້ອມທັງຜັດປ່ຽນສີດນ້ຳບໍລິເວນລຽບແຄມທາງທີ່ລົດສາມາດເຂົ້າເຖິງ ອີງຕາມການຈັດຕັ້ງປະຕິບັດວຽກງານຕາມແຜນທີ່ໄດ້ວາງໄວ້ ແລະ ຈຳນວນພາຫະນະທີ່ມີໃນປັດຈຸບັນມີ ພາກສ່ວນເຈົ້າໜ້າທີ່ດັບເພີງ ແລະ ການປະກອບສ່ວນພາຫະນະຈາກພາກສ່ວນຕ່າງໆ) ຄາດຄະເນຈະໃຊ້ເວລາໃນການມອດໄຟປະມານ 10 ວັນ ຈາກນັ້ນ ຫ້ອງການ ຄບຕ ຈະສືບຕໍ່ປະຕິບັດວຽກງານແຕ່ລະຂັ້ນຕອນຕາມແຜນຈົນສຳເລັດ ມາຮອດວັນທີ 31 ມັງກອນ ໄຟໄດ້ຖືກດັບມອດແລ້ວ ປັດຈຸບັນ ສຸມໃສ່ດັບຄວັນສີຂາວໃຫ້ຫຼຸດລົງຕາມລໍາດັບຈົນກວ່າຈະສິ້ນສຸດ.

.

.# ຂ່າວ & ພາບ : ຂັນທະວີ

error: Content is protected !!