ມອບເຄື່ອງຊ່ວຍເຫຼືອ ໃຫ້ຜູ້ປະສົບໄພພິບັດຢູ່ແຂວງໄຊຍະບູລີ

ແຂວງ​ໄຊ​ຍະ​ບູ​ລີ ໄດ້​ຮັບ​ຜົນ​ກະ­ທົບ​ຈາກ​ພະ­ຍຸ​ຊິນ​ລາ​ກຸ ແຕ່​ວັນ​ທີ 2-3 ສິງ­ຫາ 2020 ເຮັດ​ໃຫ້​ມີ​ຝົນ ຕົກ​ຕິດ­ຕໍ່​ກັນ​ຫຼາຍ​ຊົ່ວ­ໂມງ ແມ່­ນ້ຳ​ສາຍ​ຫຼັກ ແລະ ສາ­ຂາ​ແມ່­ນ້ຳ​ຫຼາຍ​ສາຍ​ຍຶ່ງ​ຂຶ້ນ ເກີດ​ມີ​ນ້ຳ​ເຂົ້າ​ຖ້ວມ​ຂັງ 8 ເມືອງ​ຄື: ໄຊ​ຍະ​ບູ​ລີ ບໍ່​ແຕນ ເມືອງ​ເງິນ ເມືອງ​ຄອບ ເມືອງ​ພຽງ ແກ່ນ​ທ້າວ ທົ່ງ​ມີ​ໄຊ ແລະ ໄຊ​ສະ­ຖານ ປະ­ຊາ­ຊົນ 64 ບ້ານ 2.629 ຄອບ­ຄົວ ໄດ້​ຮັບ​ຜົນ​ກະ­ທົບ​ໜັກ​ຈາກ​ສະ­ພາບ​ນ້ຳ​ຖ້ວມ​ຊຸ ມູນ​ຄ່າ​ເສຍ​ຫາຍ​ 26,5 ຕື້​ກວ່າ​ກີບ.

ເມືອງ​ທີ່​ໄດ້​ຮັບ​ຜົນ​ກະ­ທົບ​ໜັກ​ກວ່າ​ໝູ່ ແມ່ນ​ເມືອງ​ພຽງ ເນື້ອ­ທີ່​ນາ​ຖືກ​ນ້ຳ​ຖ້ວມ​ຫຼາຍ​ກວ່າ 300 ເຮັກ­ຕາ ເມືອງ​ບໍ່​ແຕນ ເສັ້ນ­ທາງ​ຂາດ​ຫຼາຍ​ຈຸດ ຂົວ​ອູ່ 2 ແຫ່ງ​ບໍ່​ສາ­ມາດ​ນຳ​ໃຊ້​ໄດ້ ສະ­ເພາະ​ເທ­ສະ​ບານ​ແຂວງ ຄື:ເມືອງ​ໄຊ​ຍະ​ບູ​ລີ ປະ­ຊາ­ຊົນ​ທີ່​ອາ­ໄສ​ຢູ່​ລຽບ​ແຄມ​ແມ່­ນ້ຳ​ຮຸ່ງ 12 ບ້ານ ໄດ້​ຮັບ​ຜົນ​ກະ­ທົບ ມາ​ຮອດ​ປັດ­ຈຸ­ບັນ​ຫຼາຍ​ເມືອງ​ລະ­ດັບ​ນ້ຳ​ໄດ້​ຫຼຸດ​ລົງ ແລະ ເລີ່ມ​ເຂົ້າ​ສູ່​ສະ­ພາບ​ປົກ­ກະ­ຕິ​ແລ້ວ.

ຕໍ່​ສະ­ພາບ​ການ​ດັ່ງ­ກ່າວ ວັນ​ທີ 6 ສິງ­ຫາ 2020 ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ຮອງ​ປະ­ທານ​ຜູ້​ປະ­ຈຳ­ການ​ຄະ­ນະ​ຄຸ້ມ​ຄອງ​ໄພ­ພິ­ບັດ​ຂັ້ນ​ສູນ​ກາງ ຈຶ່ງ​ໄດ້​ນຳ​ເອົາ​ເຄື່ອງ​ຊ່ວຍ­ເຫຼືອ​ໄປ​ມອບ​ໃຫ້​ຜູ້​ປະ­ສົບ​ໄພ­ພິ­ບັດ​ຢູ່​ແຂວງ​ດັ່ງ­ກ່າວ ໃນ​ນີ້ ມີ​ເງິນ 50 ລ້ານ​ກີບ ເຂົ້າ ໜຽວ​ຈາກ​ກອງ​ທຶນ​ເພື່ອນ​ຮ່ວມ​ງານ KR1 ຈຳ­ນວນ 258 ໂຕນ ມູນ​ຄ່າ 2,4 ຕື້​ກວ່າ​ກີບ ເຄື່ອງ­ນຸ່ງ​ຫົ່ມ ເກີບ ເຄື່ອງ­ໃຊ້​ຄົວ​ເຮືອນ ແລະ ເຕັ່ນ ມູນ​ຄ່າ 344 ລ້ານ​ກວ່າ​ກີບ ລວມ​ມູນ​ຄ່າ​ທັງ​ໝົດ 2,8 ຕື້​ກວ່າ​ກີບ ນອກ​ນີ້ ກະ­ຊວງ​ສາ­ທາ­ລະ­ນະ​ສຸກ​ຍັງ​ໄດ້​ມອບ​ເຄື່ອງ­ນຸ່ງ​ຫົ່ມ 100 ແກັດ ມູນ​ຄ່າ 20 ລ້ານ​ກີບ ເຊິ່ງ​ຮັບ​ໂດຍ ທ່ານ ພົງ​ສະ­ຫວັນ ສິດ​ທະ​ວົງ ເຈົ້າ­ແຂວງ​ໄຊ​ຍະ​ບູ​ລີ ເພື່ອ​ນຳ­ໄປ​ຊ່ວຍ­ເຫຼືອ​ເບື້ອງ​ຕົ້ນ​ໃຫ້​ຜູ້​ທີ່​ປະ­ສົບ​ໄພ­ພິ­ບັດ​ດັ່ງ­ກ່າວ.

ຕິດຕໍ່ພວກເຮົາ
error: Content is protected !!