ຄະນະພັກຮາກຖານ ພະແນກ ຖວທ ນວ ເອົາໃຈໃສ່ກໍ່ສ້າງພັກ-ພະນັກງານຢ່າງເນື່ອງນິດລຽນຕິດ

ຄະ­ນະ​ພັກ​ຮາກ​ຖານ ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ເປັນ​ຄະ­ນະ​ພັກ​ຮາກ​ຖານ​ໜຶ່ງ​ນອນ​ໃນ​ຂົງ­ເຂດ​ວັດ­ທະ­ນະ­ທຳ-ສັງ­ຄົມ ພາຍ​ໃຕ້​ການ​ຊີ້​ນຳ-ນຳ­ພາ​ກ່ຽວ​ກັບ​ວຽກ​ງານ​ພັກ-ພະ­ນັກ­ງານ ຈາກ​ຄະ­ນະ​ພັກ​ນະ­ຄອນ­ຫຼວງ​ວຽງ​ຈັນ ແລະ ຊີ້​ນຳ​ດ້ານ​ວິ­ຊາ​ການ​ຈາກ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ມີ​ພາ­ລະ​ບົດ­ບາດ​ສຶກ​ສາ​ອົບ­ຮົມ​ການ­ເມືອງ​ແນວ​ຄິດ ໃຫ້​ສະ­ມາ­ຊິກ​ພັກ-ພະ­ນັກ­ງານ​ລັດ­ຖະ­ກອນ ເຊື່ອມ​ຊຶມ ກຳ​ແໜ້ນ ແລະ ມີ​ຄວາມ​ເປັນ​ເອ­ກະ​ພາບ​ສູງ ຕໍ່​ກັບ​ແນວ­ທາງ​ປ່ຽນ­ແປງ​ໃໝ່​ຢ່າງ­ຮອບ­ດ້ານ ແລະ ມີ​ຫຼັກ­ການ​ຂອງ​ພັກ ຈັດ​ຕັ້ງ​ຜັນ​ຂະ­ຫຍາຍ​ແນວ­ທາງ​ນະ­ໂຍ­ບາຍ​ຂອງ​ພັກ ມະ­ຕິ ຄຳ​ສັ່ງ ແລະ ລະ­ບຽບ​ກົດ­ໝາຍ​ຂອງ​ລັດ​ກ່ຽວ​ກັບ​ວຽກ​ງານ​ຖະ­ແຫຼງ​ຂ່າວ​ວັດ­ທະ­ນະ­ທຳ ແລະ ທ່ອງ​ທ່ຽວ ໃຫ້​ສຳ­ເລັດ​ຕາມ​ລະ­ດັບ​ຄາດ­ໝາຍ.

ຄະ­ນະ​ພັກ​ຮາກ​ຖານ​ພະ​ແນກ (ຖວ​ທ ນວ) ປັດ­ຈຸ­ບັນ​ມີ 8 ໜ່ວຍ​ພັກ​ຄື ໜ່ວຍ​ພັກ​ຫ້ອງ​ການ­ຈັດ­ຕັ້ງ ແລະ ຖະ­ແຫຼງ​ຂ່າວ ໜ່ວຍ​ພັກ​ຂົງ­ເຂດ​ວັດ­ທະ­ນະ­ທຳ ໜ່ວຍ​ພັກ​ຂົງ­ເຂດ​ທ່ອງ​ທ່ຽວ ໜ່ວຍ​ພັກ​ໜັງ­ສື­ພິມ​ວຽງ​ຈັນ​ໃໝ່ ໜ່ວຍ​ພັກ​ວິ­ທະ­ຍຸ-ໂທລະ­ພາບ ໜ່ວຍ​ພັກ​ລັດ​ວິ​ສາ​ຫະ​ກິດ​ໂຮງ­ພິມ​ນະ­ຄອນ­ຫຼວງ  ໜ່ວຍ​ພັກ​ສະ­ມາ­ຄົມ​ທຸ­ລະ​ກິດ​ທ່ອງ​ທ່ຽວ​ລາວ ແລະ ໜ່ວຍ​ພັກ​ການ​ຄ້າ​ແມ່​ຂອງ ມີ​ສະ­ມາ­ຊິກ​ພັກ 115 ສະ­ຫາຍ ຍິງ 49 ສະ­ຫາຍ ເປັນ​ສະ­ມາ­ຊິກ​ພັກ​ສົມ­ບູນ 98 ສະ­ຫາຍ ຍິງ 40 ສະ­ຫາຍ ໃນ​ໄລ­ຍະ 5 ປີ ຜ່ານ​ມາ­ຄະ​ນະ​ພັກ​ຮາກ​ຖານ​ໄດ້​ຊີ້​ນຳ​ເອົາ­ໃຈ­ໃສ່​ໃນ​ວຽກ​ກໍ່­ສ້າງ​ພັກ-ພະ­ນັກ­ງານ​ຢ່າງ​ເນື່ອງ­ນິດ​ລຽນ­ຕິດ  ແລະ ໄດ້​ຮັບ​ໝາກ­ຜົນ​ຄະ­ນະ​ພັກ​ຮາກ​ຖານ ຄະ­ນະ​ໜ່ວຍ​ພັກ ສະ­ມາ­ຊິກ​ພັກ ຕະ­ຫຼອດ​ຮອດ​ພະ­ນັກ­ງານ​ລັດ­ຖະ­ກອນ ໄດ້​ຄົ້ນ­ຄວ້າ​ຮ່ຳ­ຮຽນ​ເຊື່ອມ​ຊືມ​ແນວ­ທາງ​ມະ­ຕິ​ຂອງ​ພັກ ນະ­ໂຍ­ບາຍ ແລະ ກົດ­ໝາຍ​ຂອງ​ລັດ​ເປັນ­ຕົ້ນ ມະ­ຕິ​ກອງ​ປະ­ຊຸມ​ໃຫຍ່ ຄັ້ງ​ທີ X ຂອງ​ພັກ ມະ­ຕິ​ກອງ​ປະ­ຊຸມ​ໃຫຍ່​ຄັ້ງ​ທີ VI  ຂອງ​ອົງ­ຄະ​ນະ​ພັກ​ນະ­ຄອນ­ຫຼວງ​ວຽງ​ຈັນ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ VIII ຂອງ​ນະ­ຄອນ­ຫຼວງ​ວຽງ​ຈັນ ຕິດ​ພັນ​ກັບ​ການ­ຈັດ­ຕັ້ງ​ປາ­ຖະ­ກະ­ຖາ​ເລົ່າ​ມູນ­ເຊື້ອ​ວັນ​ສຳ­ຄັນ​ຕ່າງໆ​ຂອງ​ຊາດ ຂອງ​ພັກ ຂອງ​ຜູ້­ນຳ ເຫດ­ການ​ທີ່​ພົ້ນ​ເດັ່ນ​ເກີດ​ຂື້ນ​ທັງ​ພາຍ​ໃນ ແລະ ຕ່າງ­ປະ­ເທດ ແລະ ເອ­ກະ­ສານ​ອື່ນໆ ຕາມ​ການ​ຊີ້​ນຳ​ຂອງ​ຄະ­ນະ​ໂຄ­ສະ­ນາ​ອົບ­ຮົມ ນະ­ຄອນ­ຫຼວງ​ວຽງ​ຈັນ ໃນ​ແຕ່​ລະ​ໄລ­ຍະ ເຊິ່ງ​ລວມ​ທັງ​ໝົດ​ໄດ້ 72 ຄັ້ງ ມີ​ສະ­ມາ­ຊິກ​ພັກ​ລັດ­ຖະ­ກອນ​ເຂົ້າ​ຮ່ວມ​ຈຳ­ນວນ 6.465 ເທື່ອ​ຄົນ ຜ່ານ​ການ­ຈັດ­ຕັ້ງ​ເຊື່ອມ​ຊຶມ​ໄດ້​ເຮັດ​ໃຫ້​ພະ­ນັກ­ງານ ສະ­ມາ­ຊິກ​ພັກ​ໄດ້​ມີ​ຄວາມ​ຮັບ​ຮູ້​ເຂົ້າ­ໃຈ ມີ​ຄຸນ​ທາດ​ການ­ເມືອງ​ໜັກ​ແໜ້ນ ມີ​ແນວ​ຄິດ​ອຸ່ນ​ອ່ຽນ​ທຸ່ນ​ທ່ຽງ ເຊື່ອ​ໝັ້ນ​ຕໍ່​ການ​ນຳ­ພາ​ຂອງ​ພັກ ມີ​ສະ­ຕິ​ຫຼັກ​ໝັ້ນ​ມິດ-ສັດ­ຕູ​ຈະ­ແຈ້ງ ຕ້ານ​ທຸກ​ປະ­ກົດ​ການ​ຫຍໍ້­ທໍ້ ມີ​ຄຸນ­ສົມ­ບັດ​ສີນ​ທຳ​ປະ­ຕິ­ວັດ​ທີ່​ຖືກ­ຕ້ອງ ມີ​ຄວາມ​ຈົ່ງ​ຮັກ​ພັກ­ດີ​ຕໍ່​ອຸ­ດົມ​ການ​ຂອງ​ພັກ ມີ​ນ້ຳ­ໃຈ​ເສຍ­ສະ­ຫຼະ ຮັບ​ໃຊ້​ຊາດ ຮັບ​ໃຊ້​ປະ­ຊາ­ຊົນ​ຢ່າງ​ສຸດ​ໃຈ ສະ­ແດງ​ອອກ​ໃນ​ການ­ເຄື່ອນ­ໄຫວ ແລະ ການ​ກະ­ທຳ​ຕົວ​ຈິງ​ຂອງ​ສະ­ມາ­ຊິກ​ພັກ ໃນ​ການ​ປະ­ຕິ­ບັດ​ຄຳ​ສັ່ງ​ຂອງ​ຂັ້ນ​ເທິງ​ຢ່າງ​ເຂັ້ມ​ງວດ ແລະ ມີ​ຜົນ­ສຳ­ເລັດ ໃນ​ໜ້າ­ທີ່​ວຽກ​ງານ​ສູງ.

ສຳ­ລັບ​ວຽກ​ງານ​ຈັດ​ຕັ້ງ​ພັກ-ພະ­ນັກ­ງານ​ໄດ້​ຮັບ​ການ​ປັບ­ປຸງ ແລະ ປະ­ຕິ­ບັດ​ຕາມ​ພາ­ລະ​ບົດ­ບາດ ສິດ ແລະ ໜ້າ­ທີ່​ມີ​ລັກ­ສະ­ນະ​ເປັນ​ລະ­ບົບ​ຄົບ​ຊຸດ​ຕໍ່​ເນື່ອງ​ກົງ­ຈັກ​ການ­ຈັດ­ຕັ້ງ​ພາຍ​ໃນ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ​ມີ​ຄວາມ​ປອດ​ໃສ ເຂັ້ມ­ແຂງ ໜັກ​ແໜ້ນ​ໃນ 5 ປີ­ຜ່ານ­ມາ​ໄດ້​ປັບ­ປຸງ​ການ­ຈັດ­ຕັ້ງ​ຂັ້ນ​ຄະ­ນະ​ພະ​ແນກ 1 ຄັ້ງ ຈຳ­ນວນ 1 ທ່ານ ແລະ ຂັ້ນ​ຂະ­ແໜງ ແລະ ກອງ​ວິ­ຊາ​ການ 2 ຄັ້ງ ຈຳ­ນວນ 5 ທ່ານ ຂັ້ນ​ເມືອງ 6  ຄັ້ງ ຈຳ­ນວນ 6 ທ່ານ ຄະ­ນະ​ພັກ​ຮາກ​ຖານ ຄະ­ນະ​ໜ່ວຍ​ພັກ ແລະ ສະ­ມາ­ຊິກ ສ່ວນ​ຫຼາຍ ມີ​ສະ­ຕິ​ເຄົາ­ລົບ ແລະ  ປະ­ຕິ­ບັດ​ລະ­ບຽບ​ຂອງ​ພັກ  ກົດ­ໝາຍ  ແລະ  ລະ­ບຽບ​ຕ່າງໆ​ຂອງ​ລັດ​ຢ່າງ​ເຂັ້ມ​ງວດ​ເປັນ​ແບບ­ຢ່າງ​ທີ່​ດີ​ໃນ​ການ­ເຄື່ອນ­ໄຫວ​ດຳ­ລົງ​ຊີ­ວິດ​ຂອງ​ສະ­ມາ­ຊິກ​ພັກ ໜ່ວຍ​ພັກ​ໄດ້​ຮັບ​ການ​ປັບ­ປຸງ​ຍົກ​ສູງ​ຂຶ້ນ​ເທື່ອ​ລະ​ກ້າວ ປະ­ຕິ­ບັດ​ລະ­ບອບ​ຮ່ວມ​ຊີ­ວິດ​ພັກ ແລະ ເສຍ​ເງິນ​ສະ­ຕິ​ພັກ​ຕາມ​ກົດ​ລະ­ບຽບ​ຂອງ​ພັກ ພ້ອມ​ກັນ​ນັ້ນ​ຍັງ​ປະ­ຕິ­ບັດ​ການ​ຍ້ອງ­ຍໍ​ສະ­ມາ­ຊິກ​ພັກ​ຜູ້​ທີ່​ດີ­ເດັ່ນ ເກັບ​ເງິນ​ສະ­ຕິ​ສະ­ມາ­ຊິກ​ພັກ 25,4 ລ້ານ​ກີບ ມອບ​ໃຫ້​ຄະ­ນະ​ຈັດ​ຕັ້ງ​ນະ­ຄອນ­ຫຼວງ​ວຽງ​ຈັນ 10 ລ້ານ​ກວ່າ​ກີບ ເຊິ່ງ​ໃນ 5 ປີ­ຜ່ານ­ມາ​ສາ­ມາດ​ຮັກ­ສາ​ນາມ­ມະ­ຍົດ ໜ່ວຍ​ພັກ​ເຂັ້ມ­ແຂງ-ຮູ້​ນຳ­ພາ​ຮອບ­ດ້ານ​ໄດ້ 5 ໜ່ວຍ​ພັກ 5 ປີ​ຕິດ­ຕໍ່​ກັນ ຂະ­ຫຍາຍ​ມະ­ຫາ­ຊົນ​ກ້າວ­ໜ້າ​ເຂົ້າ​ເປັນ​ສະ­ມາ­ຊິກ​ພັກ ໄດ້ 26 ສະ­ຫາຍ ຍິງ 13 ສະ­ຫາຍ ນອກ­ຈາກ​ນັ້ນ ໄດ້​ເອົາ­ໃຈ­ໃສ່​ສ້າງ​ກໍ່­ສ້າງ ແລະ ປະ­ຕິ­ບັດ​ນະ­ໂຍ­ບາຍ​ຕໍ່​ພະ­ນັກ­ງານ ໄດ້​ຮັບ​ການ​ເອົາ­ໃຈ­ໃສ່​ຢ່າງ​ເປັນ​ລະ­ບົບ​ຕໍ່​ເນື່ອງ ໂດຍ​ສະ­ເພາະ ແຜນ​ກຳ­ນົດ​ພະ­ນັກ­ງານ​ນຳ­ພາ –  ຄຸ້ມ​ຄອງ ບຳ­ລຸງ​ສ້າງ​ພະ­ນັກ­ງານ ຮັບ­ປະ­ກັນ​ສາມ​ຮຸ້ນ ສາມ​ລະ­ດັບ ເພື່ອ​ສືບ​ທອດ​ປ່ຽນ​ແທນ​ໃຫ້​ມີ​ຄຸນ​ນະ​ພາບ ສົມ​ຄູ່​ກັບ​ໜ້າ­ທີ່​ການ­ເມືອງ​ໃນ​ໄລ­ຍະ​ໃໝ່  ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ຖືກ ຕ້ອງ​ຕາມ​ທິດ​ຊີ້​ນຳ​ຂອງ​ຂັ້ນ​ເທີງ ໄດ້​ນະ­ໂຍ­ບາຍ​ໃຫ້​ພະ­ນັກ­ງານ​ໄປ​ຍົກ​ລະ­ດັບ​ຢູ່​ພາຍ​ໃນ ແລະ ຕ່າງ­ປະ­ເທດ ດ້ວຍ​ທຶນ​ຂອງ​ລັດ ແລະ ທຶນ​ສ່ວນ​ຕົວ 21 ສະ­ຫາຍ ຍິງ 10 ສະ­ຫາຍ  ໃນ​ນັ້ນ ປະ­ລິນ­ຍາ​ໂທ 12 ສະ­ຫາຍ ປະ­ລິ​ຍາ​ຕີ 8 ສະ­ຫາຍ ຍິງ 5 ສະ­ຫາຍ ປະ­ລິນ­ຍາ​ເອກ 1 ສະ­ຫາຍ ເປັນ​ຍິງ  ພິ­ເສດ​ໄດ້​ເປີດ​ການ​ຮຽນ-ການ​ສອນ ທິດ​ສະ​ດີ​ການ­ເມືອງ-ການ​ປົກ­ຄອງ ຊັ້ນ​ຕົ້ນ 1 ຊຸດ ມີ​ຜູ້​ເຂົ້າ​ຮຽນ 41 ສະ­ຫາຍ ຍິງ 21 ສະ­ຫາຍ ໄດ້​ຈັດ​ສົ່ງ​ພະ­ນັກ­ງານ​ລົງ​ກໍ່­ສ້າງ​ຮາກ​ຖານ ຕາມ​ນະ­ໂຍ­ບາຍ​ສາມ​ສ້າງ 7 ສະ­ຫາຍ ຍິງ 2 ສະ­ຫາຍ ທັງ​ໄດ້​ນຳ­ພາ​ຄົ້ນ­ຄວ້າ​ນຳ​ສະ­ເໜີ​ຂັ້ນ​ເທິງ​ເລື່ອນ​ຊັ້ນ ຂັ້ນ​ເງິນ­ເດືອນ 10 ຄັ້ງ 344  ເທື່ອ​ຄົນ ຍິງ  172 ເທື່ອ​ຄົນ ໄດ້​ຄົ້ນ­ຄວ້າ​ປະ­ຕິ­ບັດ​ນະ­ໂຍ­ບາຍ​ລາ​ພັກ​ປະ­ຈຳ​ປີ ຈຳ­ນວນ 184 ເທື່ອ​ຄົນ ຍິງ   76  ເທື່ອ​ຄົນ  ແລະ ໄດ້​ປະ­ຕິ­ບັດ​ນະ­ໂຍ­ບາຍ​ຕໍ່​ພະ­ນັກ­ງານ​ທີ່​ມີ​ຜົນ­ງານ​ຄົບ​ອາ­ຍຸ​ການ ແລະ  ມີ​ເງື່ອນ­ໄຂ​ພັກ­ຜ່ອນ​ຮັບ​ບຳ­ນານ   20 ສະ­ຫາຍ ພັກ­ຜ່ອນ​ຮັບ​ບຳ​ເນັດ 4 ສະ­ຫາຍ ຍິງ 1 ສະ­ຫາຍ ແລະ ນະ­ໂຍ­ບາຍ​ຕໍ່​ພະ­ນັກ­ງານ​ເສຍ​ຊີ­ວິດ 3 ສະ­ຫາຍ ທັງ​ໄດ້​ເອົາ­ໃຈ­ໃສ່​ກວດ­ກາ ຕິດ­ຕາມ ຄຸ້ມ​ຄອງ ແລະ ປ້ອງ​ກັນ​ພັກ​ໃນ​ໄລ­ຍະ 5 ປີ ໄດ້​ດຳ­ເນີນ​ການ​ກວດ­ກາ​ການ­ຈັດ­ຕັ້ງ​ພັກ ການ­ຈັດ­ຕັ້ງ​ລັດ ແລະ ສະ­ມາ­ຊິກ​ພັກ​ເປັນ​ປົກ­ກະ­ຕິ.

ນອກ​ນັ້ນ​ຍັງ​ໄດ້​ດຳ­ເນີນ​ກວດ­ກາ​ສະ­ເພາະ​ກິດ 3 ຄັ້ງ ຜ່ານ​ການ​ກວດ­ກາ​ເຫັນ​ພະ­ນັກ­ງານ​ສໍ້​ລາດ​ບັງ​ຫຼວງ 2 ກໍ­ລະ­ນີ ແລະ ໄພ​ສັງ­ຄົມ 1 ກໍ­ລະ­ນີ ປະ­ຈຸ​ບັນ​ສາ­ມາດ​ເວົ້າ​ໄດ້​ວ່າ​ສະ­ມາ­ຊິກ​ພັກ ພະ­ນັກ­ງານ-ລັດ­ຖະ­ກອນ ທີ່­ຢູ່​ໃນ​ຂອບ​ເຂດ​ຄວາມ​ຮັບ­ຜິດ­ຊອບ​ຂອງ​ຄະ­ນະ​ພັກ​ຮາກ​ຖານ ກໍ​ຄື ພະ​ແນກ​ສ່ວນ​ຫຼາຍ ມີ​ຄຸນ​ທາດ​ການ­ເມືອງ​ໜັກ​ແໜ້ນ ມີ​ຄວາມ​ເສຍ­ສະ­ຫຼະ ຮັກ­ສາ​ໄດ້​ຄວາມ​ລັບ​ຂອງ​ພັກ ນ້ຳ­ໃຈ​ຮັກ​ຊາດ ຮັກ​ລະ­ບອບ​ໃໝ່ ໄດ້​ຮັບ​ການ​ຍົກ​ສູງ​ຂື້ນ ມີ​ຄວາມ​ສາ­ມັກ­ຄີ​ເປັນ​ປຶກ​ແຜ່ນ​ເຮັດ​ສຳ­ເລັດ​ທຸກ​ໜ້າ­ທີ່​ການ ເມືອງ​ທີ່​ພັກ-ລັດ ຂັ້ນ​ເທິງ​ມອບ​ໝາຍ​ໃຫ້.

ຕິດຕໍ່ພວກເຮົາ
error: Content is protected !!