ລາວ-ເຈ​ເຄ​ເອ ມຸ່ງ​ໝັ້ນ​ພັດທະນາ​ນັກກີລາ​ກາ​ຣາ​ເຕ້​ໂດ​ເຍົາວະ​ຊົນ​ລາວ

            ທ່ານ ອິນ​ທະນູສອນ ວິໄລ​ສຸກ ອະ​ດິດ​ນັກກີລາ​ກາ​ຣາ​ເຕ້​ໂດ​ທີມ​ຊາດ​ລາວ ຫົວໜ້າ​ກຳມະການ​ຕັດສິນ​ຝ່າຍ​ເຕັກນິກ ຂອງ​ສະຫະພັນ​ກາ​ຣາ​ເຕ້​ໂດ​ແຫ່ງ​ຊາດ ທັງ​ເປັນ​ຫົວໜ້າ​ຄູ​ເຝິກ​ສາຍ​ດຳ ດັ້ນ3 ຂອງ​ສະໂມສອນ ລາວ-ເຈ​ເຄ​ເອ ກາ​ຣາ​ເຕ້​ໂດ ໃຫ້​ສຳພາດ​ໃນ​ວັນ​ທີ 27 ພຶດສະພາ 2020 ວ່າ: ສະໂມສອນ ກາ​ຣາ​ເຕ້​ໂດ ລາວ-ເຈ​ເຄ​ເອ ໄດ້​ສ້າງຕັ້ງ​ຂຶ້ນ ເມື່ອ​ປີ 2014 ເປັນຕົ້ນ​ມາ ໂດຍ​ມີ​ຈຸດປະສົງ​ຫຼັກ​ກໍ​ເພື່ອ​ຢາກ​ປະກອບສ່ວນ​ສົ່ງເສີມ​ການ​ພັດທະນາ​ນັກກີລາ​ກາ​ຣາ​ເຕ້​ໂດ​ເຍົາວະ​ຊົນ​ລາວ ສາມາດ​ກ້າວ​ຂຶ້ນ​ຮັບ​ໃຊ້​ທີມ​ຊາດ ແນໃສ່​ສ້າງ​ຜົນງານ​ໃນ​ການ​ແຂ່ງຂັນ ຊີງ​ແຊັມ​ນາໆຊາດ ເວົ້າ​ລວມ ເວົ້າ​ສະເພາະ​ແມ່ນ​ງານ​ມະ​ຫະ​ກຳ​ກີລາ​ຊີເກມ ຄັ້ງ​ທີ 31 ທີ່ ​ສສ ຫວຽດນາມ ຮັບ​ກຽດ​ເປັນ​ເຈົ້າພາບ  ໃນ​ປີໜ້າ​ນີ້ ອີກ​ດ້ານ​ໜຶ່ງ​ກໍ​ສ້າງ​ໂອກາດ​ໃຫ້​ນັກກີລາ​ໄດ້​ໃຊ້​ເວລາ​ຫວ່າງ​ໃຫ້​ເປັນ​ປະໂຫຍດ ເພື່ອ​ຕ້ານ​ປະກົດ​ການ​ຫຍໍ້ທໍ້​ຕ່າງໆ​ທີ່​ເກີດ​ຂຶ້ນ​ໃນ​ສັງຄົມ​ປັດຈຸບັນ ໂດຍ​ສະເພາະ​ແມ່ນ​ບັນຫາ​ຢາ​ເສບ​ຕິດ ແນວໃດ​ກໍ​ດີ ນັບ​ມາ​ຮອດ​ປັດຈຸບັນ ສະ​ໂມ ສອນ​ພວກ​ເຮົາ​ມີ​ນັກກີລາ​ທັງ​ໝົດ​ເກືອບ 50 ຄົນ ມີ​ທັງ​ຮຸ່ນ​ເຍົາວະ​ຊົນ ແລະ ຊາວ​ໜຸ່ມ​ທົ່ວ​ໄປ ມີ 2 ສາຂາ ກໍ​ຄື ສາຍ​ຂາ​ທີ 1 ເປີດ​ສອນ ຢູ່​ທີ່​ສູນ​ກີລາ​ໃນ​ຮົ່ມ ບູ​ໂດ​ເຊັນ​ເຕີ ເມືອງ​ຈັນທະ​ບູ​ລີ ແລະ ສາຂາ​ທີ 2 ແມ່ນ​ເປີດ​ສອນ ຢູ່​ທີ່​ເອັບ​ຟິດ​ເນັດ ວິທະຍາ​ເຂດ​ດົງ​ໂດກ ການ​ເຝິກ​ສອນ​ມີ​ຫຼາຍ​ຮູບ​ແບບ ກໍ​ຄື ສອນ​ຂັ້ນ​ພື້ນຖານ ໃນ​ການ​ລຳ​ມວຍ​ກີລາ​ດັ່ງກ່າວ ໃຫ້​ນ້ອງ​ນ້ອຍ​ເຍົາວະ​ຊົນ ແລະ ສອນ​ຕົວ​ຈິງ​ໃນ​ການ​ຕໍ່ສູ້​ໃຫ້​ຮຸ່ນ​ຊາວ​ໜຸ່ມ ເພື່ອ​ກຽມ​ເຂົ້າ​ຮ່ວມ​ແຂ່ງຂັນ.

            ຕະຫຼອດ​ໄລຍະ 5 ປີ ຜ່ານ​ມາ ພາຍ​ໃຕ້​ການ​ນຳພາ​ຂອງ​ທ່ານ ອຸ​ຕະ​ວົງ ປະ​ທຳ​ມະ​ວົງ ເປັນ​ປະທານ​ສະໂມສອນ ແລະ ມີ​ນັກກີລາ​ທີມ​ຊາດ ຮ່ວມ​ເປັນ​ຄູ​ເຝິກ​ສອນ​ນຳ​ອີກ​ດ້ວຍ ນອກຈາກ​ເຝິກ​ສອນ​ຖ່າຍ​ທອດ​ຄວາມ​ຮູ້​ຄວາມ​ສາມາດ ແລະ ປະສົບ​ການ​ໃຫ້​ແກ່​ນັກກີລາ​ແລ້ວ ກໍ​ຍັງ​ນຳພາ​ເຂົາເຈົ້າ​ເຂົ້າ​ຮ່ວມ​ການ​ແຂ່ງຂັນ​ລາຍການ​ຕ່າງໆ​ທັງ​ພາຍ​ໃນ ແລະ ຕ່າງປະເທດ ແລະ ຕິດ​ທີມ​ຊາດ​ຫຼາຍ​ຮຸ່ນ ສະເພາະ​ພາຍ​ໃນ ກໍ​ສາມາດ​ສ້າງ​ຜົນງານ​ໄດ້​ຢ່າງ​ໂດດ​ເດັ່ນ ຄວ້າ​ຂັນ​ກຽດຕິຍົດ​ຂັນ​ຊະນະ​ເລີດ ງານ​ແຂ່ງຂັນ​ກີລາ​ກາ​ຣາ​ເຕ້​ໂດ ທົ່ວ​ປະເທດ ຊີງ​ຂັນ​ເຈົ້າ​ຄອງ​ນະຄອນຫຼວງ ເມື່ອ​ປີ 2016 ມາ​ຄອງ​ໄດ້ 1 ຂັນ​ລາງວັນ ນອກ​ນັ້ນ ກໍ​ສາມາດ​ຄວ້າ​ຫຼຽນ​ຄຳ ແລະ ຂັນ​ຊະນະ​ເລີດ ໄດ້​ຫຼາຍ​ລາຍການ ທັງ​ພາຍ​ໃນ ​ສປປ ລາວ ຢູ່​ທີ່​ປະເທດ​ໄທ ແລະ ​ສສ ຫວຽດນາມ ອີກ​ດ້ວຍ. 

            ສຳລັບ​ປະຫວັດ ແລະ ຜົນງານ​ຂອງ ສະໂມສອນ ລາວ-ເຈ​ເຄ​ເອ ກາ​ຣາ​ເຕ້​ໂດ ສ້າງຕັ້ງ​ຂຶ້ນ​ມາ​ແຕ່​ປີ 2014 ໄດ້​ເຂົ້າ​ຮ່ວມ​ຢູ່​ລາວ ປີ 2015 ຄັ້ງ​ທີ 2 ຊີງ​ຂັນ​ເຈົ້າ​ຄອງ​ນະຄອນຫຼວງ ໄດ້​ທີ 2 ຄວ້າ​ແຊັມ ກາ​ຣາ​ເຕ້​ໂດ ທົ່ວ​ປະເທດ ຄັ້ງ​ທີ 3 ຊີງ​ຂັນ​ເຈົ້າ​ຄອງ​ນະຄອນຫຼວງ ເມື່ອ​ປີ 2016 ປີ 2017 ຊີງ​ແຊັມ​ທົ່ວ​ປະເທດ ໄດ້​ທີ 3 ປີ 2018 ຊີງ​ຂັນ​ເຈົ້າ​ຄອງ​ໄດ້​ທີ 2 ປີ 2019 ລາຍການ​ວຽງ​ຈັນ​ໂອ​ເພັນ ຈາກ 12 ສະໂມສອນ ມາ​ຈາກ 3 ປະເທດ ໄດ້​ທີ 2 ພ້ອມ​ທັງ​ຄວ້າ​ຫຼຽນ​ຄຳ ໄດ້​ເຖິງ 8 ຫຼຽນ 9 ຫຼຽນ​ເງິນ ແລະ 13 ຫຼຽນ​ທອງ ສ່ວນ​ລາຍການ​ເຂົ້າ​ຮ່ວມ​ຢູ່​ຕ່າງປະເທດ ຕາງໜ້າ​ກາ​ຣາ​ເຕ້​ໂດ​ລາວ ເຂົ້າ​ຮ່ວມ ໄທ​ແລນ ໂອ​ເພັນ ປີ 2016  ສາມາດ​ຍາດ​ໄດ້ 1 ຫຼຽນ​ເງິນ ແລະ  2 ຫຼຽນ​ທອງ ທີ່​ປະເທດ​ໄທ ປີ 2017 ໄທ​ແລນ ໂອ​ເພັນ ຍາດ​ໄດ້ 1 ຫຼຽນ​ທອງ ທີ່​ປະເທດ​ໄທ ປີ 2018 ເງະ​ອານ​ໂອ​ເພັນ ທີ່ ​ສສ ຫວຽດນາມ ສາມາດ​ຍາດ​ໄດ້ 2 ຫຼຽນ​ຄຳ 3 ຫຼຽນ​ເງິນ ແລະ 6 ຫຼຽນ​ທອງ ປີ 2018 ໄທ​ແລນ ໂຊ​ໂຕ​ຄັບ​ກະເສດສາດ ຍາດ​ໄດ້ 2 ຫຼຽນ​ຄຳ 2 ຫຼຽນ​ເງິນ 4 ຫຼຽນ​ທອງ ແລະ ຫຼ້າ​ສຸດ​ປີ 2019 ໄທ​ແລນ ໂອ​ເພັນ ຍາດ​ໄດ້ 1 ຫຼຽນ​ຄຳ ແລະ 1 ຫຼຽນ​ທອງ ທີ່​ປະເທດ​ໄທ.

ຕິດຕໍ່ພວກເຮົາ