ເບີ່ງບ້ານເຂົາເອົາບົດຮຽນ 24-03-2020

blue technology hexagonal background design

ໃນ​ບົດ​ປະຈຳ​ວັນ​ນີ້ ມີ​ຂ່າວ​ກ່ຽວ​ກັບ​ມາດ​ຕະການ​ກຳຈັດ​ຂ່າວ​ປອມ ຢູ່​ອິນ​ໂດ​ເນ​ເຊຍ  ເລື່ອງ​ຜົນສຳເລັດ​ໃນ​ບັ້ນ​ຮົບ​ຕ້ານ​ການ​ສໍ້​ລາດ​ບັງ​ຫຼວງ​ທີ່ ​ສປ ຈີນ ແລະ ຂ່າວ​ການ​ລົງໂທດ​ຜູ້​ມີ​ສ່ວນ​ຮ່ວມ​ກັບ​ການ​ກໍ່​ການ​ຮ້າຍ​ທີ່ ອົດ​ສະ​ຕຣາ​ລີ

     ທີ່ ອິນ​ໂດ​ເນ​ເຊຍ: ຂ່າວ​ທີ່​ອອກ​ມາ​ຈາກ ອິນ​ໂດ​ເນ​ເຊຍ ໃນ​ຕົ້ນ​ເດືອນ​ກຸມພາ ຜ່ານ​ມາ ໄດ້​ເວົ້າ​ກ່ຽວ​ກັບ​ຂ່າວ​ບໍ່​ມີ​ມູນ​ຄວາມ​ຈິງ​ທີ່​ພົວພັນ​ກັບ​ການ​ລະບາດ​ຂອງ​ພະຍາດ​ປອດ​ອັກເສບ​ສາຍ​ພັນ​ໃໝ່ ຫຼື ໂຄ​ວິດ-19 ເຊິ່ງ​ເປັນ​ຂ່າວ​ຫຼອກ​ລວງ​ທີ່​ມີ​ເປົ້າ​ໝາຍ​ສ້າງ​ຄວາມ​ແຕກ​ຕື່ນ​ໃນ​ສັງຄົມ ແຕ່​ໃນ​ທີ່​ສຸດ ທາງ​ການ​ກໍ​ສາມາດ​ປາບ​ລົງ​ໄດ້ ທ່ານ ຈອນ​ນີ ຈີ ພະ​ເລດ (Johnny G Plate) ລັດຖະມົນຕີ​ກະຊວງ​ຄົມມະນາຄົມ ແລະ ຖະແຫຼງ​ຂ່າວ ອິນ​ໂດ​ເນ​ເຊຍ ໄດ້​ໃຫ້​ຮູ້​ກ່ຽວ​ກັບ​ເລື່ອງ​ນີ້​ວ່າ ໃນ​ໄລຍະ 2 ອາທິດ​ທ້າຍ​ເດືອນ​ມັງກອນ ເຖິງ​ຕົ້ນ​ເດືອນ​ກຸມພາ​ປີ​ນີ້ ທາງ​ການ​ໄດ້​ຄົ້ນ​ພົບ​ຂ່າວ​ຫຼອກ​ລວງ​ກ່ຽວ​ກັບ​ພະຍາດ​ໂຄ​ວິດ-19 ຈຳນວນ 54 ເລື່ອງ​ທີ່​ເຜີຍແຜ່​ຜ່ານ​ເຄືອ​ຄ່າຍ​ສື່ສານ​ສັງຄົມ​ອອນ​ລາຍ ແລະ ວ່າ ທາງ​ກະຊວງ​ໄດ້​ແຈ້ງ​ໃຫ້​ທົ່ວ​ສັງຄົມ​ຊາບ​ລະອຽດ​ກ່ຽວ​ກັບ​ເນື້ອ​ໃນ​ຂ່າວ​ຫຼອກ​ລວງ​ທັງ​ໝົດ ພ້ອມ​ທັງ​ໄດ້​ອະທິບາຍ​ຂໍ້​ມູນ​ທີ່​ຖືກຕ້ອງ​ເປັນ​ຈິງ ເພື່ອ​ແກ້​ໄຂ​ຂ່າວ​ດັ່ງກ່າວ.

    ທີ່ ​ສປ ຈີນ: ບັ້ນ​ຮົບ​ຕ້ານ​ພະຍາດ​ສໍ້​ລາດ​ບັງ​ຫຼວງ​ຢູ່ ​ສປ ຈີນ  ທີ່​ດຳເນີນ​ຢ່າງ​ຈິງ​ຈັງ​ຕັ້ງໜ້າ​ແຕ່​ປີ 2012 ນັ້ນ ໄດ້​ຮັບ​ຜົນສຳເລັດ​ຕາມ​ເປົ້າ​ໝາຍ​ທີ່​ວາງ​ໄວ້ ຄື:  ສາມາດ​ກຳຈັດ​ຜູ້​ມີ​ພຶດຕິ​ກຳ​ສໍ້​ລາດ​ບັງ​ຫຼວງ​ທີ່​ມີ​ອຳນາດ​ບາດ​ໃຫຍ່​ລະດັບ “ເສືອ” ລົງ​ມາ​ຮອດ​ລະດັບ “ແມງວັນ” ຕົວຢ່າງ ຂ່າວ​ຕ່າງປະເທດ​ໃນ​ທ້າຍ​ເດືອນ​ມັງກອນ​ປີ​ນີ້​ໄດ້​ໃຫ້​ຊາບ​ວ່າ ອະດີດ​ຮອງ​ລັດຖະມົນຕີ​ກະຊວງ​ຕຳຫຼວດ ແລະ ທັງ​ເຄີຍ​ເປັນ​ຮອດ​ປະທານ​ອົງການ​ຕຳຫຼວດ​ສາກົນ ຊື່​ທ່ານ ເມັງ​ຮົງ​ເວີຍ ກໍ​ບໍ່​ສາມາດ​ລອດ​ພົ້ນ​ຈາກ​ມື​ກົດໝາຍ​ໄປ​ໄດ້ ໃນ​ຄະດີ​ຮັບ​ສິນ​ບົນ​ໃນ​ຂະນະ​ຢູ່​ໃນ​ຕຳແໜ່ງ​ອັນ​ສູງ​ສົ່ງ​ຜ່ານ​ມາ.

    ທ່ານ ເມັງ​ຮົງ​ເວີຍ  ຖືກ​ຕັດສິນ​ຈຳ​ຄຸກ​ດົນ​ເຖິງ 13 ປີ ແລະ ຖືກ​ປັບໄໝ​ເປັນ​ເງິນ​ຈຳນວນ 2 ລ້ານ​ຢວນ ຫຼື ເທົ່າໆ 290.000 ໂດ​ລາ​ສະຫະລັດ ຄະດີ​ດັ່ງກ່າວ​ຖື​ເປັນ​ເລື່ອງ​ສຳຄັນ ແລະ ໂດ່ງ​ດັງ​ຫຼາຍ ເພາະ​ຜູ້​ກະທຳ​ຜິດ​ເປັນ​ບຸກຄົນ​ໃນ​ຖານະ​ຕຳແໜ່ງ​ເປັນ​ຜູ້​ປົກ​ປ້ອງ​ກົດໝາຍ ແຕ່​ຊ້ຳພັດ​ລົງມື​ເຮັດ​ຜິດ​ກົດໝາຍ​ເອງ.

    ທີ່ ອົດ​ສະ​ຕຣາ​ລີ: ຂ່າວ​ວຽງ​ຈັນ​ທາມ ສະບັບ​ວັນ​ທີ 26 ເດືອນ​ກຸມພາ​ຜ່ານ​ມາ ໄດ້​ເວົ້າ​ກ່ຽວ​ກັບ​ການ​ຈັບ​ກຸມ​ຍິງ​ຊາວ​ອົດ​ສະ​ຕຣາ​ລີ​ຄົນ​ໜຶ່ງ​ທີ່​ເຄືອນ​ໄຫວ​ຊຸກຍູ້​ເພື່ອນ​ຂອງ​ຕົນ​ໃຫ້​ເຂົ້າ​ຮ່ວມ​ຕໍ່ສູ້​ກັບ​ກຸ່ມ​ຫົວ​ຮຸນ​ແຮງ​ເພື່ອ​ສ້າງ​ລັດ​ອິດ​ສະ​ລາມ ຫຼື ໄອ​ເອ​​ັສ (IS-ISLamic State) ຍິງ​ອາຍຸ​ພຽງ 22 ປີ  ທີ່​ຖືກ​ເຈົ້າ​ໜ້າທີ່​ຕຳຫຼວດ​ອົດ​ສະ​ຕຣາ​ລີ​ຈັບ​ຄັ້ງ​ນີ້ ມີ​ປະຫວັດ​ເບື້ອງ​ຫຼັງ​ທີ່​​ພັວ​ພັນ​ກັບ​ກຸ່ມ​ກໍ່​ການ​ຮ້າຍ​ມາ​ເປັນ​ເວລາ​ນານ​ປີ ຄື​ໃນ​ປີ 2016 ເຂົາ​ໄດ້​ຊຸກຍູ້​ຊັກ​ຊວນ ແລະ ເອື້ອ​ອຳນວຍ​ຄວາມ​ສະດວກ​ໃຫ້​ບຸກຄົນ​ໃກ້​ສິດ​ຂອງ​ຕົນ​ຄົນ​ໜຶ່ງ​ເດີນທາງ​ໄປ​ປະເທດ​ຊີ​ຣີ ແລະ ອີ​ຣັກ ເພື່ອ​ຮ່ວມ​ຂະ​ບວນ​ການ​ຕໍ່ສູ້​ຂອງ​ກຸ່ມ​ລັດ​ອິດ​ສະ​ລາມ ນອກຈາກ​ນັ້ນ ເຂົາ​ຍັງ​ໄດ້​ສ້າງຕັ້ງ​ເຄືອ​ຄ່າຍ​ສື່​ອອນ​ລາຍ​ເພື່ອ​ໃຫ້ການ​ສະໜັບສະໜູນ​ຊາຍ​ອົດ​ສະ​ຕຣາ​ລີ​ຜູ້​ໜຶ່ງ​ທີ່​ພວມ​ສູ້​ຮົບ​ກັບ​ກຸ່ມ IS ທີ່​ປະເທດ​ຊີ​ຣີ ຜ່ານ​ການ​ສືບສວນ​ສອບ​ສວນ​ທີ່​ໃຊ້​ເວລາ​ດົນ​ນານ​ພໍ​ສົມຄວນ​ນັ້ນ  ເຈົ້າ​ໜ້າທີ່​ຕຳຫຼວດ​ອົດ​ສະ​ຕຣາ​ລີ ໄດ້​ສະຫຼຸບ​ວ່າ ນາງ​ຄົນ​ນີ້​ມີ​ໂທດ 3 ສະຖານ​ຄື: ໄດ້​ໃຫ້​ບໍລິການ​ແກ່​ບຸກຄົນ​ເພື່ອ​ເດີນທາງ​ໄປ​ເຄື່ອນ ໄຫວ​ກໍ່​ການ​ຮ້າຍ​ຢູ່​ຕ່າງປະເທດ ເປັນ​ເຈົ້າ​ການ​ຂົນຂວາຍ​ເອົາ​ຄົນ​ໄປ​ເຂົ້າ​ຮ່ວມ​ກັບ​ກຸ່ມ​ກໍ່​ການ​ຮ້ານ ແລະ ມີ​ຄວາມ​ຜິດ​ຖານ​ໄດ້​ມີ​ສ່ວນ​ພົວພັນ​ກັບ​ອົງ​ການຈັດຕັ້ງ​ດັ່ງກ່າວ​ຕາມ​ກົດໝາຍ​ຂອງ​ອົດ​ສະ​ຕຣາ​ລີ ໂທດ​ສູງ​ສຸດ​ສຳລັບ​ຄວາມ​ຜິດ​ລະດັບ​ນີ້ ກໍ​ຄື ຖືກ​ຕັດ​ອິດສະຫຼະພາບ​ຕະຫຼອດ​ຊີວິດ.

ຕິດຕໍ່ພວກເຮົາ