ສະພາບການເກີດອຸບັດເຫດທົ່ວປະເທດຫຼຸດລົງ ສ່ວນໜຶ່ງແມ່ນຍ້ອນການປະຕິບັດຄຳສັ່ງ ເລກທີ 06/ນຍ

ໃນ​ເດືອນ​ເມ­ສາ​ທີ່​ຜ່ານ​ມາ ສະ­ພາບ​ການ​ເກີດ​ອຸ­ບັດ­ເຫດ​ທາງ​ຖະ­ໜົນ​ໃນ​ທົ່ວ​ປະ­ເທດ​ແມ່ນ​ຫຼຸດ​ລົງ​ຢ່າງ​ເຫັນ​ໄດ້​ຊັດ ສ່ວນ​ໜຶ່ງ​ແມ່ນ​ມາ​ຈາກ​ທຸກໆ​ພາກ­ສ່ວນ​ໃນ​ຂອບ​ເຂດ​ທົ່ວ​ປະ­ເທດ ໄດ້​ປະ­ຕິ­ບັດ​ຕາມ​ຄຳ​ສັ່ງ​ເລກ​ທີ 06/ນຍ ກ່ຽວ​ກັບ​ການ​ປ້ອງ​ກັນ ຄວບ​ຄຸມ ແລະ ແກ້​ໄຂ​ການ​ແຜ່​ລະ­ບາດ​ເຊື້ອ​ພະ­ຍາດ​ໂຄ​ວິດ-19 ໂດຍ​ການ​ກັກ​ໂຕ​ເອງ ແລະ ຄອບ­ຄົວ​ຢູ່​ພາຍ​ໃນ​ເຮືອນ​ເປັນ​ເວ­ລາ​ໜຶ່ງ​ເດືອນ ເຊິ່ງ​ເລີ່ມ​ຈັດ​ຕັ້ງ​ປະ­ຕິ­ບັດ​ແຕ່​ວັນ​ທີ 1 ເມ­ສາ-3 ພຶດ­ສະ­ພາ 2020 ແຕ່​ຄຽງ​ຄູ່​ກັນ​ນີ້ ກໍ​ຍັງ​ມີ​ປະ­ຊາ­ຊົນ​ສ່ວນ​ໜຶ່ງ ທີ່​ຍັງ​ຖື​ເບົາ ລະ​ເຫຼີງ ບໍ່​ສົນ­ໃຈ​ຕໍ່​ຄຳ​ສັ່ງ​ຄຳ​ແນະ­ນຳ​ດັ່ງ­ກ່າວ​ນີ້ ໂດຍ​ຝ່າ­ຝືນ​ຕໍ່​ຄຳ​ສັ່ງ ຂັບ​ຂີ່​ລົດ​ອອກ​ຈາກ​ບ້ານ​ໂດຍ​ບໍ່​ມີ​ເຫດ​ອັນ​ຈຳ­ເປັນ ສຸດ​ທ້າຍ​ກໍ່​ເກີດ​ມີ​ອຸ­ບັດ​ຕິ​ເຫດ​ຕາມ​ມາ ເຮັດ​ໃຫ້​ມີ​ຜູ້​ໄດ້​ຮັບ​ບາດ­ເຈັບ ແລະ ເສຍ​ຊີ­ວິດ​ເປັນ​ຈຳ­ນວນ​ຫຼວງ­ຫຼາຍ.

ອີງ​ຕາມ​ຂໍ້​ມູນ​ຂອງ​ກົມ​ຕຳ­ຫຼວດ​ຈະ­ລາ­ຈອນ ກົມ​ໃຫຍ່​ຕຳ­ຫຼວດ ກະ­ຊວງ​ປ້ອງ​ກັນ​ຄວາມ​ສະ­ຫງົບ ຊາບ​ວ່າ: ໃນ​ເດືອນ​ເມ­ສາ 2020 ຜ່ານ​ມາ ທົ່ວ​ປະ­ເທດ​ມີ​ອຸ­ບັດ​ຕິ​ເຫດ​ເກີດ​ຂຶ້ນ​ທັງ​ໝົດ 435 ລາຍ ມີ​ຄົນ​ເສຍ​ຊີ­ວິດ​ຈຳ­ນວນ 71 ຄົນ ນະ­ຄອນ­ຫຼວງ​ວຽງ​ຈັນ​ຍັງ​ຄອງ​ອັບ​ດັບ​ການ​ເກີດ​ອຸ­ບັດ​ຕິ​ເຫດ ແລະ ຄົນ​ເສຍ​ຊີ­ວິດ​ຫຼາຍ​ກວ່າ​ແຂວງ​ອື່ນໆ.

ການ​ເກີດ​ອຸ­ບັດ­ເຫດ​ແຕ່​ລະ​ຄັ້ງ ເຮັດ​ໃຫ້​ມີ​ພາ­ຫະ­ນະ​ເປ່​ເພ​ທັງ​ໝົດ 719 ຄັນ ໃນ​ນີ້ ເປ່​ເພ​ເລັກ​ໜ້ອຍ 320 ຄັນ ສົມ­ຄວນ 376 ຄັນ ໃຊ້​ການ​ບໍ່​ໄດ້ 23 ຄັນ ມີ​ຄົນ​ໄດ້​ຮັບ​ບາດ­ເຈັບ​ທັງ​ໝົດ 557 ຄົນ ໃນ​ນີ້ ບາດ­ເຈັບ​ເລັກ​ໜ້ອຍ 243 ຄົນ ສົມ­ຄວນ 227 ຄົນ ສາ­ຫັດ 87 ຄົນ ແລະ ເສຍ​ຊີ­ວິດ 71 ຄົນ ຍິງ 8 ຄົນ.

ໂດຍ​ອີງ​ຕາມ​ສະ­ຖິ­ຕິ​ການ​ເກີດ​ອຸ­ບັດ­ເຫດ ນະ­ຄອນ­ຫຼວງ​ວຽງ​ຈັນ ມີ​ອຸ­ບັດ­ເຫດ​ເກີດ​ຂຶ້ນ 64 ຄັ້ງ ເສຍ​ຊີ­ວິດ 11 ຄົນ ຜົ້ງ​ສາ­ລີ 5 ຄັ້ງ ເສຍ​ຊີ­ວິດ 0 ຄົນ ອຸ­ດົມ​ໄຊ 19 ຄັ້ງ ເສຍ​ຊີ­ວິດ 6 ຄົນ ຫຼວງ​ນ້ຳ​ທາ 13 ຄັ້ງ ເສຍ​ຊີ­ວິດ 1 ຄົນ ບໍ່​ແກ້ວ 6 ຄັ້ງ ເສຍ​ຊີ­ວິດ 3 ຄົນ ໄຊ​ຍະ​ບູ​ລີ 23 ຄັ້ງ ເສຍ​ຊີ­ວິດ 4 ຄົນ ຫຼວງ​ພະ​ບາງ 26 ຄັ້ງ ເສຍ​ຊີ­ວິດ 2 ຄົນ ຫົວ­ພັນ 9 ຄັ້ງ ເສຍ​ຊີ­ວິດ 0 ຄົນ ຊຽງ​ຂວາງ 5 ຄັ້ງ ເສຍ​ຊີ­ວິດ 1 ຄົນ ໄຊ​ສົມ­ບູນ 6 ຄັ້ງ ເສຍ​ຊີ­ວິດ 0 ຄົນ ວຽງ​ຈັນ 46 ຄັ້ງ ເສຍ​ຊີ­ວິດ 5 ຄົນ ບໍ​ລິ​ຄຳ​ໄຊ 17 ຄັ້ງ ເສຍ​ຊີ­ວິດ 5 ຄົນ ຄຳ​ມ່ວນ 5 ຄັ້ງ ເສຍ​ຊີ­ວິດ 2 ຄົນ ສະ­ຫວັນ​ນະ​ເຂດ 57 ຄັ້ງ ເສຍ​ຊີ­ວິດ 8 ຄົນ ສາ­ລະ​ວັນ 46 ຄັ້ງ ເສຍ​ຊີ­ວິດ 3 ຄົນ ຈຳ­ປາ​ສັກ 60 ຄັ້ງ ເສຍ​ຊີ­ວິດ 10 ຄົນ ເຊ​ກອງ 11 ຄັ້ງ ເສຍ​ຊີ­ວິດ 4 ຄົນ ແລະ ແຂວງ​ອັດ​ຕະ​ປື 17 ຄັ້ງ ເສຍ​ຊີ­ວິດ 6 ຄົນ ລວມ​ຜູ້​ເສຍ​ຊີ­ວິດ​ທົ່ວ​ປະ­ເທດ​ທັງ​ໝົດ 71 ລາຍ.

ສາ­ເຫດ​ຕົ້ນ­ຕໍ​ຂອງ​ການ​ເກີດ​ອຸ­ບັດ­ເຫດ ແມ່ນ​ເມົາ​ແລ້ວ​ຂັບ​ຂັບ ຂີ່​ໄວ​ເກີນ​ກຳ­ນົດ ບໍ່​ເຄົາ­ລົບ​ກົດ​ລະ­ບຽບ​ຈະ­ລາ­ຈອນ ບໍ່​ໃຫ້​ກຽດ​ກັບ​ຜູ້​ໃຊ້​ເສັ້ນ­ທາງ​ຮ່ວມ​ກັນ ແຊ້ງ​ຊ້າຍ-ຂວາ​ບໍ່​ຮັບ­ປະ­ກັນ ແລະ ອື່ນໆ ສະ­ນັ້ນ ເພື່ອ​ຫຼຸດ­ຜ່ອນ​ການ​ເກີດ​ອຸ­ບັດ­ເຫດ ມັນ​ຈຶ່ງ​ໄດ້​ຮຽກ­ຮ້ອງ​ໃຫ້​ທຸກ​ຄົນ​ຮ່ວມ​ໃຈ​ກັນ ປະ­ຕິ­ບັດ​ກົດ​ລະ­ບຽບ​ການ​ສັນ­ຈອນ​ທາງ­ບົກ​ໃຫ້​ເຄັ່ງ​ຄັດ ມີ​ສະ­ຕິ​ໃນ​ການ​ຂັບ​ຂີ່​ແຕ່​ລະ​ຄັ້ງ ສິ່ງ​ສຳ­ຄັນ​ຄື​ບໍ່​ປະ­ໝາດ ເມົາ​ແລ້ວ​ຫ້າມ​ຂັບ ຂັບ​ຂີ່​ລົດ­ຈັກ​ຕ້ອງ​ໃສ່​ໝວກ​ກັນ​ກະ­ທົບ ແລະ ກວດ­ກາ​ສະ­ພາບ​ລົດ​ໃຫ້​ມີ​ຄວາມ​ພ້ອມ ແລ້ວ​ຈຶ່ງ​ອອກ​ເດີນ­ທາງ.

ຕິດຕໍ່ພວກເຮົາ