ອານຸສອນ ເຝິກຊ້ອມໜັກຫວັງສ້າງຜົນງານລາຍການນານາຊາດ

    ທ້າວ ອາ​ນຸ​ສອນ ໄຊ​ສາ ນັກ­ກີ­ລາ​ແລ່ນ​ທີມ​ຊາດ​ລາວ ເຈົ້າ​ຂອງ 2 ຫຼຽນ​ທອງ ປະ­ຫວັດ­ສາດ​ແລ່ນ​ຂ້າມ​ຮົ້ວ 110 ແມັດ​ຊາຍ ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ XXVll ທີ່​ປະ­ເທດ​ມຽນ​ມາ ປີ 2013 ແລະ ງານ​ກີ­ລາ​ຊີ­ເກມ ຄັ້ງ​ທີ XXX ທີ່​ປະ­ເທດ​ຟີ​ລິບ​ປິນ ປີ 2019 ໄດ້​ທຸ້ມ­ເທ​ໃສ່​ການ​ເຝິກ­ຊ້ອມ​ໜັກ​ຂຶ້ນ​ກວ່າ​ເກົ່າ ຫວັງ​ເພີ່ມ​ສະ­ຖິ­ຕິ​ຂອງ​ຕົນ​ຈາກ​ໄລ­ຍະ​ເວ­ລາ 14,12 ວິ­ນາ­ທີ ໃນ​ປັດ­ຈຸ­ບັນ​ກາຍ­ເປັນ​ນັກ­ກີ­ລາ​ແລ່ນ ທີ່​ໄວ​ທີ່​ສຸດ​ຂອງ​ອາ​ຊຽນ​ກຽມ​ເຂົ້າ​ຮ່ວມ​ລາຍ­ການ​ນາ­ນາ​ຊາດ ເພື່ອ​ສະ​ສົມ​ຄະ­ແນນ​ອອກ​ມາ​ດີ​ທີ່​ສຸດ​ຫວັງ​ລຸ້ນ​ເຂົ້າ​ຮ່ວມ​ງານ ມະ​ຫະ​ກຳ​ກີ­ລາ​ໂອ​ແລມ​ປີກ​ເກມ ຈະ​ເປີດ​ສາກ​ຂຶ້ນ​ທີ່​ປະ­ເທດ​ຍີ່­ປຸ່ນ​ຮັບ​ກຽດ​ເປັນ​ເຈົ້າ­ພາບ.

    ທ້າວ ອາ​ນຸ​ສອນ ໄຊ​ສາ ໃຫ້​ສຳ­ພາດ​ວ່າ: ເຖິງ​ວ່າ​ບັນ­ຫາ​ພະ­ຍາດ​ໂຄ​ວິດ-19 ແຜ່​ລະ­ບາດ​ໃນ​ປັດ­ຈຸ­ບັນ​ຢ່າງ​ໜັກ­ໜ່ວງ ແລະ ສ້າງ​ຜົນ​ເສຍ​ຫາຍ​ຢ່າງ​ມະ­ຫາ­ສານ ຈົນ​ໄດ້​ເຮັດ​ໃຫ້​ທາງ​ລັດ­ຖະ­ບານ​ລາວ​ເຮົາ​ໄດ້​ອອກ​ມາ​ປຸກ­ລະ­ດົມ ແລະ ແຈ້ງ​ການ​ເຕື່ອນ​ໃຫ້​ປະ­ຊາ­ຊົນ​ຊາວ​ມີ​ສະ­ຕິ ແລະ ຕ້ານ​ປາ­ກົດ­ການ​ດັ່ງ­ກ່າວ ສ່ວນ​ຕົວ​ແລ້ວ​ເຫັນ​ດີ ແລະ ປະ­ຕິ­ບັດ​ຕາມ​ແຈ້ງ​ການ ພ້ອມ​ທັງ​ມີ​ສະ­ຕິ​ທຸກ​ຄັ້ງ​ເວ­ລາ​ອອກ­ເຮືອນ​ໄປ​ເຮັດ​ກິດ­ຈະ­ກຳ​ຕ່າງໆ ໂດຍ​ສະ­ເພາະ​ການ​ເຝິກ­ຊ້ອມ​ຂອງ​ຕົນ​ເອງ ​ບໍ່​ຍົກ­ເວັ້ນ​ສືບ­ຕໍ່​ເຝິກ­ຊ້ອມ​ໜັກ​ຂຶ້ນ​ກວ່າ​ເກົ່າ ທັງ​ນີ້​ຫວັງ​ຢາກ​ຈະ​ສ້າງ​ຜົນ­ງານ​ຄັ້ງ​ປະ­ຫວັດ​ທີ່​ຍິ່ງ​ໃຫຍ່​ທີ່​ສຸດ​ໃຫ້​ປະ­ເທດ​ຊາດ ກໍ​ຄື​ເຂົ້າ​ຮ່ວມ​ແຂ່ງ ຂັນ​ງານ​ມະ​ຫະ​ກຳ​ກີ­ລາ​ໂອ​ແລມ​ປີກ​ສາ­ກົນ​ທີ່​ປະ­ເທດ​ຍີ່­ປຸ່ນ ກ່ອນ​ຈະ​ເຂົ້າ​ຮ່ວມ​ງານ​ດັ່ງ­ກ່າວ​ນີ້ ໄດ້​ຕ້ອງ​ເຂົ້າ​ຮ່ວມ​ຜ່ານ​ຜ່າ​ການ​ແຂ່ງ­ຂັນ​ລາຍ­ການ​ນາ­ນາ​ຊາດ​ຕ່າງໆ ເພື່ອ​ສະ​ສົມ​ຄະ­ແນນ​ໃນ​ເດືອນ​ໜຶ່ງ​ຈະ​ຈັດ​ຂຶ້ນ 1 ຄັ້ງ ໂດຍ​ສະ­ເພາະ​ລາຍ­ການ​ແລ່ນ-ລານ​ສິງ­ກະ­ໂປ​ໂອ​ເພັນ 2020 ລາຍ­ການ​ນີ້​ນັກ­ກີ­ລາ​ລາວ​ເຮົາ​ເຂົ້າ​ຮ່ວມ​ທຸກ​ປີ ແລະ ປີ​ນີ້​ບໍ່​ໄດ້​ມີ​ທ່າ​ທີ່​ຈະ​ໂຈະ​ການ​ແຂ່ງ­ຂັນ​ເຖິງ​ວ່າ​ໂຄ​ວິດ-19 ຈະ​ເກີດ​ກະ­ແສ​ແຜ່​ລະ­ບາດ​ຢ່າງ​ຮຸ່ນ​ແຮງ​ໃນ​ທົ່ວ​ໂລກ​ກໍ​ຕາມ.

    ທ້າວ ອາ​ນຸ​ສອນ ກ່າວ​ຕື່ມ​ວ່າ: ຍ້ອນ​ຄື​ແນວ​ນັ້ນ​ຈຶ່ງ​ໄດ້​ເລັ່ງ​ເກັບ​ຕົວ​ເຝິກ­ຊ້ອມ​ໜັກ​ຂຶ້ນ​ກວ່າ​ເກົ່າ​ຢູ່​ທີ່ 2 ສະ­ໜາມ​ກໍ​ຄື​ສະ­ໜາມ​ກີ­ລາ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ແລະ ສະ­ໜາມ​ກີ­ລາ​ແຫ່ງ​ຊາດ (ຫຼັກ 16) ຊ້ອມ​ວັນ​ໜຶ່ງ 3-4 ຊົ່ວ­ໂມງ ຕາມ​ແຜນ­ການ​ເຝິກ­ຊ້ອມ​ຂອງ​ຄູ​ເຝິກ​ຊາວ​ອັງ­ກິດ​ວາງ​ແຜນ​ໃຫ້​ຈາກ​ສະ­ຖິ­ຕິ​ເດີມ ຫຼ້າ​ສຸດ​ທີ່​ສາ­ມາດ​ຄວ້າ​ຫຼຽນ​ຄຳ​ໃຫ້​ຕົ້ນ​ສັງ­ກັດ​ທີ່​ກຳ­ລັງ​ສຶກ​ສາ​ຢູ່​ມະ­ຫາ­ວິ­ທະ­ຍາ­ໄລ​ກຸງ​ເທບ​ທົນ​ບູ​ລີ 14,12 ວິ­ນາ­ທີ ໃນ​ລາຍ­ການ​ຊີງ​ແຊັມ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ​ໄທ ແລະ ສະ­ຖິ­ຕິ​ນີ້​ກໍ​ກາຍ­ເປັນ​ສະ­ຖິ­ຕິ​ໃໝ່​ທີ່​ດີ​ທີ່​ສຸດ​ຂອງ​ປີ 2020 ທີ່​ຖືກ​ບັນ­ທຶກ​ໄວ້ ແລະ ນ້ອງ​ກໍ​ກາຍ­ເປັນ​ມື 1 ລາຍ­ການ​ແລ່ນ​ຂ້າມ​ຮົ້ວ 110 ແມັດ​ຊາຍ​ຂອງ​ອາ​ຊຽນ​ທັນ­ທີ.

ຕິດຕໍ່ພວກເຮົາ