ໄຊທານີ ໄຂຂະບວນການປູກໄມ້ 3 ຈຸດ ໃນເນື້ອທີ່ 6,5 ເຮັກຕາ

ພະ​ແນກ​ກະ­ສິ­ກຳ ແລະ ປ່າ­ໄມ້​ນະ­ຄອນ­ຫຼວງ​ວຽງ​ຈັນ ຮ່ວມ​ກັບ​ອົງ­ການ​ປົກ­ຄອງ​ເມືອງ​ໄຊ​ທາ­ນີ ຫ້ອງ­ການ​ກະ­ສິ­ກຳ-ປ່າ­ໄມ້​ເມືອງ​ໄຊ​ທາ­ນີ ແລະ ອຳ­ນາດ​ການ​ປົກ­ຄອງ​ບ້ານ​ນາ​ໂງ່ມ​ໃໝ່ ແລະ ບ້າ​ນາ​ໂງ່ມ​ເກົ່າ ໄດ້​ຈັດ​ພິ­ທີ​ປູກ​ຕົ້ນ­ໄມ້​ແຫ່ງ​ຊາດ 1 ມິ­ຖຸ­ນາ​ຂຶ້ນ​ໃນ​ວັນ​ທີ 29 ພຶດ­ສະ­ພາ 2020 ທີ່​ວັດ​ບ້ານ​ນາ​ໂງ່ມ​ໃໝ່ ເປັນ​ກຽດ​ເຂົ້າ​ຮ່ວມ​ຂອງ​ທ່ານ ຫຼ້າ​ສາຍ ນວນ​ທາ​ສິງ ຫົວ­ໜ້າ​ພະ​ແນກ​ກະ­ສິ­ກຳ ແລະ ປ່າ­ໄມ້​ນະ­ຄອນ­ຫຼວງ​ວຽງ​ຈັນ ທ່ານ ໜູ​ກີ ສີ​ຫາ​ລາດ ຮອງ​ເຈົ້າ­ເມືອງໆ​ໄຊ​ທາ­ນີ ພ້ອມ​ດ້ວຍ​ຫົວ­ໜ້າ ຮອງ​ພະ­ແນກ­ການ​ອ້ອມ​ຂ້າງ ປະ­ຊາ­ຊົນ ນ້ອງ​ນັກ­ຮຽນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ

ທ່ານ ທອງ​ສຸກ ບົວ​ລີ​ຂັນ ຫົວ­ໜ້າ​ຫ້ອງ­ການ​ກະ­ສິ­ກຳ ແລະ ປ່າ­ໄມ້​ເມືອງ​ໄຊ​ທາ­ນີ ໃຫ້​ຮູ້​ວ່າ: ການ​ປູກ​ຕົ້ນ­ໄມ້​ໃນ​ຄັ້ງ​ນີ້ ເພື່ອ​ພ້ອມ​ກັນ​ປູກ​ຕົ້ນ­ໄມ້​ສ້າງ​ຂະ​ບວນ​ການ​ໃນ​ວັນ​ປູກ​ຕົ້ນ­ໄມ້​ແຫ່ງ​ຊາດ ວັນ​ທີ 1 ມິ­ຖຸ­ນາ ວັນ​ສິ່ງ­ແວ­ດລ້ອມ​ໂລກ ວັນ​ສິ່ງ­ແວ­ດລ້ອມ​ແຫ່ງ​ຊາດ ທັງ​ເປັນ​ການ​ສະ­ຫຼອງ​ວັນ­ເດັກ­ນ້ອຍ​ສາ­ກົນ ປະ­ຈຳ​ປີ 2020 ພ້ອມ​ທັງ​ເພື່ອ​ສ້າງ​ສະ­ຕິ ແລະ ປູກ​ຈິດ​ສຳ­ນຶກ​ໃນ​ການ​ປູກ​ຕົ້ນ­ໄມ້ ປົກ​ປັກ​ຮັກ­ສາ​ພັດ­ທະ­ນາ​ປ່າ­ໄມ້ ທີ່​ດິນ​ປ່າ­ໄມ້ ແນ­ໃສ່​ໃຫ້​ປ່າ­ໄມ້​ອຸ­ດົມ­ສົມ­ບູນ ໂດຍ​ສະ­ເພາະ​ເພີ່ມ​ທະ­ວີ​ການ​ປົກ​ຫຸ້ມ​ຂອງ​ປ່າ​ສະ­ຫງວນ​ພູ­ເຂົາ​ຄວາຍ.

ໃນ​ຊຸມ​ປີ­ຜ່ານ­ມາ ເມືອງ​ໄຊ​ທາ­ນີ ໄດ້​ເອົາ­ໃຈ­ໃສ່​ຢ່າງ​ຕັ້ງ­ໜ້າ​ຕໍ່​ວຽກ​ງານ​ຊຸກ­ຍູ້ ແລະ ສົ່ງ­ເສີມ​ການ​ປູກ​ໄມ້​ໃຫ້​ເປັນ​ປ່າ ເພື່ອ​ເພີ່ມ​ເນື້ອ­ທີ່​ປົກ​ຫຸ້ມ​ສີ­ຂຽວ ໂດຍ​ໄດ້​ປຸກ­ລະ­ດົມ​ປະ­ຊາ­ຊົນ​ຢ່າງ​ເປັນ​ຂະ​ບວນ​ຟົດ­ຟື້ນ ສຸມ​ໃສ່​ການ​ຜະ­ລິດ​ເບ້ຍ​ໄມ້​ເພື່ອ​ຕອບ​ສະ­ໜອງ​ໃຫ້​ສັງ­ຄົມ​ໄດ້​ຢ່າງ​ພຽງ­ພໍ ສຳ­ລັບ​ເນື້ອ­ທີ່​ປູກ​ໄມ້​ໃນ​ແຜນ­ການ​ປີ 2020 ວາງ​ໄວ້ 100 ເຮັກ­ຕາ ແລະ ການ​ຜະ­ລິດ​ເບ້ຍ​ໄມ້​ປີ​ນີ້ ປະ­ຕິ­ບັດ​ຕົວ​ຈິງ​ສາ­ມາດ​ຜະ­ລິດ​ໄດ້ 3 ລ້ານ​ກວ່າ​ເບ້ຍ ຈາກ​ສວນ​ກ້າ​ຂອງ​ເມືອງ​ຈຳ­ນວນ 12 ແຫ່ງ ລວມ​ທັງ​ພາກ​ລັດ ແລະ ເອ­ກະ​ຊົນ ພ້ອມ​ນີ້ ພາຍ​ໃນ​ເມືອງ​ສະ­ເພາະ​ມື້­ນີ້ ແມ່ນ​ໄດ້​ແບ່ງ​ເປັນ 3 ຈຸດ​ປູກ​ຄື: ວັດ​ບ້ານ​ນາ​ໂງ່ມ​ໃໝ່ ແລະ ສວນ​ສາ­ທາ­ລະ­ນະ​ໜອງ​ໂງ່ມ​ໃໝ່ ເນື້ອ­ທີ່ 1 ເຮັກ­ຕາ ໃຊ້​ເບ້ຍ​ໄມ້ 1.700 ເບ້ຍ ຈຸດ​ໂຮງ­ຮຽນ ມສ ພວງ​ໄຊ ເນື້ອ­ທີ່​ເຄີ່ງ​ເຮັກ­ຕາ ໃຊ້​ເບ້ຍ​ໄມ້ 250 ກວ່າ​ເບ້ຍ ແລະ ຈຸດ​ທີ່​ສາມ​ແມ່ນ​ສະ­ຖານ­ທີ່​ທ່ອງ​ທ່ຽວ​ຕາດ​ນົກ­ກົກ ເນື້ອ­ທີ່ 5 ເຮັກ­ຕາ ເຊິ່ງ​ຈະ​ໃຊ້​ເບ້ຍ​ໄມ້ 4 ພັນ​ກວ່າ​ເບ້ຍ ລວມ​ເນື້ອ­ທີ່​ປູກ​ທັງ​ໝົດ 6,5 ເຮັກ­ຕາ ນຳ​ໃຊ້​ເບ້ຍ​ໄມ້​ທັງ​ໝົດ 5.950 ເບ້ຍ ປະ­ກອບ​ມີ​ໄມ້​ອຸດ­ສາ­ຫະ­ກຳ​ປະ­ເພດ​ໄມ້​ວິກ ໄມ້​ປະ­ດັບ ໄມ້​ດູ່​ລາຍ ໄມ້​ຂະ​ຍຸງ ແລະ ໄມ້​ແຕ້​ຂ່າ.

# ຂ່າວ & ພາບ: ເພັດ​ສະ­ໝອນ

ຕິດຕໍ່ພວກເຮົາ