ຈັນທະບູລີ ສູ້ຊົນໃຫ້ການສອບເສັງຈົບຊັ້ນ ປ5 ບັນລຸໄດ້ 100%

ປັດ­ຈຸ­ບັນ ຫຼາຍ​ໂຮງ­ຮຽນ​ໃນ​ຂອບ​ເຂດ​ທົ່ວ​ປະ­ເທດ ກຳ­ລັງ​ດຳ­ເນີນ​ການ​ສອບ­ເສັງ​ເລື່ອນ​ຂັ້ນ ແລະ ພວມ​ຢູ່​ໃນ​ໄລ­ຍະ​ຂອງ​ການ​ຫ້າງ​ຫາ​ກະ­ກຽມ ການ​ສອບ­ເສັງ​ຈົບ​ຊັ້ນ​ມັດ­ທະ­ຍົມ​ສຶກ​ສາ ແລະ ມີ​ບາງ​ໂຮງ­ຮຽນ ໄດ້​ເປີດ​ການ​ສອບ­ເສັງ​ຈົບ​ຊັ້ນ​ປະ­ຖົມ​ສຶກ​ສາ​ສົມ­ບູນ (ປ5) ພ້ອມ​ຕັ້ງ​ເປົ້າ​ໝາຍ​ໃນ​ການ​ສອບ­ເສັງ ຄຽງ​ຄູ່​ກັບ​ການ​ເອົາ­ໃຈ­ໃສ່​ປະ­ຕິ­ບັດ​ມາດ​ຕະ­ການ​ເວັ້ນ​ໄລ­ຍະ​ຫ່າງ ມີ​ການ​ກວດ­ກາ​ວັດ­ແທກ​ອຸນ­ຫະ­ພູມ​ກ່ອນ​ເຂົ້າ​ສູນ​ສອບ­ເສັງ ກໍ​ຄື ຫ້ອງ​ສອບ­ເສັງ ເພື່ອ​ຮັບ­ປະ­ກັນ​ໃຫ້­ການ​ສອບ­ເສັງ​ມີ​ປະ­ສິດ­ທິ­ພາບ ທັງ​ຮັບ­ປະ­ກັນ​ການ​ຕ້ານ​ພະ­ຍາດ​ໂຄ​ວິດ-19.

ທ່ານ ຈັນ­ທະ​ຄານ ລັດ­ຕະ­ນາ ຮອງ​ຫົວ­ໜ້າ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ກ່າວ​ວ່າ: ອີງ​ຕາມ​ຂໍ້​ຕົກ­ລົງ​ຂອງ​ທ່ານ​ເຈົ້າ­ເມືອງ​ຈັນ­ທະ​ບູ​ລີ ວ່າ​ດ້ວຍ​ການ​ແຕ່ງ­ຕັ້ງ​ຄະ­ນະ​ກຳ­ມະ­ການ ຮັບ­ຜິດ­ຊອບ​ການ​ສອບ­ເສັງ​ຈົບ​ຊັ້ນ​ປະ­ຖົມ​ສຶກ​ສາ​ສົມ­ບູນ (ປ5) ສົກ­ຮຽນ 2019-2020 ອີງ​ຕາມ​ຄຳ​ແນະ­ນຳ​ຂອງ​ກະ­ຊວງ​ສຶກ​ສາ​ທິ​ການ ແລະ ກີ­ລາ ຫົວ­ໜ້າ​ກົມ​ສາ­ມັນ​ສຶກ​ສາ​ວ່າ​ດ້ວຍ​ການ​ໄຂ​ໂຮງ­ຮຽນ​ສາ­ມັນ​ສຶກ​ສາ​ຄືນ­ໃໝ່ ລວມ​ທັງ​ການ​ສອບ­ເສັງ​ພາກ II ແລະ ຈົບ​ຊັ້ນ​ປະ­ຖົມ​ສຶກ​ສາ​ສົມ­ບູນ ປີ​ທີ 5 ແລະ ແຈ້ງ​ການ​ຂອງ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ ສະ­ບັບ​ເລກ​ທີ 1016/ສກມ ນວ ນະ­ຄອນ­ຫຼວງ​ວຽງ​ຈັນ ເພື່ອ​ກະ­ກຽມ​ການ​ສອບ­ເສັງ​ຈົບ​ຊັ້ນ​ປະ­ຖົມ​ສຶກ​ສາ ປ5 ໃນ​ທົ່ວ​ເມືອງ​ຈັນ­ທະ​ບູ​ລີ ລະ­ຫວ່າງ​ວັນ​ທີ 15-16 ກໍ­ລະ­ກົດ 2020.

ສະ­ເພາະ​ສົກ­ຮຽນ​ນີ້ ທົ່ວ​ເມືອງ​ຈັນ­ທະ​ບູ​ລີ ມີ​ຈຳ­ນວນ​ໂຮງ­ຮຽນ​ປະ­ຖົມ​ສຶກ​ສາ​ທັງ​ໝົດ 33 ແຫ່ງ ໃນ​ນັ້ນ ມີ​ໂຮງ­ຮຽນ​ລັດ 15 ແຫ່ງ ມີ​ຈຳ­ນວນ​ນັກ­ຮຽນ​ເຂົ້າ​ຮ່ວມ​ສອບ­ເສັງ​ທັງ​ໝົດ 1.436 ຄົນ ຍິງ 704 ຄົນ ແບ່ງ​ສູນ​ສອບ­ເສັງ​ອອກ​ເປັນ 4 ສູນ ຄື: ນາ​ໄຮ​ດຽວ ຫງວຽນ​ຢູ ຈອມ​ຄຳ ແລະ ສູນ​ສອບ­ເສັງ​ໂຮງ­ຮຽນ​ປະ­ຖົມ​ສົມ­ບູນ​ສິນ​ໄຊ ແບ່ງ​ເປັນ 72 ຫ້ອງ​ສອບ­ເສັງ ມີ​ວິ­ຊາ​ສອບ­ເສັງ 3 ວິ­ຊາ ຄື: ວິ­ຊາ​ຫັດ​ແຕ່ງ (ຂຽນ​ທວາຍ+ຄຳ​ຖາມ) ຄະ­ນິດ­ສາດ ແລະ ວິ­ຊາ​ໂລກ​ອ້ອມ​ຕົວ ມີ​ຄະ­ນະ​ກຳ­ມະ­ການ 304 ທ່ານ ເຊິ່ງ​ໄດ້​ຈັດ​ພິ­ທີ​ໄຂ​ການ​ສອບ­ເສັງ​ຂຶ້ນ​ວັນ​ທີ 15 ກໍ­ລະ­ກົດ 2020 ທີ່​ໂຮງ­ຮຽນ​ປະ­ຖົມ​ສົມ­ບູນ​ສິນ​ໄຊ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ.

ຈຸດ­ປະ­ສົງ​ລະ­ດັບ​ຄາດ­ໝາຍ ເພື່ອ​ເປັນ​ການ​ຕິດ­ຕາມ ກວດ­ກາ ແລະ ປະ​ເມີນ​ຜົນ​ຕໍ່​ການ​ບໍ­ລິ­ຫານ​ຄຸ້ມ​ຄອງ​ໂຮງ­ຮຽນ​ສາ­ມັນ​ສຶກ​ສາ ໃນ​ທົ່ວ​ເມືອງ​ຈັນ­ທະ​ບູ​ລີ ໂດຍ​ສະ­ເພາະ ການ​ຮຽນ-ການ​ສອນ ການ​ປະ­ຕິ­ບັດ​ໂຄງ­ການ​ຫຼັກ­ສູດ​ການ​ປະ­ຕິ­ບັດ 3 ຂໍ້​ແຂ່ງ­ຂັນ​ທີ່​ກະ­ຊວງ​ສຶກ​ສາ​ທິ​ການ ແລະ ກີ­ລາ ວາງ​ອອກ​ໃຫ້​ປະ­ກົດ​ຜົນ​ເປັນ​ຈິງ ເພື່ອ​ປະ­ຕິ­ບັດ​ຕາມ​ແຜນ​ພັດ­ທະ­ນາ​ການ​ສຶກ​ສາ​ຂອງ​ຫ້ອງ­ການ​ສຶກ​ສາ​ທິ​ການ ແລະ ກີ­ລາ​ເມືອງ​ຈັນ­ທະ​ບູ​ລີ ປະ­ຈຳ​ສົກ­ຮຽນ 2019-2020 ເພື່ອ​ສູ້​ຊົນ​ໃຫ້­ການ​ສອບ­ເສັງ​ຈົບ​ຊັ້ນ ປ5 ທົ່ວ​ເມືອງ​ບັນ­ລຸ​ໄດ້ 100%.

ໂອ­ກາດ ທ່ານ ບຸນ​ໜາ ຜາ​ທຸມ​ມະ​ວົງ ເຈົ້າ­ເມືອງ​ຈັນ­ທະ​ບູ​ລີ ເຂົ້າ​ຮ່ວມ​ພິ­ທີ​ເປີດ​ການ​ສອບ­ເສັງ​ຈົບ​ຊັ້ນ​ປະ­ຖົມ​ສຶກ​ສາ​ໃນ​ທົ່ວ​ເມືອງ​ຄັ້ງ​ນີ້ ເຊິ່ງ​ໄດ້​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ຕໍ່​ຄະ­ນະ​ຜູ້​ບໍ­ລິ­ການ​ໂຮງ­ຮຽນ ຫົວ­ໜ້າ​ອຳ­ນວຍ​ການ ລວມ​ທັງ​ພໍ່​ແມ່​ຜູ້​ປົກ­ຄອງ ແລະ ພະ­ນັກ­ງານ​ຄູ-ອາ­ຈານ​ທຸກ​ທ່ານ ພ້ອມ​ດ້ວຍ​ລູກ​ຫຼານ​ນັກ­ຮຽນ​ທຸກ​ຄົນ ທີ່​ພ້ອມ​ກັນ​ອົດ­ທົນ​ຜ່ານ​ຜ່າ​ອຸ­ປະ­ສັກ​ຕ່າງໆ ໂດຍ​ສະ­ເພາະ ບັນ­ຫາ​ພະ­ຍາດ​ໂຄ​ວິດ-19 ໄດ້​ເອົາ­ໃຈ­ໃສ່​ສືບ­ຕໍ່​ສິດ­ສອນ-ຮ່ຳ­ຮຽນ​ຈົບ​ໂຄງ­ການ​ຫຼັກ­ສູດ ໂອ­ກາດ​ອັນ​ມີ​ຄວາມ​ໝາຍ​ສຳ­ຄັນ​ຄື​ດັ່ງ­ກ່າວ ຮຽກ­ຮ້ອງ​ໃຫ້​ນັກ­ຮຽນ​ທຸກ​ຄົນ ຈົ່ງ​ຕັ້ງ­ໃຈ​ສຸມ​ໃສ່​ການ​ສອບ­ເສັງ​ໃຫ້​ສຳ­ເລັດ​ພ້ອມ​ດຽວ​ກັນ​ຄູ-ອາ­ຈານ ຄະ­ນະ​ຮັບ­ຜິດ­ຊອບ​ການ​ສອບ­ເສັງ ຈົ່ງ​ເອົາ­ໃຈ­ໃສ່​ປະ­ຕິ­ບັດ​ໜ້າ­ທີ່​ຂອງ​ຕົນ ໃຫ້​ຖືກ­ຕ້ອງ​ສອດ­ຄ່ອງ​ຕາມ​ລະ­ບຽບ​ຫຼັກ­ການ ຮັບ­ປະ­ກັນ​ຄວາມ​ໂປ່ງ​ໃສ​ເປັນ­ກາງ ຍຸ­ຕິ​ທຳ ດ້ວຍ​ຄວາມ​ຮັບ​ຜິດ​ສອບ​ສູງ ເຮັດ​ໃຫ້­ການ​ສອບ­ເສັງ​ຄັ້ງ​ນີ້ ບັນ­ລຸ​ໄດ້​ຕາມ​ຈຸດ­ປະ­ສົງ​ລະ­ດັບ​ຄາດ­ໝາຍ​ທີ່​ວາງ​ໄວ້.

ນຳ​ສະ­ເໜີ​ໂດຍ: ແວ່ນ​ຂາວ

ຕິດຕໍ່ພວກເຮົາ
error: Content is protected !!