ການສະເຫຼີມສະຫຼອງບຸນປີໃໝ່ລາວ ພສ 2565 ຢູ່ນະຄອນຫຼວງວຽງຈັນ ສືບຕໍ່ປົກປັກຮັກສາຮີດຄອງປະເພນີອັນດີງາມຂອງຊາດ ໄປພ້ອມໆກັບການເອົາໃຈໃສ່ໃນການເປັນເຈົ້າການປະຕິບັດມາດຕະການປ້ອງກັນໂຄວິດ-19.
ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ໃຫ້ສຳພາດໃນໂອກາດເຂົ້າຮ່ວມພິທີຫົດສົງພະເຈົ້າອົງຄຳໃນວັນທີ 14 ເມສາ 2022 ວ່າ: ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໄດ້ເປັນເຈົ້າການໃນພິທີຫົດສົງພຸດທະຮູບພະເຈົ້າອົງຄຳໃນກົມມະລຽນພະທາດຫຼວງ ເຊິ່ງການຈັດພິທີແມ່ນໜຶ່ງໃນບັນດາຄາດໝາຍທີ່ອົງການປົກຄອງນະຄອນຫຼວງວຽງຈັນວາງອອກ ໂດຍສະເພາະການສະເຫຼີມສະ ຫຼອງບຸນປີໃໝ່ລາວ ພສ 2565 ກໍຄື ຄາດໝາຍທີໜຶ່ງໃນການປົກປັກຮັກສາຮີດຄອງປະເພນີອັນດີງາມຂອງຊາດໃນການຫຼີ້ນບຸນປີໃໝ່ ເຊິ່ງໃນພິທີຫົດສົງພະເຈົ້າອົງຄຳແມ່ນໄດ້ມີການຈຳກັດການຈັດພິທີຢ່າງເຂັ້ມງວດ ໂດຍໄດ້ນິມົນນຳພະສົງຈຳນວນ 35 ອົງ ສ່ວນການຈັດຕັ້ງ ອອກຕົນຍາດໂຍມລວມທັງເຈົ້າພາບເຈົ້າສັດທາທັງຫຼາຍລວມມີ 100 ຄົນ ເຊິ່ງການຈັດພິທີແມ່ນເນັ້ນໃສ່ການປ້ອງກັນການລະບາດຂອງພະຍາດໂຄວິດ-19 ເຮັດໃຫ້ພິທີດັ່ງກ່າວໄດ້ສຳເລັດຢ່າງຈົບງາມ ໃນໂອການບຸນປີໃໝ່ລາວ ພສ 2565 ຂ້າພະເຈົ້າໃນນາມຕາງໜ້າໃຫ້ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ຂໍອວຍພອນໄຊອັນປະເສີດມາແດ່ການນຳພັກ-ລັດ ພໍ່ແມ່ພີນ້ອງນັກທຸລະກິດ ຊາວຄ້າຂາຍ ຕະຫຼອດເຖິງນາຍ ແລະ ພົນທະຫານ ຕຳຫຼວດ ໃນຂອບເຂດທົ່ວປະເທດ ໃຫ້ມີສຸຂະພາບແຂງແຮງປາສະຈາກໂລກໄພໄຂ້ເຈັບ ມີແຕ່ຄວາມສຸກຄວາມຈະເລີນ ພ້ອມກັນພັດທະນານະຄອນຫຼວງວຽງຈັນ ກໍຄື ປະເພດຊາດຂອງພວກເຮົາໃຫ້ມີຄວາມຈະເລີນກ້າວໜ້າ ແລະ ຈະເລີນຮຸ່ງເຮືອງຕະຫຼອດໄປ.
ທ່ານ ນາງ ບົວວຽງ ເພັດທະລານຄຳ ກຳມະການສູນກາງແນວລາວສ້າງຊາດ ປະທານບໍລິສັດເພັດບັນດິດ ກໍ່ສ້າງ
ທ່ານ ນາງ ບົວວຽງ ເພັດທະລານຄຳ ກຳມະການສູນກາງແນວລາວສ້າງຊາດ ປະທານບໍລິສັດເພັດບັນດິດ ກໍ່ສ້າງ ຕາງໜ້າເຈົ້າສັດທາ ໃຫ້ສຳພາດວ່າ: ໃນວັນສັງຂານລ່ວງຂອງທຸກໆປີ ກໍໄດ້ຈັດພິທີເອົາພະລົງເພື່ອຫົດສົງຕາມຮີດຄອງປະເພນີ ແຕ່ຍ້ອນສະພາບການລະບາດຂອງໂຄວິດ-19 ການຫົດສົງພະເຈົ້າອົງຄຳແມ່ນໄດ້ເຮັດແບບນ້ອຍໆ ມີການຈຳກັດຈຳນວນແຂກເຂົ້າຮ່ວມ ໂດຍມີພຽງ ການນຳນະຄອນຫຼວງວຽງຈັນ ເມືອງ ເຖົ້າແກ່ແນວໂຮມ ເພື່ອປະຕິບັດຕາມຮີດຄອງປະເພນີອັນດີງາມທີ່ບໍ່ໄດ້ປະລະໃຫ້ໝອງຄອງບໍ່ໃຫ້ເສົ້າ ຢ່າງໃດກໍຕາມ ໃນໂອກາດບຸນປີໃໝ່ລາວ ຂ້າພະເຈົ້າຕາງໜ້າໃຫ້ບັນດາບໍລິສັດ ກໍຄື ຜູ້ປະກອບການໃນບໍລິເວນສະໜາມຫຼວງຂໍອວຍພັນການນຳພັກ-ລັດ ກໍຄືປະຊາຊົນຊາວລາວນະຄອນຫຼວງວຽງຈັນ ປະຊາຊົນລາວໃນຂອບເຂດທົ່ວປະເທດ ຈົ່ງມີສຸຂະພາບແຂງແຮງພ້ອມກັນຜ່າວິກິດໂຄວິດນີ້ໄປ.
ຢ່າງໃດກໍຕາມ ເຖິງແມ່ນວ່າ ກິດຈະກຳຕ່າງໆໄດ້ຖືກສັ່ງໂຈະ ແຕ່ຮີດເກົ່າຄອງເດີມຂອງປະຊາຊົນລາວຍັງສືບຕໍ່ປະຕິບັດທີ່ຮັກສາໄດ້ເອກະລັກວັດທະນະທຳ ແລະ ຮິດຄອງປະເພນີອັນດີງາມຊາດລາວ ໄວ້ຄົງຢູ່ກັບຄົນລາວຕະຫຼອດໄປ.