ຕະຫຼາດພືດຜັກປອດສານພິດບ້ານຊ້າງຄູ້ ມີສິນຄ້າຫຼາຍຢ່າງ

ຕະ­ຫຼາດ​ພືດ​ຜັກ​ປອດ​ສານ­ພິດ​ບ້ານ​ຊ້າງ​ຄູ້ ສ້າງ­ຕັ້ງ​ຂຶ້ນ​ປີ 2018 ເພື່ອ​ຊຸກ­ຍູ້​ສົ່ງ­ເສີມ​ໃຫ້​ຊາວ​ກະ­ສິ­ກອນ ໂດຍ​ສະ­ເພາະ​ຊາວ​ສວນ​ປູກ​ພັກ​ປອດ​ສານ­ພິດ ແລະ ຊາວ​ຄ້າ­ຂາຍ​ທົ່ວ​ໄປ​ໄດ້​ນຳ​ເອົາ​ພືດ​ຜັກ​ກະ­ສິ­ກຳ​ສະ­ອາດ ແລະ ພືດ​ຜັກ​ປອດ​ສານ­ພິດ​ເຂົ້າ​ມາ​ຂາຍ ຈາກ​ປັດ­ຈຸ­ບັນ​ຂາຍ​ອາ­ທິດ​ໜຶ່ງ 2 ວັນ​ຄື: ວັນ​ຈັນ ແລະ ວັນ​ເສົາ ເວ­ລາ 14-19:00 ໂມງ  ແລະ ເລີ່ມ​ຕົ້ນ​ເດືອນ​ສິງ­ຫາ 2020 ເປັນ­ຕົ້ນ​ໄປ ຈະ​ໄດ້​ຍົກ​ລະ­ດັບ​ຂຶ້ນ​ເປີດ​ທຸກ​ວັນ​ແຕ່​ວັນ​ຈັນ​ຫາ​ວັນ​ອາ­ທິດ ເລີ່ມ​ເວ­ລາ 10-20:00 ໂມງ.

ທ່ານ ນາງ ທອງ​ສະ­ຫວັນ ບຸນ​ເລີດ ຜູ້​ບໍ­ລິ­ຫານ​ຕະ­ຫຼາດ​ພືດ​ຜັກ​ປອດ​ສານ­ພິດ​ບ້ານ​ຊ້າງ​ຄູ້ ໃຫ້​ສຳ­ພາດ​ວັນ​ທີ 30 ກໍ­ລະ­ກົດ 2020 ວ່າ: ຕະ­ຫຼາດ​ພືດ​ຜັກ​ປອດ​ສານ­ພິດ ຕັ້ງ​ຢູ່​ຮ່ອມ 10 ບ້ານ​ຊ້າງ​ຄູ້ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ມີ​ເນື້ອ­ທີ່ 3 ເຮັກ­ຕາ ແຕ່​ປັດ­ຈຸ­ບັນ​ໄດ້​ພັດ­ທະ­ນາ 1 ເຮັກ­ຕາ ເປັນ​ຕະ­ຫຼາດ​ທີ່​ມີ​ຄວາມ​ເໝາະ​ສົມ ຕັ້ງ​ຢູ່​ເຂດ​ຊຸມ​ຊົນ ມີ​ສະ­ຖານ­ທີ່​ຈອດ​ລົດ​ກວ້າງ­ຂວາງ ແລະ ສາ­ມາດ​ຈັດ​ງານ​ວາງ­ສະ­ແດງ​ຂາຍ​ສິນ­ຄ້າ ຕະ­ຫຼາດ​ແຫ່ງ​ນີ້ ປັດ­ຈຸ­ບັນ​ມີ​ຊາວ​ສວນ​ປູກ​ພືດ​ຜັກ​ປອດ​ສານ­ພິດ​ກຸ່ມ​ບ້ານ​ທົ່ງ​ມັ່ງ ໂນນ​ແຕ້ ເມືອງ​ໄຊ​ທາ­ນີ ແລະ ກຸ່ມ​ບ້ານ​ດອນ​ຊີງ​ຊູ້ ເມືອງ​ສີ​ໂຄດ​ຕະ­ບອງ ທີ່​ໄດ້​ມາ​ຂາຍ​ເປັນ​ປະ­ຈຳ ແລະ ສິນ­ຄ້າ​ທີ່​ມາ​ຂາຍ​ຈະ​ມີ​ພືດ​ຜັກ​ກະ­ສິ­ກຳ​ສະ­ອາດ ປະ­ເພດ​ຊີ້ນ​ໝູ​ລາດ ໄກ່­ລາດ ງົວ​ລາດ ໄຂ່​ໄກ່ ໄຂ່​ເປັດ​ລາດ ພືດ​ຜັກ ໝາກ​ໄມ້​ທຳ​ມະ​ຊາດ​ຕາມ​ລະ­ດູ​ການ ອາ­ຫານ​ສຸກ ແລະ ອື່ນໆ ຈຳ­ນວນ​ຫຼາຍ​ລາຍ­ການ ເພື່ອ​ໃຫ້​ພະ­ນັກ­ງານ ທະ­ຫານ ຕຳ­ຫຼວດ ແລະ ປະ­ຊາ­ຊົນ​ນະ­ຄອນ­ຫຼວງ​ວຽງ​ຈັນ​ໄດ້​ເລືອກ​ຊື້​ໄປ​ບໍ­ລິ­ໂພກ.

ເພື່ອ​ເປັນ​ການ​ຊຸກ­ຍູ້​ສົ່ງ­ເສີມ​ຊາວ​ກະ­ສິ­ກອນ ຜູ້​ທີ່​ປູກ​ພືດ​ຜັກ​ເອງ​ແລ້ວ​ມາ​ຂາຍ​ຢູ່​ຕະ­ຫຼາດ​ແຫ່ງ​ນີ້ ເຈົ້າ​ຂອງ​ຕະ­ຫຼາດ​ມີ​ນະ­ໂຍ­ບາຍ​ບໍ່​ເກັບ​ຄ່າ​ໂຕະ​ຂາຍ­ເຄື່ອງ 3 ເດືອນ ນອກ​ນີ້ ຍັງ​ມີ​ນະ­ໂຍ­ບາຍ​ຜູ້​ມາ​ຊື້ ມາ​ຂາຍ­ເຄື່ອງ ເປັນ­ຕົ້ນ​ບໍ່​ເກັບ​ຄ່າ​ຈອດ​ລົດ ແລະ ບໍ່​ເກັບ​ຄ່າ​ບໍ­ລິ­ການ​ຫ້ອງ​ນ້ຳ ນອກ​ນີ້ ຕະ­ຫຼາດ​ຍັງ​ສົ່ງ­ເສີມ​ນັກ­ຮຽນ-ນັກ​ສຶກ​ສາ​ໃຫ້​ມາ​ຂາຍ­ເຄື່ອງ​ຢູ່​ຕະ­ຫຼາດ​ແຫ່ງ​ນີ້​ຕື່ມ​ອີກ ເພື່ອ​ໃຫ້​ເຂົາ­ເຈົ້າ​ໄດ້​ມີ​ອາ­ຊີບ ແລະ ລາຍ​ຮັບ ຈະ​ໄດ້​ມີ​ທຶນ­ຮອນ​ໃຊ້​ຈ່າຍ​ການ​ສຶກ​ສາ ໂດຍ​ລວມ​ແລ້ວ ຕະ­ຫຼາດ​ແຫ່ງ​ນີ້​ມີ​ນະ­ໂຍ­ບາຍ​ສົ່ງ­ເສີມ ແລະ ມີ​ສິນ­ຄ້າ​ຫຼາຍ​ຢ່າງ ຈຶ່ງ​ເລີ່ມ​ເປັນ​ທີ່​ຮູ້­ຈັກ​ຂອງ​ປະ­ຊາ­ຊົນ ໂດຍ​ສະ­ເພາະ​ຜູ້​ປົກ­ຄອງ​ນັກ­ຮຽນ​ໂຮງ­ຮຽນ​ສົມ​ປັນ­ຍາ ເນື່ອງ​ຈາກ​ຕະ­ຫຼາດ​ຕັ້ງ​ຢູ່​ຮ່ອມ​ດຽວ​ກັບ​ທາງ​ເຂົ້າ​ໂຮງ­ຮຽນ​ແຫ່ງ​ດັ່ງ­ກ່າວ ແລະ ອະ­ນາ­ຄົດ ຕະ­ຫຼາດ​ຍັງ​ມີ​ແຜນ​ຈະ​ຈັດ​ຕະ­ຫຼາດ­ນັດ​ເປັນ​ປະ­ຈຳ ເພື່ອ​ສ້າງ​ບັນ­ຍາ­ກາດ​ເຮັດ​ໃຫ້​ຕະ­ຫຼາດ​ມີ​ການ​ຊື້​ຂາຍ​ຄຶກ­ຄື້ນ ແລະ ເຮັດ​ໃຫ້​ເປັນ​ທີ່​ຮູ້­ຈັກ​ຂອງ​ຊາວ​ຄ້າ­ຂາຍ ແລະ ປະ­ຊາ­ຊົນ​ຫຼາຍ​ຂຶ້ນ​ເລື້ອຍໆ.

ໂອ­ກາດ​ນີ້ ທ່ານ ນາງ ທອງ​ສະ­ຫວັນ ບຸນ​ເລີດ ຍັງ​ສະ­ເໜີ​ມາ​ຍັງ​ຂະ­ແໜງ­ການ​ກ່ຽວ­ຂ້ອງ ພາກ​ລັດ ແລະ ອຳ­ນາດ​ການ​ປົກ­ຄອງ​ທ້ອງ­ຖິ່ນ​ທຸກ​ຂັ້ນ ໃຫ້­ການ​ສະ­ໜັບ­ສະ­ໜູນ ແລະ ອຳ­ນວຍ​ຄວາມ​ສະ­ດວກ​ດ້ານ​ຕ່າງໆ​ໃຫ້​ແກ່​ຕະ­ຫຼາດ ເປັນ­ຕົ້ນ ຢາກ​ໃຫ້​ຍົກ­ເວັ້ນ​ການ​ເກັບ​ຄ່າ​ທຳ­ນຽມ​ຕ່າງໆ​ເພື່ອ​ເປັນ​ການ​ສົ່ງ­ເສີມ​ຊາວ​ຄ້າ­ຂາຍ ແລະ ຜູ້​ປະ­ກອບ​ການ​ໄປ​ກ່ອນ​ໃນ​ເບື້ອງ​ຕົ້ນ ພ້ອມ​ນີ້ ກໍ​ຊ່ວຍ​ແກ້​ໄຂ​ການ​ຂາຍ­ເຄື່ອງ​ຊະ­ຊາຍ​ຕາມ​ແຄມ​ເສັ້ນ­ທາງ​ຕ່າງໆ ທີ່​ມີ​ຄວາມ​ສ່ຽງ​ຕໍ່​ການ​ເກີດ​ອຸ­ບັດ­ເຫດ ການ​ສັນ­ຈອນ​ແອ​ອັດ ແລະ ບໍ່​ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ ໃຫ້​ລະ­ດົມ​ຊາວ​ຄ້າ­ຂາຍ​ມາ​ຂາຍ​ຢູ່​ຕະ­ຫຼາດ​ແຫ່ງ​ນີ້ ທີ່​ມີ​ສິ່ງ​ອຳ­ນວຍ​ຄວາມ​ສະ­ດວກ​ຕ່າງໆ.

ຕິດຕໍ່ພວກເຮົາ
error: Content is protected !!