ຮ່ວມສົມທົບທຶນບູລະນະປະຕິສັງຂອນ ພະທາດຖິ່ນຊ້ອຍ ເປັນຂວັນມິ່ງເມືອງ

ພະ­ທາດ​ເຈ­ດີ ວັດ​ຖິ່ນ​ຊ້ອຍ ຕັ້ງ​ຢູ່​ບ້ານ ແລະ ເມືອງ​ປາກ​ງື່ມ ນະ­ຄອນ­ຫຼວງ​ວຽງ​ຈັນ ເຊິ່ງ​ພະ­ທາດ​ແຫ່ງ​ນີ້ ເປັນ​ມໍ­ລະ­ດົກ​ສະ­ຖານ­ທີ່​ເກົ່າ​ແກ່​ອີກ​ແຫ່ງ​ໜຶ່ງ ທີ່​ຕິດ​ພັນ​ກັບ​ປະ­ຫວັດ­ສາດ​ແຫ່ງ​ການ​ຕໍ່­ສູ້ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ​ຂອງ​ບັນ­ພະ­ບຸ­ລຸດ​ລາວ ຕາມ​ຂໍ້​ມູນ​ທີ່​ໄດ້​ບັນ­ທຶກ​ໄວ້ ພະ­ທາດ​ຖິ່ນ​ຊ້ອຍ ສ້າງ­ຕັ້ງ​ຂຶ້ນ​ໃນ​ປີ ຄສ 1570 ມາ​ຮອດ​ປັດ­ຈຸ­ບັນ ພະ­ທາດ​ດັ່ງ­ກ່າວ​ອາ­ຍຸ​ເກືອບ 450 ປີ​ແລ້ວ ຈຶ່ງ​ເຮັດ​ໃຫ້​ສະ­ພາບ​ຂອງ​ພະ­ທາດ​ພຸ​ພັງ​ອອກ​ເກືອບ​ໝົດ ສະ­ນັ້ນ ອົງ­ການ​ປົກ­ຄອງ​ເມືອງ ໂດຍ​ພາຍ​ໃຕ້​ການ​ນຳ­ພາ​ຂອງ​ທ່ານ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ຄອບ­ຄົວ ສົມ­ທົບ​ກັບ​ອຳ­ນາດ​ການ​ປົກ­ຄອງ​ເມືອງ ໄດ້​ມີ​ຈິດ​ສັດ­ທາ​ຮ່ວມ​ກັນ​ບູ­ລະ­ນະ​ພະ­ທາດ​ແຫ່ງ​ນີ້ ກັບ​ຄືນ​ມາ​ເປັນ​ພະ­ທາດ​ທີ່​ມີ​ຄວາມ​ສວຍ​ສົດ​ງົດ​ງາມ ຮັກ­ສາ​ໄວ້​ໃຫ້​ລຸ້ນ​ລູກ​ລຸ້ນ​ຫຼານ​ໄດ້​ເຫັນ ແລະ ເຄົາ­ລົບ​ກາບ​ໄຫວ້​ບູ­ຊາ​ສືບ­ຕໍ່​ໄປ ດັ່ງ­ນັ້ນ ຈຶ່ງ​ໄດ້​ຮ່ວມ​ໃຈ​ກັນ​ຈັດ​ຕັ້ງ​ກອງ​ບຸນ​ຂຶ້ນ 12 ກອງ ໃນ​ວັນ​ທີ 3-4 ກໍ­ລະ­ກົດ​ຜ່ານ​ມາ ເພື່ອ​ເປັນ​ການ​ສັກ­ກາ­ລະ​ບູ­ຊາ ຄອບ​ໄຂວ່​ສິ່ງ​ສັກ­ສິດ ເຈົ້າ​ຖິ່ນ ເຈົ້າ​ຖານ ຖື​ເປັນ​ນິ­ມິດ​ໝາຍ​ແຫ່ງ​ການ​ເປີດ​ພິ­ທີ​ໃນ​ການ​ຫ້າງ​ຫາ​ກະ­ກຽມ ປະ­ຕິ­ສັງ­ຂອນ​ພະ­ທາດ​ເຈ­ດີ ວັດ​ຖິ່ນ​ຊ້ອຍ ແນ­ໃສ່​ໃຫ້​ພໍ່​ແມ່​ປະ­ຊາ­ຊົນ​ຊາວ​ເມືອງ​ປາກ​ງື່ມ ຕະ­ຫຼອດ​ຮອດ​ບັນ­ດາ​ຜູ້​ທີ່​ມີ​ຈິດ­ໃຈ​ໃສ​ສັດ­ທາ​ທັງ​ພາຍ​ໃນ ແລະ ຕ່າງ­ປະ­ເທດ ມາ​ຊ່ວຍ​ສົມ­ທົບ​ທຶນ​ປະ­ຕິ­ສັງ­ຂອນ​ພະ­ທາດ​ແຫ່ງ​ນີ້ ໃຫ້​ກັບ​ຄືນ​ສູ່​ສະ­ພາບ​ເດີມ ເປັນ​ຂວັນ​ມິ່ງ​ເມືອງ​ໃຫ້​ແກ່​ຄົນ​ລຸ້ນ​ຕໍ່​ໄປ.

ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ໃຫ້​ຮູ້​ວ່າ: ໂຄງ­ການ​ປະ­ຕິ­ສັງ­ຂອນ​ພະ­ທາດ​ເຈ­ດີ ວັດ​ຖິ່ນ​ຊ້ອຍ ແມ່ນ​ນອນ​ໃນ 10 ໂຄງ­ການ​ຂອງ ນວ ເພື່ອ​ກະ­ກຽມ​ໃຫ້​ແກ່​ງານ​ສະ­ເຫຼີມ​ສະ​ຫຼຼອງ ນວ ຄົບ­ຮອບ 450 ປີ ໃນ​ປີ 2010 ແຕ່​ດ້ວຍ​ເຫດ­ຜົນ​ບາງ​ດ້ານ ທີ່​ຍັງ​ບໍ່​ທັນ​ໄດ້​ມີ​ຄວາມ​ພ້ອມ ໂຄງ­ການ​ດັ່ງ­ກ່າວ​ຈຶ່ງ​ບໍ່​ທັນ​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ໃນ​ໄລ­ຍະ​ນັ້ນ ຜ່ານ​ມາ​ພະ​ແນກ ຖວ​ທ ນວ ໄດ້​ສົມ­ທົບ​ກັບ​ກົມ​ມໍ­ລະ­ດົກ ກົມ​ວິ­ຈິດ​ສິນ ແລະ ອົງ­ການ​ປົກ­ຄອງ​ເມືອງ​ປາກ​ງື່ມ ສືບ­ຕໍ່​ການ​ສຳ​ຫຼວດ ແລະ ປຶກ­ສາ​ຫາ­ລື​ແຜນ­ການ​ບູ­ລະ­ນະ​ປະ­ຕິ­ສັງ­ຂອນ ເຊິ່ງ​ມາ​ຮອດ​ປີ 2016 ພະ​ແນກ ຖວ​ທ ນວ ໄດ້​ສັງ​ລວມ​ບັນ­ດາ​ຂໍ້​ມູນ​ທັງ​ໝົດ​ກ່ຽວ​ກັບ​ໂຄງ­ການ ເພື່ອ​ລາຍ​ງານ​ຂໍ​ທິດ​ຊີ້​ນຳ​ຈາກ​ການ​ນຳ ນວ ເພື່ອ​ລົງ­ມື​ປະ­ຕິ­ບັດ ເຊິ່ງ​ພະ​ແນກ ຖວ​ທ ນວ ໄດ້​ຂຽນ​ເປັນ​ໂຄງ­ການ​ສະ­ເໜີ​ຂໍ​ອະ­ນຸ­ມັດ​ງົບ­ປະ­ມານ ເພື່ອ​ມາ​ເຮັດ​ຮົ້ວ ແລະ ບູ­ລະ­ນະ​ເບື້ອງ​ຕົ້ນ ປັດ­ຈຸ­ບັນ ສຳ­ເລັດ​ການ​ສ້າງ​ຮົ້ວ​ອ້ອມ​ສອງ​ດ້ານ ຄື: ດ້ານ​ໜ້າ ແລະ ດ້ານ​ຂ້າງ ເພື່ອ​ເປັນ​ຂອບ​ເຂດ​ຂອງ​ວັດ ແຕ່​ເນື່ອງ​ຈາ​ກວ່າ​ໄລ­ຍະ​ປີ 2017 ຄະ­ນະ​ຮັບ­ຜິດ­ຊອບ​ດັ່ງ­ກ່າວ​ແມ່ນ​ໄດ້​ສຸມ​ໃສ່​ການ​ບູ­ລະ­ນະ​ປະ­ຕິ­ສັງ­ຂອນ ຫໍ­ພະ­ແກ້ວ ແລະ ສືບ­ຕໍ່​ປະ­ຕິ­ສັງ­ຂອນ​ພະ​ທາດ­ຫຼວງ​ວຽງ​ຈັນ ຈຶ່ງ​ເຮັດ​ໃຫ້­ການ​ບູ­ລະ­ນະ​ພະ­ທາດ​ເຈ­ດີ ວັດ​ຖິ່ນ​ຊ້ອຍ ບໍ່​ໄດ້​ສືບ­ຕໍ່​ຈັດ​ຕັ້ງ​ປະ­ຕິ­ບັດ ອີກ​ເຫດ­ຜົນ​ໜຶ່ງ ການ​ກະ­ກຽມ​ບາງ​ເນື້ອ​ໃນ​ຂໍ້​ມູນ​ຂອງ​ພະ­ທາດ​ຍັງ​ບໍ່​ທັນ​ລະ­ອຽດ​ຄົບ​ຖ້ວນ ຍັງ​ບໍ່​ທັນ​ເອ­ກະ​ພາບ​ທາງ​ດ້ານ​ເຕັກ­ນິກ ແລະ ຮູບ​ການ​ບູ­ລະ­ນະ.

ມາ​ຮອດ​ປັດ­ຈຸ­ບັນ ໂຄງ­ການ​ປະ­ຕິ­ສັງ­ຂອນ​ພະ​ທາດ­ຫຼວງ​ວຽງ​ຈັນ​ສຳ­ເລັດ​ແລ້ວ ຄວາມ​ພ້ອມ​ທາງ​ດ້ານ​ເຕັກ­ນິກ​ວິ­ຊາ​ການ ກຳ­ລັງ​ແຮງ​ສັດ­ທາ​ທີ່​ຕ້ອງ­ການ​ປະ­ກອບ­ສ່ວນ​ບູ­ລະ­ນະ ກໍ​ເຫັນ​ວ່າ​ມີ​ຫຼາຍ​ສົມ­ຄວນ ດັ່ງ­ນັ້ນ ໃນ​ກອງ​ປະ­ຊຸມ​ອົງ­ການ​ປົກ­ຄອງ ຄັ້ງ​ວັນ​ທີ 24 ກຸມ­ພາ 2020 ເຫັນ​ດີ​ໃຫ້​ມີ​ການ​ປະ­ຕິ­ສັງ­ຂອນ ຫຼື ບູ­ລະ­ນະ​ພະ­ທາດ​ເຈ­ດີ ວັດ​ຖິ່ນ​ຊ້ອຍ ເມືອງ​ປາກ​ງື່ມ ຕາມ​ແຜນ​ຕົກ­ລົງ​ກັນ​ມາ ໂດຍ​ໃຫ້​ປະ­ຕິ­ບັດ​ຕາມ​ແຕ່​ລະ​ຂັ້ນ​ຕອນ ຄື: ແຕ່ງ­ຕັ້ງ​ຄະ­ນະ​ຮັບ­ຜິດ­ຊອບ​ໃຫ້​ຈັດ​ສຳ​ມະ​ນາ​ເລື່ອງ​ຫົວ­ຂໍ້​ທີ່​ຈະ​ປະ­ຕິ­ສັງ­ຂອນ ຫຼື ບູ­ລະ­ນະ ແລະ ໃຫ້​ນຳ​ສະ­ເໜີ​ຮູບ​ແບບ­ແຜນ​ການ­ຈັດ­ຕັ້ງ​ປະ­ຕິ­ບັດ ພາຍ­ຫຼັງ​ທີ່​ໄດ້​ຮັບ​ຄຳ​ເຫັນ​ຊີ້​ນຳ​ຂອງ​ກອງ​ປະ­ຊຸມ ພະ​ແນກ ຖວ​ທ ນວ ໄດ້​ສົມ­ທົບ​ກັບ​ເມືອງ​ປາກ​ງື່ມ ເພື່ອ​ກະ­ກຽມ​ຄວາມ​ພ້ອມ​ດ້ານ​ຕ່າງໆ ເປັນ­ຕົ້ນ ໄດ້​ກຳ­ນົດ​ການ​ຈັດ​ພິ­ທີ​ທາງ​ສາ­ສະ­ໜາ ເບື້ອງ​ຕົ້ນ​ໄດ້​ກຳ­ນົດ​ເອົາ​ມື້­ກ່ອນ​ບຸນ­ປີ­ໃໝ່​ລາວ ຫຼັງ​ຈາກ​ນັ້ນ ຈຶ່ງ​ຈັດ​ສຳ​ມະ​ນາ​ດ້ານ​ວິ­ຊາ​ການ ແຕ່​ເນື່ອງ​ຈາ​ກວ່າ​ໄລ­ຍະ​ກະ­ກຽມ​ສຳ​ມະ​ນາ ຖື​ເປັນ​ໄລ­ຍະ​ການ​ລະ­ບາດ​ຂອງ​ພະ­ຍາດ​ໂຄ​ວິດ-19 ຈຶ່ງ​ເຮັດ​ໃຫ້​ພວກ​ເຮົາ​ບໍ່​ໄດ້​ດຳ­ເນີນ​ແຜນ​ວຽກ​ຕາມ​ທີ່​ໄດ້​ກຳ­ນົດ​ໄວ້ ປັດ­ຈຸ­ບັນ​ແມ່ນ​ໄດ້​ລາຍ​ງານ​ຂໍ​ທິດ​ຊີ້​ນຳ​ຈາກ​ທ່ານ ລມຕ ກະ­ຊວງ ຖວ​ທ ເຊິ່ງ​ເພິ່ນ​ເຫັນ​ດີ​ຕາມ​ການ​ຕົກ­ລົງ​ຂອງ​ອົງ­ການ​ປົກ­ຄອງ ນວ ແລະ ເຫັນ​ດີ​ໃຫ້​ກົມ​ມໍ­ລະ­ດົກ ແລະ ກົມ​ວິ­ຈິດ​ສິນ​ລົງ​ມາ​ຕິດ­ຕາມ ໃນ​ການ­ຈັດ­ຕັ້ງ​ປະ­ຕິ­ບັດ​ຢ່າງ​ໃກ້​ສິດ.

ສຳ­ລັບ​ໜ້າ​ວຽກ​ທີ່​ຈະ​ດຳ­ເນີນ​ການ​ປະ­ຕິ­ສັງ­ຂອນ​ຄັ້ງ​ນີ້ ປະ­ກອບ​ດ້ວຍ ບູ­ລະ­ນະ​ສ້ອມ­ແປງ​ຄືນ​ອົງ​ພະ­ທາດ ເພື່ອ​ໃຫ້​ມີ​ສະ­ພາບ​ທີ່​ສົມ­ບູນ ແລະ ຮັກ­ສາ​ຮູບ­ຊົງ​ເດີມ​ໃຫ້​ໃກ້​ຄຽງ​ທີ່​ສຸດ​ເທົ່າ​ທີ່​ຈະ​ເຮັດ​ໄດ້ ສ້າງ​ຜາ­ສາດ​ຫີນ ເພື່ອ​ເປັນ​ອຸບ​ໂມງ​ກວມ​ເອົາ​ພະ­ທາດ​ເກົ່າ ເປັນ​ການ​ຮັກ­ສາ​ອົງ​ພະ­ທາດ​ໃຫ້​ມີ​ຄວາມ​ທົນ​ທານ ບູ­ລະ­ນະ​ສ້ອມ­ແປງ​ສິມ​ເກົ່າ ແລະ ວາງ​ແຜນ​ຈັດ​ສັນ​ສະ­ພາບ​ແວດ​ລ້ອມ​ອ້ອມ​ຂ້າງ​ໃຫ້​ມີ​ຄວາມ​ກົມ​ກືນ​ຈົບ­ງາມ ແລະ ສາ­ມາດ​ຮອງ​ຮັບ​ການ​ບໍ­ລິ­ການ​ນັກ​ທ່ອງ​ທ່ຽວ​ໃນ­ຕໍ່­ໜ້າ ຄາດ​ຄະ­ເນ​ເວ­ລາ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ດັ່ງ­ກ່າວ ຈະ​ໃຊ້​ເວ­ລາ​ປະ­ມານ 2 ປີ ເຊິ່ງ​ງົບ­ປະ­ມານ​ທີ່​ມີ​ຄວາມ​ຕ້ອງ­ການ​ໃນ​ເບື້ອງ​ຕົ້ນ​ປະ­ມານ 2 ຕື້​ກວ່າ​ກີບ.

ເຖິງ​ແມ່ນ​ວ່າ​ໂຄງ­ການ​ປະ­ຕິ­ສັງ­ຂອນ​ພະ­ທາດ​ເຈ­ດີ​ວັດ​ຖິ່ນ​ຊ້ອຍ​ຄັ້ງ​ນີ້ ໄດ້​ມີ​ການ​ກະ­ກຽມ​ມາ​ເປັນ​ເວ­ລາ​ອັນ​ສົມ­ຄວນ ທັງ​ພາກ​ລັດ​ກໍ​ໄດ້​ອະ­ນຸ­ມັດ​ງົບ­ປະ­ມານ​ຈຳ­ນວນ​ໜຶ່ງ ແຕ່​ຖ້າ​ອີງ­ໃສ່​ຄວາມ​ຮຽກ­ຮ້ອງ​ຕົວ​ຈິງ​ຂອງ​ງົບ­ປະ­ມານ​ແມ່ນ​ສູງ​ສົມ­ຄວນ ເພາະ​ມີ​ຫຼາຍ​ກິດ­ຈະ­ກຳ​ທີ່​ຕ້ອງ​ໄດ້​ດຳ­ເນີນ ເພາະ­ສະ­ນັ້ນ ເພື່ອ​ຮັບ­ປະ­ກັນ​ໃຫ້​ໂຄງ­ການ​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ ແລະ ມີ​ຜົນ­ສຳ­ເລັດ​ຕາມ​ຈຸດ­ປະ­ສົງ​ລະ­ດັບ​ຄາດ­ໝາຍ ຂໍ​ເຊີນ­ຊວນ​ອົງ​ການ­ຈັດ­ຕັ້ງ​ທຸກ​ພາກ­ສ່ວນ ພີ່­ນ້ອງ​ຮວມ​ຊາດ ຊາວ​ສາ​ສະ​ນິກ​ກະ​ຊົນ​ທັງ­ຫຼາຍ ເພື່ອ​ພ້ອມ​ກັນ​ປະ­ກອບ­ສ່ວນ ວັດ­ຖຸ​ປັດ​ໄຈ​ຮັບ​ໃຊ້​ເຂົ້າ​ໃນ​ໂຄງ­ການ​ຄັ້ງ​ນີ້​ໃຫ້​ປະ­ສົບ​ຜົນ­ສຳ­ເລັດ ເຊິ່ງ​ການ​ຮັບ​ທຶນ​ສົມ­ທົບ​ໂຄງ­ການ ຈະ​ໄດ້​ມີ​ຄະ­ນະ​ກຳ­ມະ­ການ​ຮັບ­ຜິດ­ຊອບ​ຢ່າງ​ລະ­ອຽດ ແລະ ເລີ່ມ​ຮັບ​ນັບ​ແຕ່​ມື້​ເປີດ​ໂຄງ­ການ​ເປັນ­ຕົ້ນ​ໄປ ຈົນ​ກວ່າ​ໂຄງ­ການ​ຈະ​ສຳ­ເລັດ​ຕາມ​ໜ້າ​ວຽກ​ທີ່​ໄດ້​ກຳ­ນົດ​ໄວ້.

ຕິດຕໍ່ພວກເຮົາ
error: Content is protected !!