ຈັດກິດຈະກຳກີລາສະຫຼອງ ວັນໂອແລມປິກລາວ ແລະ ສາກົນ

ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ (ຄອລ) ຮ່ວມ​ກັບ​ແຂວງ​ສະ­ຫວັນ​ນະ​ເຂດ ຈັດ​ກິດ­ຈະ­ກຳ​ກີ­ລາ​ແລ່ນ-ຍ່າງ ແລະ ຂີ່​ລົດ­ຖີບ ເພື່ອ​ສະ­ເຫຼີມ­ສະ­ຫຼອງ​ວັນ​ໂອ​ແລມ​ປິກ​ແຫ່ງ​ຊາດ​ລາວ ຄົບ­ຮອບ 42 ປີ ວັນ​ສ້າງ­ຕັ້ງ​ກີ­ລາ-ກາຍ­ຍະ­ກຳ​ແຫ່ງ​ຊາດ ຄົບ­ຮອບ 54 ປີ ແລະ ວັນ​ໂອ​ແລມ​ປິກ​ສາ­ກົນ ຄົບ­ຮອບ 126 ປີ ຂຶ້ນ​ວັນ​ທີ 24 ກໍ­ລະ­ກົດ 2020 ທີ່​ນະ­ຄອນ ໄກ­ສອນ ພົມ­ວິ­ຫານ ແຂວງ​ສະ­ຫວັນ​ນະ​ເຂດ ມີ​ທ່ານ ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ປະ­ທານ ຄອລ ທ່ານ ສັນ­ຕິ­ພາບ ພົມ­ວິ­ຫານ ເຈົ້າ­ແຂວງ​ສະ­ຫວັນ​ນະ​ເຂດ ທັງ​ເປັນ​ປະ­ທານ​ຈັດ​ງານ​ມີ ພະ­ນັກ­ງານ-ລັດ­ຖະ­ກອນ ຄູ​ອາ­ຈານ ນັກ­ຮຽນ ແລະ ມວນ​ຊົນ​ນະ­ຄອນ​ໄກ­ສອນ ພົມ­ວິ­ຫານ ເຂົ້າ​ຮ່ວມ 1.600 ກວ່າ​ຄົນ.

ໂອ­ກາດ​ນີ້ ທ່ານ​ເຈົ້າ­ແຂວງ​ສະ­ຫວັນ​ນະ​ເຂດ ໄດ້​ກ່າວ​ວ່າ: ໃນ​ນາມ​ຊາວ​ແຂວງ​ສະ­ຫວັນ​ນະ​ເຂດ ມີ​ຄວາມ​ພາກ­ພູມ​ໃຈ​ທີ່​ໄດ້​ຮັບ​ກຽດ​ເປັນ​ເຈົ້າ­ພາບ ໃນ​ການ​ຈັດ​ກິດ­ຈະ­ກຳ​ຄັ້ງ​ນີ້ ທັງ​ນີ້ ແຂວງ​ສະ­ຫວັນ​ນະ​ເຂດ ເປັນ​ແຂວງ​ໜຶ່ງ​ທີ່​ມີ​ມູນ­ເຊື້ອ​ວັດ­ທະ­ນະ­ທຳ​ຮີດ­ຄອງ​ປະ­ເພ­ນີ​ອັນ​ດີ­ງາມ ມີ​ປະ­ຫວັດ­ສາດ​ຕໍ່­ສູ້​ກູ້​ຊາດ​ອັນ​ພິ­ລະ​ອາດ​ຫານ ແລະ ເປັນ​ສະ­ຖານ­ທີ່​ກຳ­ເນີດ​ຂອງ​ການ​ນຳ​ສຳ­ຄັນ​ຫຼາຍ​ທ່ານ ການ​ຈັດ​ກິດ­ຈະ­ກຳ​ຄັ້ງ​ນີ້​ເປັນ​ການ​ສົ່ງ­ເສີມ​ໃຫ້​ມວນ​ຊົນ​ນະ­ຄອນ ໄກ­ສອນ ພົມ­ວິ­ຫານ ໄດ້​ມີ​ການ​ອອກ­ກຳ­ລັງ​ກາຍ​ເພື່ອ​ສຸ­ຂະ­ພາບ​ທີ່​ດີ ມີ​ຈິດ­ໃຈ​ຜ່ອງ​ໃສ ແລະ ມີ​ຄວາມ​ສາ­ມັກ­ຄີ​ຮັກ­ແພງ​ກັນ.

ທ່ານ ນາງ ແສງ​ເດືອນ ຫຼ້າ​ຈັນ­ທະ​ບູນ ໄດ້​ກ່າວ​ສະ­ແດງ​ຄວາມ​ຊົມ­ເຊີຍ ແລະ ຂອບ­ໃຈ​ຕໍ່​ການ​ນຳ​ແຂວງ​ສະ­ຫວັນ​ນະ​ເຂດ ຄະ­ນະ​ຮັບ­ຜິດ­ຊອບ​ກະ­ກຽມ​ງານ​ການ­ຈັດ­ຕັ້ງ​ກ່ຽວ­ຂ້ອງ​ຂອງ​ແຂວງ ທີ່​ມີ​ສວ່ນ​ຮ່ວມ​ເປັນ​ເຈົ້າ­ພາບ ແລະ ມີ​ສ່ວນ​ຮ່ວມ​ໃນ​ຈັດ​ກິດ­ຈະ­ກຳ​ກີ­ລາ ເຮັດ​ໃຫ້​ງານ​ສະ­ເຫຼີມ­ສະ­ຫຼອງ​ວັນ​ໂອ​ແລມ​ປິກ​ສາ­ກົນ ຄົບ­ຮອບ 126 ປີ ເກີດ​ຂຶ້ນ​ໄດ້ ແລະ ມີ​ສຳ­ເລັດ​ຜົນ​ຈົບ­ງາມ​ຕາມ​ລະ­ດັບ​ຄາດ­ໝາຍ ແລະ ຂອບ­ໃຈ​ຕໍ່​ຜູ້​ໃຫ້­ການ​ສະ­ໜັບ­ສະ­ໜູນ​ທຸກ​ພາກ­ສ່ວນ ໂດຍ​ສະ­ເພາະ​ບໍ­ລິ­ສັດ ເບຍ​ລາວ ຈຳ­ກັດ ແລະ ບໍ­ລິ­ສັດ ໂຮງ­ງານ FBT ເປັນ​ຜະ­ລິດ​ຕະ​ພັນ​ເຄື່ອງ​ດື່ມ ແລະ ເສື້ອ​ກີ­ລາ ລວມ​ເປັນ​ມູນ​ຄ່າ 146 ລ້ານ​ກີບ.

ຕິດຕໍ່ພວກເຮົາ
error: Content is protected !!