ຈັນຍາບັນຄູ

ບັນ­ຫາ​ຂອງ​ຄູ​ມີ​ຫຼາຍ​ແບບ ເຊັ່ນ: ເງິນ­ເດືອນ​ຄູ​ບໍ່​ອອກ ຄູ​ອາ­ສາ​ຢູ່​ຫຼາຍ​ປີ​ບໍ່​ໄດ້​ເຂົ້າ​ເປັນ​ລັດ­ຖະ­ກອນ ຄູ​ລຳ­ອຽງ​ນັກ­ຮຽນ​ເລື່ອງ​ການ​ໃຫ້​ຄະ­ແນນ ເຊິ່ງ​ບັນ­ຫາ​ແບບ​ນີ້​ມັນ​ພົວ­ພັນ​ເຖິງ​ຈັນ​ຍາ​ບັນ​ຄູ​ໂດຍ​ກົງ ແລະ ຖ້າ­ວ່າ​ຄູ​ໄດ້​ອ່ານ­ໜັງ­ສື​ພິມ​ສຶກ​ສາ-ກີ­ລາ ເຂົາ​ພິມ​ໄວ້­ໜ້າ​ທຳ​ອິດ​ມູມ​ແຈ​ຂວາ​ມື ບອກ​ຈັນ​ຍາ​ບັນ​ຄູ​ລາວ​ໂລດ 5 ຂໍ້ ໂດຍ​ສະ­ເພາະ ຄູ​ຕ້ອງ​ຮັກ­ແພງ​ຜູ້​ຮຽນ ເຊິ່ງ​ແມ່ນ​ຈັນ​ຍາ​ບັນ​ຂໍ້​ໜຶ່ງ​ທີ່​ຄູ​ຕ້ອງ​ທ່ອງ​ຂຶ້ນ​ໃຈ ໂດຍ​ຫຼີກ­ເວັ້ນ​ອະ­ຄະ­ຕິ​ຮັກ​ບັງ​ຊັງ​ບ່ຽງ.

ຫາງ​ສຽງ​ຄູ​ໄລ່​ນັກ­ຮຽນ​ອອກ​ຈາກ​ຫ້ອງ​ສອບ­ເສັງ ຍ່ອມ​ເປັນ​ເລື່ອງ​ສັງ­ຄົມ​ເຂົາ​ຕິດ­ຕາມ ເພາະ​ເຂົາ​ຢ້ານ​ມັນ​ຈະ​ເກີດ​ຂຶ້ນ​ກັບ​ລູກ​ເຂົາ​ມື້​ໃດ​ມື້­ໜຶ່ງ ໃນ​ແງ່​ຂອງ​ຄວາມ​ໃຈ­ແຄບ ຫຼື ຜິດ​ລະ­ບຽບ​ແບບ​ບໍ່​ໄດ້​ຕັກ­ເຕືອນ ຫຼື ລົງ­ໂທດ​ຕາມ​ອັດ​ຕະ​ວິ­ໄສ​ຂອງ​ຄູ​ທີ່​ຂາດ​ຈັນ​ຍາ​ບັນ ການ­ຈັດ­ຕັ້ງ​ກ່ຽວ­ຂ້ອງ​ຄວນ​ເຂັ້ມ​ງວດ​ກວດ​ສອບ​ຫາງ​ສຽງ​ສັງ­ຄົມ​ເປັນ​ຈິງ​ພຽງ​ໃດ ? ເຮົາ​ຈະ​ຮັກ­ສາ​ຜູ້​ລະ­ເມີດ​ລະ­ບຽບ​ຈັນ​ຍາ​ບັນ ຫຼື ເຮົາ​ຈະ​ຢຶດ​ໝັ້ນ​ຈັນ​ຍາ​ບັນ​ເປັນ​ໂຕ​ແກ້​ບັນ­ຫາ​ຄວາມ​ຍຸ­ຕິ​ທຳ​ຄວນ​ເກີດ​ຂຶ້ນ​ກັບ​ທຸກ​ຝ່າຍ ບໍ່​ແມ່ນ​ເຮັດ​ຫູ­ໜວກ​ກິນ​ຟານ ເລືອກ​ວິ­ທີ​ແກ້​ບັນ­ຫາ​ແບບ​ນ້ຳ​ເຢັນ​ແລ້ວ​ຫາຍ​ງຽບ​ໄປ.

ກົດ­ໝາຍ​ການ​ສຶກ​ສາ​ສະ­ບັບ​ປັບ­ປຸງ ມາດ­ຕາ 47 ບອກ​ລະ­ອຽດ​ຂໍ້​ຫ້າມ​ສຳ­ລັບ​ຄູ ມີ 8 ປະ­ການ ຜູ້​ຂຽນ​ຂໍ​ນຳ​ສະ­ເໜີ​ບາງ​ຂໍ້ ເຊັ່ນ: 1. ຂາດ​ຄວາມ​ຮັບ­ຜິດ­ຊອບ​ຕໍ່​ການ​ສິດ­ສອນ 2. ສວຍ​ໃຊ້​ໜ້າ­ທີ່​ຮັບ​ສິນ​ບົນ ເພື່ອ​ຜົນ​ປະ­ໂຫຍດ​ສ່ວນ​ຕົວ ຄອບ­ຄົວ ຫຼື ຈຸ້ມ​ເຈື້ອ ພັກ​ພວກ ສຳ­ລັບ​ຈັນ​ຍາ​ບັນ​ຄູ​ລາວ ທີ່​ຂຽນ​ບອກ​ແຈ້ງ​ໄວ້­ໜ້າ​ໜຶ່ງ​ຂອງ​ໜັງ­ສື­ພິມ​ສຶກ​ສາ-ກີ­ລາ ມີ​ດັ່ງ­ນີ້: 1. ຊື່­ສັດ​ບໍ­ລິ­ສຸດ 2. ຮັກ​ອາ­ຊີບ 3. ຮັກ­ແພງ​ຜູ້​ຮຽນ 4. ເປັນ​ແບບ­ຢ່າງ​ນຳ​ໜ້າ 5. ພັດ­ທະ­ນາ​ຕົນ​ເອງ ການ​ຮັກ​ອາ­ຊີບ​ຄູ ແລະ ພັດ­ທະ­ນາ​ໂຕ​ເອງ ຖື​ເປັນ​ໜ້າ­ທີ່​ຄູ​ຕ້ອງ​ໄດ້​ທ່ອງ​ຂຶ້ນ​ໃຈ ແລະ ເຄັ່ງ​ຄັດ​ຕໍ່­ໜ້າ​ທີ່ ເພາະ​ລັດ­ຖະ­ບານ ກໍ​ຄື​ກະ­ຊວງ​ສຶກ​ສາ ເພິ່ນ​ຈ່າຍ​ເງິນ­ເດືອນ​ໃຫ້​ແລ້ວ​ເດ !.

ສັງ​ລວມ​ວ່າ: ຂໍ​ຝາກ​ໃຫ້​ຝ່າຍ​ກ່ຽວ­ຂ້ອງ​ທົບ​ທວນ­ຄືນ​ເບິ່ງ​ບາງ​ບັນ­ຫາ ເບິ່ງ​ຄື​ເປັນ​ບັນ­ຫາ​ນ້ອຍ ແຕ່​ມັນ​ພົວ­ພັນ​ເຖິງ​ໜ້າ​ຕາ​ກຽດ​ສັກ​ສີ​ຂອງ​ຄວາມ​ເປັນ​ຄູ​ລາວ.

ໂດຍ: ດັ້ນ​ກີບ​ເມກ

ຕິດຕໍ່ພວກເຮົາ
error: Content is protected !!