ສະພາບການເກີດອັກຄີໄພເພີ່ມຂຶ້ນ ຮຽກຮ້ອງທຸກຄົນມີສະຕິລະວັງ ເພື່ອຫຼຸດຜ່ອນຄວາມເສຍຫາຍ

ການ​ເກີດ​ອັກ­ຄີ​ໄພ​ຢູ່​ນະ­ຄອນ­ຫຼວງ​ວຽງ​ຈັນ ມີ​ທ່າ​ອ່ຽງ​ເພີ່ມ​ຂຶ້ນ ໂດຍ​ສະ­ເພາະ​ແມ່ນ​ຢູ່​ເຂດ​ຊຸມ​ຊົນ​ທີ່​ແອ​ອັດ ຂະ­ນະ​ດຽວ​ກັນ ການ​ປ້ອງ​ກັນ ແລະ ສະ­ກັດ​ກັ້ນ​ບັນ­ຫາ​ອັກ­ຄີ​ໄພ​ຂອງ​ສັງ­ຄົມ​ຍັງ​ເຮັດ​ບໍ່​ທັນ​ໄດ້​ດີ ຈາກ​ສະ­ພາບ​ການ​ດັ່ງ­ກ່າວ ຈຳ­ເປັນ​ຕ້ອງ​ໄດ້​ສຸມ​ໃສ່​ການ​ໂຄ­ສະ­ນາ​ໃຫ້​ສັງ­ຄົມ​ໄດ້​ຮັບ​ຮູ້ ແລະ ນຳ​ໃຊ້​ວິ­ທີ​ມອດ​ໄຟ​ຢ່າງ​ຖືກ­ຕ້ອງ ພ້ອມ​ທັງ​ລົງ​ກວດ­ກາ ແລະ ຊຸກ­ຍູ້​ໃຫ້​ບັນ­ດາ​ສຳ­ນັກ­ງານ ຫ້ອງ­ການ ແລະ ສະ­ຖານ­ທີ່​ມີ​ຄວາມ​ສ່ຽງ​ເກີດ​ອັກ­ຄີ​ໄພ​ໄດ້​ງ່າຍ ເປັນ­ຕົ້ນ: ຊຸມ​ຊົນ​ທີ່​ແອ​ອັດ ຕະ­ຫຼາດ ແລະ ປ້ຳ­ນ້ຳ­ມັນ ຕ້ອງ​ໃຫ້​ມີ​ບັ້ງ​ມອດ​ໄຟ ຫຼື ລະ­ບົບ​ດັບ​ເພິງ​ທີ່​ດີ ເພື່ອ​ສາ­ມາດ​ດັບ​ມອດ​ໄຟ​ໄດ້​ທັນ​ເວ­ລາ.

ທ່ານ ພັທ ຄຳ​ເພັດ ດາ­ລາ​ວົງ ຫົວ­ໜ້າ​ພະ​ແນກ​ສະ­ກັດ​ກັ້ນ ແລະ ຕ້ານ​ອັກ­ຄີ​ໄພ ນະ­ຄອນ­ຫຼວງ​ວຽງ​ຈັນ ໃຫ້​ຮູ້​ວ່າ: 6 ເດືອນ​ຕົ້ນ​ປີ 2020 ທົ່ວ​ນະ­ຄອນ­ຫຼວງ​ວຽງ​ຈັນ ມີ​ອັກ­ຄີ​ໄພ​ເກີດ​ຂຶ້ນ​ທັງ​ໝົດ 39 ຄັ້ງ ສ້າງ​ຜົນ​ເສຍ​ຫາຍ​ເຖິງ 10 ຕື້​ກວ່າ​ກີບ ຖ້າ​ທຽບ­ໃສ່​ປີ 2019 ແມ່ນ​ເພີ່ມ​ຂຶ້ນ 17 ຄັ້ງ ມີ​ຜູ້​ເສຍ​ຊີ­ວິດ 1 ຄົນ ສາ­ເຫດ​ທີ່​ເພີ່ມ​ຂຶ້ນ ແມ່ນ​ຍ້ອນ​ຍັງ​ມີ​ກຸ່ມ​ຄົນ​ສ່ວນ​ໜຶ່ງ​ທີ່​ຍັງ​ຈູດ​ປ່າ​ຊະ­ຊາຍ ຈູດ​ແລ້ວ​ບໍ່​ມີ​ຄວາມ​ຮັບ­ຜິດ­ຊອບ ປ່ອຍ­ປະ​ລະ­ເລີຍ ໂດຍ​ທີ່​ບໍ່​ຄຳ­ນຶງ​ເຖິງ​ຜົນ​ທີ່​ຈະ​ຕາມ​ມາ ສ່ວນ​ສາ­ເຫດ​ຫຼັກ​ຂອງ​ອັກ­ຄີ​ໄພ​ຍັງ​ແມ່ນ​ໄຟ­ຟ້າ​ລັດ​ວົງ​ຈອນ ເກີດ​ທັງ​ໝົດ 17 ຄັ້ງ ຈູດ​ປ່າ​ຊະ­ຊາຍ 10 ຄັ້ງ ຈູດ​ຂີ້​ເຫຍື້ອ​ລາມ 2 ຄັ້ງ ໄຕ້​ທູບ​ໄຕ້​ທຽນ​ບູ­ຊາ 1 ຄັ້ງ ຈອດ​ເຫຼັກ 1 ຄັ້ງ ວາງ​ເພີງ 1 ຄັ້ງ ຈູດ​ຢາງ​ຕີນ­ລົດ​ແລ້ວ​ລາມ 1 ຄັ້ງ ໄຕ້​ກະ​ຕຽງ​ແລ້ວ​ລືມ​ມອດ 1 ຄັ້ງ ເກີດ​ອຸ­ບັດ­ເຫດ​ເທິງ​ຖະ­ໜົນ​ແລ້ວ ເຮັດ​ໃຫ້​ເກີດ​ມີ​ອັກ­ຄີ​ໄພ 1 ຄັ້ງ ຜົນ​ເສຍ​ຫາຍ​ລວມ​ມີ: ເຮືອນ 21 ຫຼັງ ຮ້ານ​ຂາຍ­ເຄື່ອງ 2 ຮ້ານ​ມີ 9 ລ໋ອກ ລົດ 2 ຄັນ ຫໍ​ພັກ 1 ຫຼັງ ປ່າ​ຫຍ້າ 10 ແຫ່ງ ໂຮງ­ສີ​ເຂົ້າ 10 ແຫ່ງ ບໍ­ລິ­ສັດ 1 ຫຼັງ ຄົນ​ເສຍ​ຊີ­ວິດ 1 ຄົນ ລວມ​ມູນ​ຄ່າ​ຄວາມ​ເສຍ​ຫາຍ ມີ​ເງິນ​ກີບ 12.713 ລ້ານ​ກີບ ເງິນ​ບາດ 2 ລ້ານ​ບາດ ເງິນ​ໂດ​ລາ 119.000 ໂດ​ລາ.

ຕໍ່​ກັບ​ບັນ­ຫາ​ນີ້ ເຈົ້າ​ໜ້າ­ທີ່​ກ່ຽວ­ຂ້ອງ​ໄດ້​ເອົາ­ໃຈ­ໃສ່​ລົງ​ໂຄ­ສະ­ນາ​ເຜີຍ­ແຜ່ ກ່ຽວ​ກັບ​ວິ­ທີ​ປ້ອງ​ກັນ​ອັກ­ຄີ​ໄພ​ຢູ່​ຕາມ​ສຳ­ນັກ­ງານ ອົງ­ການ ໂຮງ​ຈັກ ໂຮງ­ງານ ແລະ ບັນ­ດາ​ບ້ານ​ຕ່າງໆ​ໃນ​ທົ່ວ​ນະ­ຄອນ­ຫຼວງ​ວຽງ​ຈັນ ຢ່າງ​ຕໍ່​ເນື່ອງ​ມາ​ໂດຍ​ຕະ­ຫຼອດ ແຕ່​ກໍ​ມີ​ປະ­ຊາ­ຊົນ​ສ່ວນ​ໜຶ່ງ ບໍ່​ໃຫ້­ການ​ຮ່ວມ​ມື​ດີ​ເທົ່າ​ທີ່​ຄວນ ຈຶ່ງ​ເຮັດ​ໃຫ້​ມີ​ອັກ­ຄີ​ໄພ​ເກີດ​ຂຶ້ນ ພ້ອມ​ທັງ​ສືບ­ຕໍ່​ເຝິກ­ອົບ­ຮົມ ວຽກ​ງານ​ວິ­ຊາ​ສະ­ເພາະ​ໃຫ້​ພະ­ນັກ­ງານ-ນັກ­ຮົບ ເພື່ອ​ເປັນ​ການ​ຍົກ​ລະ­ດັບ​ຄວາມ​ຮູ້​ທາງ​ດ້ານ​ວິ­ຊາ​ສະ­ເພາະ​ໃຫ້​ດີ​ຂຶ້ນ​ກວ່າ​ເກົ່າ ຫັນ​ເອົາ​ກຳ­ລັງ​ລົງ​ສູ່​ພື້ນ­ຖານ ເພື່ອ​ເຮັດ​ວຽກ​ງານ​ກວດ­ກາ ລົງ​ໂຄ­ສະ­ນາ​ເຜີຍ­ແຜ່​ວຽກ​ງານ​ປ້ອງ​ກັນ ອັກ­ຄີ​ໄພ​ຢູ່​ບັນ­ດາ​ສຳ­ນັກ­ງານ ໂຮງ​ຈັກ ໂຮງ­ງານ ໂຮງ­ແຮມ ຕະ­ຫຼາດ ສູນ​ການ​ຄ້າ ແລະ ບ້ານ ເຮືອນ​ປະ­ຊາ­ຊົນ ເພື່ອ​ໃຫ້​ເຂົາ­ເຈົ້າ​ມີ​ສະ­ຕິ​ໃນ​ການ​ປ້ອງ​ກັນ​ອັກ­ຄີ​ໄພ ສືບ­ຕໍ່​ປະ­ສານ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ເຊັ່ນ: ສະ­ຖາ­ນີ​ມອດ​ໄຟ​ແຕ່​ລະ​ເມືອງ ບໍ­ລິ­ສັດ​ໄຟ­ຟ້າ​ລາວ ບໍ­ລິ­ສັດ​ນ້ຳ​ປະ­ປາ ກົມ​ຕຳ­ຫຼວດ​ສະ­ກັດ​ກັ້ນ ແລະ ຕ້ານ​ອັກ­ຄີ​ໄພ​ກະ­ຊວງ​ປ້ອງ​ກັນ​ຄວາມ​ສະ­ຫງົບ ແລະ ໜ່ວຍ​ກູ້​ໄພ​ອື່ນໆ ແລະ ກຽມ­ພ້ອມ​ພາ­ຫະ­ນະ​ອຸ­ປະ­ກອນ ແລະ ກຳ­ລັງ​ປະ­ຈຳ­ການ​ຄອຍ​ເຫດ ເພື່ອ​ພ້ອມ​ປະ­ຕິ­ບັດ​ໜ້າ­ທີ່​ຕະ­ຫຼອດ 24 ຊົ່ວ­ໂມງ.

ຕິດຕໍ່ພວກເຮົາ