MLC ເພີ່ມທະວີຮ່ວມມືເພື່ອຄວາມສົມບູນພູນສຸກຮ່ວມກັນ

    ວັນ​ທີ 25 ມີ­ນາ 2020 ທີ່​ກະ­ຊວງ​ການ​ຕ່າງ­ປະ­ເທດ ທ່ານ ທອງ​ຜ່ານ ສະ­ຫວັນ​ເພັດ ຮອງ​ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ໄດ້​ຖະ­ແຫຼງ​ຕໍ່​ສື່​ມວນ​ຊົນ ເນື່ອງ​ໃນ​ໂອ­ກາດ​ສັບ­ປະ­ດາ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ (MLC) ປີ 2020 ວ່າ: ຂອບ​ການ​ຮ່ວມ​ມື MLC ໄດ້​ຖືກ​ສ້າງ­ຕັ້ງ​ດ້ວຍ​ຄວາມ​ໝາຍ​ໝັ້ນ​ໃນ​ການ​ພັດ­ທະ­ນາ​ເສດ ຖະ​ກິດ-ສັງ­ຄົມ​ແບບ​ຮອບ­ດ້ານ ແລະ ຍືນ​ຍົງ​ຂອງ​ປະ­ເທດ​ແມ່­ນ້ຳ​ຂອງ​ຄື: ລາວ ກຳ­ປູ­ເຈຍ ມຽນ​ມາ ໄທ ແລະ ຫວຽດ­ນາມ ໂດຍ​ມີ ສປ ຈີນ ເປັນ​ປະ­ເທດ​ຄູ່​ຮ່ວມ​ພັດ­ທະ­ນາ.

    ໝາກ­ຜົນ​ການ​ຮ່ວມ​ມື​ຂອງ MLC ໄລ­ຍະ​ຜ່ານ​ມາ ໄດ້​ເປັນ​ຮູບ​ປະ​ທຳ​ຫຼາຍ​ປະ­ການ ແລະ ປະ­ກອບ­ສ່ວນ​ເຂົ້າ​ໃນ​ການ​ສ້າງ­ສາ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ປະ­ເທດ​ແມ່­ນ້ຳ​ຂອງ ກໍ​ຄື​ການ​ລຶ­ບລ້າງ​ຄວາມ­ທຸກ​ຍາກ ແລະ ການ​ຫຼຸດ­ຜ່ອນ​ຄວາມ​ແຕກ​ໂຕນ​ດ້ານ​ລະ­ດັບ​ການ​ພັດ­ທະ­ນາ​ໃນ​ພາກ​ພື້ນ MLC ຍັງ​ປະ­ກອບ­ສ່ວນ​ເຂົ້າ​ໃນ​ການ​ສ້າງ​ປະ­ຊາ​ຄົມ​ອາ​ຊຽນ ແລະ ການ­ຈັດ­ຕັ້ງ​ປະ­ຕິ­ບັດ​ຂໍ້​ລິ​ເລີ່ມ​ໜຶ່ງ​ແລວ​ໜຶ່ງ​ເສັ້ນ­ທາງ​ກໍ ຄື​ການ​ເຊື່ອມ​ໂຍງ​ທາງ​ເສດ­ຖະ­ກິດ ແລະ ການ​ເຊື່ອມ​ຈອດ​ໃນ​ພາກ​ພື້ນ ສປປ ລາວ ໄດ້​ຕີ​ລາ­ຄາ​ສູງ​ຕໍ່​ຂອບ​ການ​ຮ່ວມ​ມື MLC ທີ່​ມີ​ການ​ເຕີບ​ໃຫຍ່​ຂະ­ຫຍາຍ­ຕົວ​ຢ່າງ​ເປັນ​ຮູບ​ປະ​ທຳ​ໂດຍ​ໄວ ມີ​ກົນ​ໄກ​ການ​ຮ່ວມ​ມື​ຢ່າງ​ເປັນ​ລະ­ບົບ ແລະ ສອດ­ຄ່ອງ​ກັບ​ຄວາມ​ຮຽກ­ຮ້ອງ​ຕ້ອງ­ການ​ຕົວ​ຈິງ ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ພາກ​ພື້ນ​ແມ່­ນ້ຳ​ຂອງ.

    ສປປ ລາວ ໄດ້​ຮັບ​ໜ້າ­ທີ່​ເປັນ​ປະ­ທານ​ຮ່ວມ​ຂອບ​ການ​ຮ່ວມ​ມື MLC ກັບ ສປ ຈີນ ປີ 2018-2020 ໃນ​ໄລ­ຍະ​ດັ່ງ­ກ່າວ ລາວ​ເຮົາ​ໄດ້​ຕັ້ງ­ໜ້າ​ປະ­ກອບ­ສ່ວນ​ເຂົ້າ​ໃນ​ການ​ເພີ່ມ​ທະ­ວີ ແລະ ຮັດ​ແໜ້ນ​ການ​ຮ່ວມ​ມື MLC ໃຫ້​ມີ​ການ​ພັດ­ທະ­ນາ​ເປັນ​ກ້າວໆ​ອັນ​ພົ້ນ​ເດັ່ນ ລາວ​ເຮົາ​ໄດ້​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ລັດ­ຖະ­ມົນ­ຕີ​ຕ່າງ­ປະ­ເທດ​ແມ່­ນ້ຳ​ຂອງ-ແມ່­ນ້ຳ​ລ້ານ​ຊ້າງ​ຄັ້ງ​ທີ 4 ແລະ ຄັ້ງ​ທີ 5 ນອກ​ນີ້​ຍັງ​ໄດ້​ສຸມ​ໃສ່​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ພາຍ​ໃຕ້​ກອງ​ທຶນ​ພິ­ເສດ MLC ທີ່​ໄດ້​ຮັບ​ປີ 2017 ມີ 13 ໂຄງ­ການ ປີ 2018 ມີ 21 ໂຄງ­ການ ແລະ ສົກ​ປີ 2019-2020 ມີ 12 ໂຄງ­ການ ເຊິ່ງ​ໂຄງ­ການ​ດັ່ງ­ກ່າວ ບໍ່​ພຽງ​ແຕ່​ສົ່ງ​ຜົນ​ປະ­ໂຫຍດ​ໃຫ້​ລາວ​ຢ່າງ​ດຽວ ຍັງ​ໄດ້​ສົ່ງ​ຜົນ​ປະ­ໂຫຍດ​ທາງ​ກົງ ແລະ ທາງ​ອ້ອມ​ໃຫ້​ປະ­ເທດ​ສະ­ມາ­ຊິກ MLC ອີກ​ດ້ວຍ.

    ສຳ­ລັບ​ທິດ​ທາງ​ການ​ຮ່ວມ​ມື​ໃນ­ຕໍ່­ໜ້າ ລາວ​ເຮົາ​ໃນ​ຖາ­ນະ​ການ​ເປັນ​ປະ­ທານ​ຮ່ວມ​ກັບ​ຈີນ ຈະ​ສືບ­ຕໍ່​ປະ­ສານ​ງານ​ກັບ​ຈີນ ແລະ ປະ­ເທດ​ສະ­ມາ­ຊິກ​ແມ່­ນ້ຳ​ຂອງ ເພື່ອ​ກະ­ກຽມ​ໃຫ້​ແກ່​ກອງ​ປະ­ຊຸມ​ຜູ້­ນຳ MLC ຄັ້ງ​ທີ 3 ໃຫ້​ປະ­ສົບ​ຜົນ­ສຳ­ເລັດ MLC ຈະ​ສືບ­ຕໍ່ “ເພີ່ມ​ທະ­ວີ​ການ​ຮ່ວມ​ມື​ເພື່ອ​ຄວາມ​ສົມ­ບູນ​ພູນ​ສຸກ​ຮ່ວມ​ກັນ” ບົນ​ພື້ນ­ຖານ​ຄວາມ​ຕ້ອງ­ການ​ຕົວ​ຈິງ​ຂອງ​ບັນ­ດາ​ປະ­ເທດ​ແມ່­ນ້ຳ​ຂອງ ລວມ​ທັງ​ລາວ ໃຫ້​ສອດ­ຄ່ອງ​ກັບ​ສະ­ພາບ​ເງື່ອນ­ໄຂ​ຂອງ​ພາກ​ພື້ນ ແລະ ສາ­ກົນ​ຕາມ​ແຕ່​ລະ​ໄລ­ຍະ ໂດຍ​ສະ­ເພາະ​ສຸມ​ໃສ່​ຈັດ​ຕັ້ງ​ຜັນ​ຂະ­ຫຍາຍ​ຖະ­ແຫຼງ­ການ​ຊັນ​ຢາ ຖະ­ແຫຼງ ການ​ພະ­ນົມ​ເປັນ ແລະ ແຜນ​ປະ­ຕິ­ບັດ​ງານ5 ປີ (2018-2022) ໃຫ້​ບັນ­ລຸ​ຕາມ​ຈຸດ­ປະ­ສົງ​ເປົ້າ​ໝາຍ​ທີ່​ວາງ​ໄວ້​ຂະ­ຫຍາຍ​ການ​ຮ່ວມ​ມື​ໄປ​ສູ່​ລວງ​ເລິກ ແລະ ລວງ​ກວ້າງ ກໍ​ຄື​ເພີ່ມ​ທະ­ວີ​ການ​ຮ່ວມ​ມື​ໃນ 3 ເສົາ­ຄ້ຳ ແລະ 5 ຂົງ ເຂດ​ບູ​ລິ​ມະ​ສິດ​ທີ່​ມີ​ຢູ່ ແລະ ຂະ­ຫຍາຍ​ໄປ​ສູ່​ຂົງ­ເຂດ​ໃໝ່​ເຊັ່ນ: ສາ­ທາ­ລະ­ນະ​ສຸກ ການ​ສຶກ​ສາ ກະ­ສິ­ກຳ​ສະ­ອາດ​ການ­ທ່ອງ­ທ່ຽວ ການ​ແລກ­ປ່ຽນ​ແມ່­ຍິງ ແລະ ຊາວ​ໜຸ່ມ​ໃນ​ພາກ​ພື້ນ​ແມ່­ນ້ຳ​ຂອງ ພ້ອມ​ທັງ​ຍົກ​ສູງ ແລະ ພັດ­ທະ­ນາ​ຂົງ­ເຂດ​ທີ່​ເປັນ​ທ່າ­ແຮງ ແລະ ມີ​ລັກ­ສະ­ນະ​ພິ­ເສດ​ຂອງ​ແຕ່​ລະ​ປະ­ເທດ​ແມ່­ນ້ຳ​ຂອງ​ເຊັ່ນ: ການ​ແລກ­ປ່ຽນ​ດ້ານ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ເຂົ້າ​ໃນ​ການ​ພັດ­ທະ­ນາ​ຄວາມ​ສາ­ມາດ​ໃນ​ການ​ຜະ­ລິດ ເພື່ອ​ຊ່ວຍ​ບັນ­ດາ​ຫົວ­ໜ່ວຍ​ທຸ­ລະ​ກິດ​ເຂົ້າ​ເຖິງ​ຕະ­ຫຼາດ​ພາກ​ພື້ນ ແລະ ສາ­ກົນ​ໄດ້.

ຕິດຕໍ່ພວກເຮົາ