ອັກຄີໄພເລື່ອງໃຫຍ່ກວ່າທີ່ຄິດ

ບັນ­ຫາ​ເລື່ອງ​ໄຟ ຫຼື ໄຟ​ໄໝ້​ປ່າ ໄຟ​ໄໝ້​ເຮືອນ ແລະ ໄຟ​ລາມ​ທົ່ງ ຫຼື ກໍ​ລວມ​ໄປ​ຮອດ​ຄ່າ​ໄຟ­ຟ້າ​ແພງ ທັງ​ໝົດ​ກາຍ­ເປັນ​ບັນ­ຫາ​ລວມ​ຂອງ​ສັງ­ຄົມ ຫຼື ຄົນ​ໃນ​ຊາດ ເຊິ່ງ​ບໍ່​ແມ່ນ​ບັນ­ຫາ​ທີ່​ເກີດ​ຂຶ້ນ​ສະ­ເພາະ​ນະ­ຄອນ­ຫຼວງ ແຕ່​ມັນ​ແມ່ນ​ບັນ­ຫາ​ເກີດ​ຂຶ້ນ​ຫຼາຍ​ບ່ອນ​ທົ່ວ​ປະ­ເທດ ເພາະ​ແຕ່​ລະ​ກໍ­ລະ­ນີ​ຂອງ​ບັນ­ຫາ​ໄຟ​ໄໝ້​ມີ​ທີ່​ມາ​ຕ່າງ​ກັນ ປະ­ເດັນ​ສຳ­ຄັນ​ກໍ​ແມ່ນ​ການ­ຈັດ­ຕັ້ງ​ກ່ຽວ­ຂ້ອງ​ໄດ້​ແຈ້ງ​ການ ຫຼື ຕິດ­ຕາມ​ໃຫ້​ທ້ອງ­ຖິ່ນ​ເຂດ​ບ້ານ ລວມ​ເຖິງ​ປະ­ຊາ­ຊົນ​ໄດ້​ມີ​ຈິດ​ສຳ­ນຶກ ໄດ້​ມີ​ສະ­ຕິ​ສູງ​ລະ­ວັງ​ຊ່ວຍ​ກັນ.

ຄຳ​ວ່າ­ການ​ມີ​ຈິດ​ສຳ­ນຶກ ຫຼື ມີ​ສະ­ຕິ​ສູງ​ລະ­ວັງ​ອັກ­ຄີ​ໄພ ໝາຍ​ຄວາມ​ວ່າ­ການ​ໃຊ້​ຟືນ​ໄຟ​ແຕ່​ລະ​ຄັ້ງ ຕ້ອງ​ເອົາ­ໃຈ­ໃສ່​ວ່າ ຫຼັງ​ຈາກ​ບໍ່​ໃຊ້​ປະ­ໂຫຍດ ເຊັ່ນ: ແຕ່ງ­ກິນ​ແລ້ວ​ກໍ​ຄວນ​ປິດ ຫຼື ມອດ​ໄຟ​ຢ່າງ​ມີ​ສະ­ຕິ​ທຸກ​ຄັ້ງ ເພາະ​ຖ້າ­ວ່າ​ໃຜ​ຜູ້​ໜຶ່ງ​ຫາກ​ປະ­ໝາດ​ຂາດ​ສະ­ຕິ ຫາກ​ເສດ​ໄຟ​ເລັກ​ນ້ອຍ​ຍັງ​ບໍ່​ມອດ ມັນ​ກໍ​ສາ­ມາດ​ລຸກ​ແຜ່​ລາມ​ໄໝ້​ເຮືອນ​ຊານ​ທີ່­ຢູ່​ອາ­ໄສ​ໄດ້ ຫຼື ວ່າ​ປະ­ເພດ​ຈູດ​ຂີ້​ເຫຍື້ອ​ກໍ​ມີ ເຊິ່ງ​ເຄີຍ​ເກີດ​ຂຶ້ນ​ມາ​ຫຼາຍ​ຄັ້ງ ເພາະ​ຫຼາຍ​ຄົນ​ຕັ້ງ­ໃຈ​ຫາ​ຂີ້​ເຫຍື້ອ​ມາ​ຈູດ​ນອກ​ກຳ­ແພງ​ເຮືອນ​ຂອງ​ຕົນ ແລ້ວ​ປະ​ຖິ້ມ​ບໍ່​ເອົາ­ໃຈ­ໃສ່​ວ່າ​ໄຟ​ຈະ​ລາມ​ໄປ​ໄໝ້​ເຮືອນ​ຄົນ​ອື່ນ.

ອັກ­ຄີ​ໄພ​ເກີດ​ໄດ້​ຫຼາຍ​ທາງ ເຊັ່ນ: ບາງ​ຄົນ​ໄຕ້​ທູບ ທຽນ ໄຫວ້​ພະ​ສູດ​ມົນ ແລ້ວ​ຂາດ​ສະ­ຕິ ລືມ​ມອດ​ໄຟ​ທູບ​ທຽນ​ບວກ​ໃສ່​ໄລ­ຍະ​ລະ­ດູ­ແລ້ງ ອາ­ກາດ​ຮ້ອນ​ໄຟ​ຈຶ່ງ​ໄໝ້​ລາມ​ງ່າຍ ບາງ​ກໍ­ລະ­ນີ​ທີ່​ປະ­ໝາດ​ຂາດ​ການ​ກວດ­ກາ​ເບິ່ງ​ສາຍ​ໄຟ ຫຼື ວ່າ​ປັກ​ສຽບ ລວມ​ເຖິງ​ການ​ສາກ​ໂທລະ­ສັບ (ສາຍ​ສາກ​ໂທລະ­ສັບ​ມັກ​ຊັອດ) ຖ້າ­ວ່າ​ສາຍ​ໄຟ ຫຼື ປັກ​ສຽບ​ເກົ່າ ຫຼື ວ່າ​ຂາດ​ຄຸນ​ນະ​ພາບ ບັນ­ຫາ​ນີ້​ກໍ​ແມ່ນ​ສາ­ເຫດ​ສຳ­ຄັນ​ຂອງ​ອັກ­ຄີ​ໄພ.

ຂໍ້​ມູນ​ຈາກ​ພະ​ແນກ​ຕ້ານ​ອັກ­ຄີ​ໄພ ນະ­ຄອນ­ຫຼວງ​ວຽງ​ຈັນ ວັນ​ທີ 7 ພຶດ­ສະ­ພາ 2020 ແຈ້ງ​ໃຫ້​ຊາບ​ວ່າ ໃນ​ເດືອນ​ເມ­ສາ ເກີດ​ອັກ­ຄີ​ໄພ 7 ຄັ້ງ ມູນ​ຄ່າ​ຄວາມ​ເສຍ​ຫາຍ 265 ລ້ານ​ກີບ ແລະ 10.000 ໂດ​ລາ ເຊິ່ງ​ສາ­ເຫດ​ມີ​ທັງ​ຈູດ​ປ່າ​ຊະ­ຊາຍ ໄຕ້​ທູບ​ທຽນ​ບູ­ຊາ ໄຟ​ຊັອດ ເລື່ອງ​ຂອງ​ອັກ­ຄີ​ໄພ​ຈຶ່ງ​ເປັນ​ບັນ­ຫາ​ສຳ­ຄັນ ຕ້ອງ​ປູກ​ຈິດ​ສຳ­ນຶກ​ໃຫ້​ທຸກ​ຄົນ​ມີ​ສະ­ຕິ ບໍ່​ເຫັນ­ແກ່​ໂຕ ມື​ໄວ​ໃຈ­ງ່າຍ ໂດຍ​ສະ­ເພາະ​ແມ່ນ​ທຸກ​ບ້ານ ຄວນ​ປະ­ກາດ​ແຈ້ງ​ເຕືອນ​ປະ­ຊາ­ຊົນ​ຢູ່​ເລື້ອຍໆ ເພາະ​ໄພ​ເສດ­ຖະ­ກິດ​ປາກ​ທ້ອງ​ກໍ​ເຮັດ​ໃຫ້​ຈິດ­ໃຈ​ຄົນ​ຮ້ອນ­ຮົນ​ຈົນ​ຂາດ​ສະ­ຕິ…

ໂດຍ: ດັ້ນ​ກີບ​ເມກ

ຕິດຕໍ່ພວກເຮົາ